Xyaum Cov Uas Cev Vajtswv Lus Tus Qauv—Nahu
1. Phau ntawv Nahu pab tau peb li cas?
1 Lub nroog Ninave puam tsuaj tas thiab nyob do cuas cia los txog niaj hnub no. Qhov no ua pov thawj tias Nahu cov lus faj lem yeej muaj tseeb tiag. Rau qhov Nahu tau faj lem lawm tias Yehauvas yuav ua pauj rau cov tawm tsam nws, txawm cov yeeb ncuab uas muaj zog kawg nkaus los yuav tawm tsam tsis yeej nws. (Nh. 1:2, 6) Yog peb ua zoo nyeem Nahu cov lus faj lem, yuav pab tau peb thaum peb mus ua Vajtswv tes num.
2. Thaum mus tshaj tawm, peb yuav txhawb tibneeg li cas?
2 Txhawb Kom Muaj Kev Cia Siab: Yog peb tsis ua zoo nyeem phau ntawv Nahu, tej zaum peb yuav xav tias yog Nahu sau los tawm tsam Axilia lub nroog Ninave xwb. (Nh. 1:1; 3:7) Tiamsis Nahu cov lus no yog sau los txhawb Yehauvas cov tibneeg lub zog. Nahu lub npe txhais tias “Tus Txhawb Zog.” Nws tau txhawb cov neeg Yudai kom tsis txhob ntshai vim tshuav tsis ntev lawv yuav tsis pom lawv tus yeeb ncuab ntxiv lawm! Nahu kuj hais ntxiv tias Yehauvas yog lawv “lub chaw ruaj khov rau hnub uas raug txom nyem.” (Nh. 1:7) Cia peb ua li Nahu es mus tshaj tawm txoj xov zoo thiab txhawb kom tibneeg nrhiav chaw cawm siav rau hauv Yehauvas.—Nh. 1:15.
3. Peb xyaum Nahu es siv tej qauv thiab tej piv txwv li cas?
3 Siv Tej Qauv Thiab Tej Piv Txwv: Yehauvas tau hais kom Nahu sau tias Ninave yuav raug puam tsuaj ib yam li Iyi lub nroog Thenpe uas cov Axilia muab ua puam tsuaj tas lawm. (Nh. 3:8-10) Thaum peb qhia tibneeg tias lub sim ceeb phem no yuav dua mus, peb kuj siv tej lus faj lem uas twb muaj tiav lawm los qhia lawv kom lawv pom tias Yehauvas yeej ua raws li nws hais tiag. Peb kuj siv tej faj lem uas zoo li thaum cov Npanpiloo thiab cov Midia tau mus ntaus lub nroog Ninave rau xyoo 632 U.Nt.Y. Lub sijhawm ntawd los nag hlob heev thiaj ua rau tus dej Thaiki phwj mus nyab Ninave tus ntsa loog pob kiag ib qho lawm ces lawv thiaj li txeeb tau lub nroog Ninave li Yehauvas tau hais.—Nh. 1:8; 2:6.
4. Thaum mus qhia Vajlugkub, peb yuav qhia li cas es thiaj yoojyim rau tus tswv tsev to taub?
4 Qhia Kom Meej Thiab Kom To Taub: Thaum Nahu sau Yehauvas tej lus cia, nws sau raws nraim li Yehauvas hais thiab sau tau raug siab heev. Tsis tas li ntawd xwb, nws kuj sau tau meej heev. (Nh. 1:14; 3:1) Ib yam li ntawd, thaum peb mus qhia Vajlugkub, peb yuav tau hais tej lus yoojyim kom tus tswv tsev to taub. (1Khl. 14:9) Thawj zaug uas koj ntsib tus tswv tsev, koj yuav tau ua zoo qhia nws paub tias koj tuaj ua dabtsi. Thaum koj kawm Vajlugkub nrog tibneeg, pab kom lawv muaj kev ntseeg rau Yehauvas thiab rau nws Txojlus thiab pab kom lawv pom tias lawv yuav tau muab tej uas lawv kawm los siv ua neej.—Loos 10:14.
5. Nahu zaj lus faj lem pab tau peb li cas?
5 Phau ntawv Nahu qhia peb tias Nahu tso siab heev rau Yehauvas tej lus cog tseg. Nws ntseeg tias tej uas Yehauvas hais lawd yeej yuav muaj tiav. Tshuav tsis ntev xwb Xatas lub sim ceeb twb yuav dua mus ces tom qab ntawd yuav “tsis muaj leejtwg . . . tiv tau [Yehauvas] zaum ob” lawm. Cia cov lus no txhawb kom peb tso siab rau Yehauvas tej lus cog tseg ib yam li Nahu.—Nh. 1:9.