Txawj Qhia Vajlugkub Rau Lwm Tus
1. Cov tshaj tawm muaj tes haujlwm tseem ceeb twg?
1 Yeej tsis muaj leejtwg yuav teev tiam tau Vajtswv yog tias Vajtswv Yehauvas tsis “rub nws los.” (Yh. 6:44) Txawm li ntawd los, cov tshaj tawm uas qhia Vajlugkub rau lwm tus yuav tsum ua npaum li lawv ua tau kom cov uas lawv qhia thiaj txav ze lawv Txiv uas nyob saum ntuj. (Yknp. 4:8) Yog yuav kom txawj qhia mas yuav tsum tau npaj ua ntej. Yog yus cia li nyeem ib nqes zuj zus thiab nug tej lus nug hauv phau ntawv xwb yuav pab tsis tau tus kawm nkag siab txoj xov zoo, thiab nws yuav tsis loj hlob ntawm sab kev ntseeg.
2. Yog peb txawj qhia, pab tau tus kawm li cas?
2 Yuav kom cov tshaj tawm txawj qhia Vajlugkub lawv yuav tsum pab cov uas lawv qhia kom (1) nkag siab tej uas phau Vajlugkub qhia, (2) txais yuav tej uas phau Vajlugkub qhia, thiab (3) xyaum raws li tej uas phau Vajlugkub qhia. (Yh. 3:16; 17:3; Yknp. 2:26) Tej zaum yuav tau siv ntau hli los pab tus neeg ntawd hloov nws lub neej. Tiamsis txhua zaus nws nkag siab, txais yuav, thiab xyaum li tej uas phau Vajlugkub qhia nws txojkev sib raug zoo nrog Yehauvas yuav loj hlob zuj zus thiab tsis ntev xwb, nws yuav muab nws tus kheej cob rau Yehauvas.
3. Vim li cas cov txawj qhia Vajlugkub ho siv lus nug?
3 Nws Xav Li Cas Xwb?: Yuav kom peb paub seb tus peb qhia puas nkag siab thiab puas txais yuav tej uas nws kawm, peb yuav tsum tsis txhob ua tus hais nkaus xwb tiamsis peb yuav tsum cia nws hais thiab. (Yknp. 1:19) Nws puas to taub lub ntsiab uas neb tabtom kawm seb phau Vajlugkub qhia li cas txog qhov ntawd? Nws puas paub piav tej uas nws kawm? Nws puas nyiam tej uas nws kawm thiab? Nws puas pom tias tej uas phau Vajlugkub qhia yog qhov tseeb? (1Thxk. 2:13) Nws puas to taub tias tej uas nws kawm nws yuav tau muab coj los siv ua nws lub neej? (Khx. 3:10) Yuav kom peb paub seb nws xav li cas txog tej no, peb yuav tsum txawj nug nws. Tsis tas li ntawd xwb, tom qab peb nug nws lawd, peb yuav tau ua tib zoo mloog seb nws teb li cas.—Mth. 16:13-16.
4. Yog peb qhia ib tug twg es nws pheej tsis xyaum thiab tsis txais yuav tej nws kawm, peb yuav ua li cas xwb?
4 Neeg lub neej yeej tsis yoojyim hloov, tej zaum yuav tau siv sijhawm ntev thiaj hloov tau. (2Khl. 10:5) Yog peb qhia ib tug twg es nws pheej tsis xyaum thiab tsis txais yuav tej nws kawm, peb yuav ua li cas xwb? Peb yuav tsum ua siab ntev es cia Vajtswv txojlus thiab lub hwj huam dawb huv maj mam hloov nws lub siab. (1Khl. 3:6, 7; Hnpl. 4:12) Tsis txhob yuam nws. Yog tias nws tsis nkag siab lossis tsis kam txais yuav tej uas neb kawm, cia li mus kawm lwm lub ntsiab tso. Yog peb hlub tus peb qhia thiab ua siab ntev qhia nws txog tej uas nyob hauv phau Vajlugkub ces tej zaum nws yuav maj mam hloov nws, tsis tas peb hais.