Kev Kawm Tshaj Tawm Xyoo 2015 Pab Peb Txawj Qhia
1 Davi sau tias: “Thov cia tej lus hauv kuv lub qhov ncauj thiab tej kev xav hauv kuv lub siab yog tej uas koj pom zoo.” (Nt.Nk. 19:14) Peb kuj xav kom tej uas peb hais haum Yehauvas siab rau qhov peb saib txoj koob hmoov uas peb muaj los piav qhov tseeb hauv lub koom txoos thiab thaum mus tshaj tawm rau nqe heev. Txoj Kev Kawm Tshaj Tawm yog ib txojkev uas Yehauvas cob qhia peb kom peb txawj ua li no. Muaj txojkev cob qhia no txhua lub lim tiam hauv tshaj li 111,000 lub koom txoos thoob qab ntuj. Twb pab tau ntau tus kwvtij thiab nkauj muam nyob txhua lub tebchaws kom lawv paub qhia, txawj tshaj tawm txoj xov zoo, muaj lub siab tuab, thiab paub hais lus saib taus lwm tus.—Ttx. 19:8; Khx. 4:6.
2 Daim kom tswj rau xyoo 2015 yuav muaj tej zaj uas siv phau ntawv Pib Kawm Vajtswv Txojlus, Phau Vajlugkub Qhia Txog Dabtsi Tiag?, “Nyob Hauv Vajtswv Txojkev Hlub,” thiab phau Cov Tuag Tej Plig—Lawv Puas Pab Tau Koj Lossis Ua Phem rau Koj? Puas Muaj Tej Plig Ntawd Tiag Tiag? Tsis tas li ntawd xwb, tau hloov cov sijhawm rau zaj Cov Nqe Vajlugkub Txhawb Zog thiab Zaj 1. Nram no yuav tham seb tau hloov ob zaj no li cas thiab yuav tham txog kev cob qhia rau txoj Kev Kawm Tshaj Tawm xyoo tshiab no.
3 Cov Nqe Vajlugkub Txhawb Zog: Cov kwvtij uas muaj feem tham zaj no tsuas muaj 2 feeb los tham txog cov nqe Vajlugkub xwb. Tus kwvtij ntawd yuav tsum xaiv 1 lub ntsiab los tham xwb. Yog nws ua tib zoo npaj ces nws yuav nrhiav tau ib lub ntsiab zoo los pab lub koom txoos thiab yuav tsis mus dhau sijhawm. Nws yuav tsum tseg 6 feeb rau sawvdaws teb, ib leeg muaj li 30 chib los teb seb nqe Vajlugkub twg txhawb tau lawv. Sawvdaws yuav tsum ua tib zoo npaj xwv thaum teb thiaj tsis dhau 30 chib. Tsis yoojyim rau peb ua li no tiamsis yog peb ua tau ces yuav pab peb txawj ntsuas peb lub sijhawm. Tsis tas li ntawd xwb, kuj cia sijhawm rau lwm tus teb seb lawv ho tshawb nrhiav tau li cas thiab.
4 Zaj 1: Thaum tus kwvtij nyeem cov nqe Vajlugkub, tsuas muab 3 feeb rau nws nyeem lawm xwb, thiab tsis nyeem ntau nqe li qub. Cov uas muaj feem los nyeem yuav tau xyaum nyeem nrov nrov ob peb lwm, thiab ua tib zoo nyeem kom meej thiab npliag. Yog ua li no ces thaum nws nyeem, nws yuav nyeem tau kom lwm tus to taub zoo. Tag nrho Yehauvas cov tibneeg yuav tsum xyaum kom txawj nyeem ntawv npliag. Txojkev nyeem ntaub ntawv tseem ceeb heev rau peb txojkev teev tiam Yehauvas. Peb zoo siab kawg tias peb cov menyuam coob tus txawj nyeem ntawv npliag! Yuav tau qhuas cov niam txiv uas ua siab ntev pab lawv cov menyuam kom txawj nyeem ntawv.
5 Zaj 2: Zaj no yog muab rau cov muam thiab siv li 5 feeb los tham. Nyob rau sab 82 hauv phau Benefit From Theocratic Ministry School Education, muaj cov qauv uas qhia seb yuav qhia Vajlugkub rau leejtwg thiab rau qhov chaw twg. Tus saib xyuas mam xaiv lossis tej thaum nws kuj cia tus muam xaiv seb tus qauv twg phim zaj twg. Tus muam yuav tsum npaj nws zaj raws li lub ntsiab uas tau hom tseg thiab npaj kom phim cov tibneeg uas nyob rau lub koom txoos thaj tsam, xwv thiaj pab tau sawvdaws. Tus saib xyuas yuav tau ua tib zoo mloog tus muam seb nws puas txawj npaj nws zaj lus kom raug lub ntsiab, seb nws puas txawj piav cov nqe Vajlugkub kom phim lub ntsiab lus, thiab seb nws puas pab tau tus niam tsev to taub nws zaj lus. Tus saib xyuas mam nrhiav ib tug ua tus niam tsev.
6 Zaj 3: Zaj no muab tau rau cov kwvtij thiab cov muam tibsi thiab siv li 5 feeb los tham. Yog muab rau ib tug muam, nws yuav tsum npaj raws li Zaj 2. Yog muab zaj no rau ib tug kwvtij ua tus tham thiab yog siv phau ntawv Phau Vajlugkub Qhia Txog Dabtsi Tiag? los tham ces nws yuav tsum tham li ib zaj lus qhuab qhia kom pab tau lub koom txoos. Tus kwvtij lossis tus muam yuav tau tham thiab xaiv tej nqe Vajlugkub raws li lub ntsiab uas tau hom tseg.
7 Ib Yam Tshiab Rau Zaj 3: Yog siv phau Pib Kawm Vajtswv Txojlus los ua zaj lus tham thiab yog ib tug kwvtij ua tus tham, ces nws yuav tau npaj nws zaj li thaum mus qhia Vajlugkub lossis li thaum tsev neeg pe hawm Vajtswv ua ke. Xaiv ib tug hauv nws tsev neeg lossis ib tug kwvtij hauv lub koom txoos ua tus pab nws. Muaj qee zaus yuav siv cov txwj laus los tham zaj no thiab. Yog ib tug txwj laus ua tus tham ces nws xaiv tau tus pab nws thiab qhov chaw nws yuav tham. Tseeb tiag, yuav txhawb tau lub koom txoos thaum lawv pom cov txwj laus uas txawj qhia ua yeeb yam nrog nws tsev neeg lossis lwm tus kwvtij.
Mloog tej lus ntuas thiaj yuav txawj qhia
8 Lus Ntuas: Tom qab tham zaj 1, 2, thiab 3 tas, zoo rau tus saib xyuas siv 2 feeb no los qhia tus kwvtij lossis tus muam txog tej yam zoo uas nws tau ua thiab siv phau Benefit From Theocratic Ministry School Education los qhia kom nws yimhuab txawj ntxiv. Thaum tus saib xyuas hu tus kawm los saum sam thiaj, nws tsis txhob tshaj tawm tias tus kwvtij lossis tus muam tabtom xyaum zaj kawm twg. Tiamsis tom qab tham tas tus saib xyuas mam li qhia seb nws xyaum zaj kawm twg. Qhuas nws ob peb lo thiab yog nws yuav tsum rov xyaum ib zaj kawm twg, tus saib xyuas mam li piav seb yog vim li cas nws thiaj yuav tau rov xyaum zaj ntawd dua.
9 Tom qab tus kawm tham nws zaj tas lawm, tus saib xyuas mam kos nws phau ntawv thiab nrog nws tham ib leeg xwb. Tus saib xyuas yuav nug seb nws puas tau xyaum raws li nws zaj kawm uas nyob sab 79-81 hauv phau Ministry School. Yog tus saib xyuas pom tias yuav tau hais ob peb lo lus txhawb lossis ntuas tus kawm, nws mam li hais tom qab kev sib txoos lossis rau lwm lub sijhawm. Tej lus ntuas no yuav pab kom peb txhua tus kheev hlob zuj zus.—1Tmt. 4:15.
10 Yog tus kawm mus dhau sijhawm lawm, tus saib xyuas lossis tus pab nws yuav tau ib nyuag nias tswb lossis khob rooj es qhia tus kawm tias nws mus dhau sijhawm lawm. Thaum nws hnov lub suab ntawd, nws yuav tsum nres. Tiamsis ua ntej nws nres, nws yuav tsum nyeem lossis hais tas kab lus ntawd tso.—Mus saib phau Ministry School sab 282 nqe 4.
11 Txhawb txhua tus uas tsim nyog rau npe kawm Kev Kawm Tshaj Tawm kom lawv kavtsij rau npe kawm. (Mus saib phau Ministry School sab 282 nqe 6.) Txojkev kawm no pab kom Yehauvas cov tibneeg kub siab lug mus tshaj tawm txoj xov zoo txog lub Nceeg Vaj. Kuj pab tau lawv hlub thiab saib taus cov lawv qhia thiab. Yehauvas zoo siab heev thaum nws pom coob leej, uas qhuas nws, siv tej uas lawv tau kawm los ntawm txoj Kev Kawm Tshaj Tawm.—Nt.Nk. 148:12, 13; Yxy. 50:4.