Koj Puas Nyeem Phau Niaj Hnub Tshawb Nrhiav Phau Vajlugkub?

Txhua hnub koj puas nyeem phau Niaj Hnub Tshawb Nrhiav Phau Vajlugkub? Yog tias koj tsis niaj hnub nyeem, koj puas qee tau mentsis sijhawm los nyeem? Ib txhia nyeem thaum yav sawv ntxov, lawv thiaj muaj sijhawm xav txog tej uas lawv tau nyeem. (Yausuas 1:8; Phau Ntawv Nkauj 119:97) Koj kuj ua tau dabtsi ntxiv? Yuav kom koj to taub lub ntsiab ntawm nqe Vajlugkub rau hnub ntawd, zoo rau koj nyeem tag nrho tshooj ntawd. Tsis tas li ntawd, xav txog ib tug hauv phau Vajlugkub uas tau coj raws li lub ntsiab lus ntawd ces xyaum li nws tau ua. Yog koj siv Vajtswv Txojlus los pab koj txiav txim siab rau tej yam hauv koj lub neej ces koj yuav kaj siab dua.​—Phau Ntawv Nkauj 119:105.

Nyob thoob qab ntuj, cov ua haujlwm hauv Npe-ee nyeem phau Niaj Hnub Tshawb Nrhiav Phau Vajlugkub thaum sawv ntxov. Ob peb xyoos dhau los no, tau muab tej lus qhuab qhia no kaw thiab tso tawm hauv JW Tshooj TV^® ntawm lub ntsiab TEJ KEV COB QHIA TSHWJ XEEB. Koj puas tau mus saib cov yeeb yaj kiab no? Tej zaum cov ntsiab lus yuav pab tau koj. Xws li, zaj uas hais txog Lauj lub neej. Zaj no yuav pab kom koj paub txiav txim siab ua qhov zoo.

SAIB ZAJ YEEB YAJ KIAB TSIS TXHOB HLUB LUB NTIAJTEB (1 YAUHAS 2:15), TOM QAB NTAWD TEB COV LUS NUG NO:

• Zaj lus qhia no tham txog phau Vajlugkub lub hauv paus ntsiab lus twg?

• Zaj uas hais txog Lauj lub neej qhia kom peb ceev faj tsis txhob mus nyiam thiab cia siab rau tej yam hauv lub ntiajteb li cas?​—Chivkeeb 13:12; 14:12; 19:3, 12, 13, 24-26

• Peb yuav ua li cas qhia tias peb muab siab npuab Yehauvas dua tej yam hauv lub ntiajteb?