Siv Phau Nyob Kaj Siab Lug Mus Ib Txhis Los Pab Cov Koj Qhia Kom Muaj Kev Ntseeg Rau Yehauvas Thiab Yexus

Yuav kom cov peb qhia ua haum Vajtswv siab lawv yuav tsum muaj kev ntseeg. (Henplais 11:6) Yog peb siv phau Nyob Kaj Siab Lug Mus Ib Txhis los qhia lawv yuav pab tau lawv muaj kev ntseeg. Phau no muaj tej nqe Vajlugkub, tej duab, yeeb yaj kiab, lus nug thiab tej ntsiab lus uas qhia tau meej meej kom tus kawm nkag siab. Yog peb pab cov uas peb qhia kom lawv muaj kev sib raug zoo nrog Vajtswv thiab coj raws li tej uas lawv kawm, lawv thiaj yuav tuav kev ntseeg ruaj nreeg thaum raug sim.​—1 Kauleethaus 3:12-15.

Yeej nyuaj rau ib txhia nrog Vajtswv ntaus phooj ywg vim lawv tsis pom nws. Yog li, peb yuav tau pab kom lawv pom tias Vajtswv zoo npaum li cas tiag lawv thiaj yuav tso siab rau nws.

SAIB ZAJ YEEB YAJ KIAB PHAU NYOB KAJ SIAB LUG MUS IB TXHIS TSAV PEB TXOJ KEV NTSEEG RAU YEHAUVAS, TOM QAB SAIB TAG TEB COV LUS NUG NO:

• Ua cas peb thiaj paub tias tus muam no ua tib zoo npaj ua ntej nws mus qhia Vajlugkub?

• Tus muam nug tus kawm li cas ntxiv txog Yaxayas 41:10, 13 es tus kawm thiaj kam qhia siab?

• Zaj yeeb yaj kiab thiab nqe Vajlugkub pab tau tus kawm li cas?

Coob tus tsis nkag siab tias tus nqi txhiv muaj nqis npaum li cas, thiab lawv tsis pom tias Vajtswv hlub lawv kawg nkaus nws thiaj pub nws tib leeg tub los tuag txhiv lawv. (Kalatias 2:20) Yog li no peb yuav tau pab kom lawv to taub zoo txog tus nqi txhiv, lawv thiaj yuav paub ua lub neej haum Vajtswv siab.

SAIB ZAJ YEEB YAJ KIAB PHAU NYOB KAJ SIAB LUG MUS IB TXHIS TSAV PEB TXOJ KEV NTSEEG RAU YEXUS, TOM QAB SAIB TAG TEB COV LUS NUG NO:

• Ua cas peb thiaj paub tias tus kwv tij yeej ua tib zoo npaj ua ntej nws mus qhia Vajlugkub?

• Tus kwv tij siv ntu “Tshawb Ntxiv” los pab tus uas nws qhia li cas?

• Vim li cas kev thov Vajtswv tseem ceeb ua luaj rau tus kawm?