Koj Puas Paub?

Ib daim lag zeb qub qub uas muaj npe ntawv txaug rau txhawb phau Vajlugkub li cas?

NYOB hauv ib lub tsev khaws khoom qub hauv Yeluxalees, muaj ib daim lag zeb uas muaj npe ntawv txaug rau kwv lam li xyoo 700 txog 600 ua ntej Yexus. Muaj neeg nrhiav tau daim lag zeb no hauv ib lub qhov tsua faus neeg nyob tsis deb ntawm Henploos hauv tebchaws Yixalayees. Muaj cov npe ntawv txaug tias: “Yaves Xave-yaus foom Hankas uas yog Hankav tus tub.” Cov lus no txhawb phau Vajlugkub li cas? Txhawb tias thaum ub cov neeg Henplais yeej sau thiab niaj hnub hais Vajtswv lub npe Yehauvas lossis Yaves. Yehauvas lub npe yog muab sau ua lus Henplais ces yog YHWH. Cov neeg uas mus khiav nkaum thiab mus sib ntsib hauv tej qhov tsua no nyiam muab Vajtswv lub npe kos nrog lawv lub rau ntawm tej ntsa zeb.

Laxees Nanpuxis (Rachel Nabulsi) hauv lub tsev kawm ntawv qib siab hauv lub xeev Ntsaus Ntsia (Georgia) tebchaws U.S.A. hais tias: ‘Qhov uas neeg pheej txaug lub npe YHWH rau tej lag zeb qhia tias YHWH tseem ceeb heev rau cov neeg Yixalayees thiab cov neeg Yudas.’ Cov lus no txhawb qhov uas phau Vajlugkub muaj Vajtswv lub npe YHWH tsheej txhiab zaus. Cov neeg thaum ub tej npe los kuj muaj Vajtswv lub npe nrog thiab.

Lo lus “Yaves Xave-yaus” uas sau rau ntawm daim lag zeb txhais tias “Yehauvas tus uas muaj hwjchim loj kawg nkaus.” Ces zoo li cov neeg thaum ub yeej niaj hnub siv Vajtswv lub npe thiab lo lus “Yehauvas tus uas muaj hwjchim loj kawg nkaus.” Yog li ntawd peb thiaj to taub tias vim li cas phau Vajlugkub thiaj siv lo lus “Yehauvas tus uas muaj hwjchim loj kawg nkaus” ntau ua luaj hauv Cov Nqi Vajlugkub Henplais. Feem ntau muaj nyob rau hauv phau Yaxayas, Yelemis, thiab Xakhaliyas.