Qhov Zoo Qhov Phem: Sawv Daws Yuav Tsum Ua Zoo Xav

Yog muaj ib qho chaw koj tsis tau mus dua, koj yuav ua li cas?

1. 1. Koj puas yuav cia li maub dub mus xwb?

2. 2. Koj puas yuav lam raws lwm tus qab seb puas yuav mus txog chaw?

3. 3. Los sis koj puas yuav siv lub GPS qhia kev, ib daim ntawv qhia kev, los sis nug ib tug phooj ywg uas paub txoj kev?

Yog koj ua raws li thawj ob yam, koj yeej yuav mus txog ib qho chaw, tiam sis tsis yog qhov chaw uas koj xav mus. Yog koj ua raws li yam peb ces koj yeej tso siab tau tias koj yuav mus txog qhov chaw uas koj npaj siab yuav mus.

Peb yeej xav tau lub neej nyob kaj siab lug. Tiam sis yuav kom tau lub neej ntawd, nyob ntawm seb peb nrhiav tswv yim qhov twg los pab peb ua peb lub neej.

Muaj tej yam uas peb ua kuj tsis luaj twg. Tiam sis muaj tej yam yeej hloov tau peb lub neej, thiab yuav ua rau peb tsev neeg zoo siab los sis tu siab. Tej yam peb ua ntawd kuj qhia tias peb pom yam twg zoo yam twg phem. Yog li, tej uas peb yuav tsum xav tias puas tsim nyog ua los sis tsis tsim nyog ua, yog tej yam xws li:

• Ua nkauj ua nraug, xaiv txij xaiv nkawm

• Coj ncaj, xaiv hauj lwm ua, thiab nrhiav kev nplua nuj

• Cob qhia me nyuam

• Saib taus luag lwm tus

Yuav ua li cas koj thiaj paub tias tej uas koj xaiv ua, yuav pab tau koj thiab koj tsev neeg muaj kev zoo siab?

Yuav ua li cas koj thiaj paub tias qhov twg zoo qhov twg phem?

Phau ntawv no yuav qhia seb vim li cas koj thiaj tso siab tau rau tej uas phau Vajlugkub qhia tias yog qhov zoo qhov phem, thiab phau Vajlugkub yuav pab tau koj li cas.