Pab Uas Ntaus Thawj Tsab Ntawv
Nyob zoo cov Kwvtij Nkauj Muam:
“Peb ua Vajtswv tsaug txog nej txhua tus txhua lub sijhawm thiab thaum thov Vajtswv peb kuj thov txog nej thiab. Peb nco tab meeg Vajtswv uas yog peb leej Txiv lub xubntiag txog nej txojkev ntseeg uas ua haujlwm tshwm los thiab nco txog nej txojkev hlub uas rau siab ua haujlwm hnyav thiab qhov uas nej muaj siab ntev thev vim muaj chaw vam hauv peb tus Tswv Yexus Khetos.” (1Thxk. 1:2, 3) Peb kuj xav tib yam li no txog nej thiab! Peb ua Yehauvas tsaug rau nej thiab rau tes haujlwm zoo uas nej rau siab ntso ua. Yog vim li cas peb thiaj ua Yehauvas tsaug?
Xyoo tas los no, nej yeej khwv heev “ua haujlwm” tsis tseg thiab nej kuj muaj “txojkev hlub uas rau siab ua haujlwm hnyav” txhawb lub Nceeg Vaj. Nej coob tus tau lauj sijhawm kom ua tau Vajtswv tes num ntau ntxiv. Nej ib txhia tau tsiv mus rau lwm thaj chaw lossis mus rau lwm lub tebchaws uas cheem tsum cov uas tshaj tawm txoj xov zoo. Muaj tej txhia kuj siv sijhawm mus teeb rooj teeb laub tshaj tawm rau tej chaw uas muaj neeg coob dua kev. Muaj coob tus kuj tau pab tho kev rau lub caij ua Kevcai Nco Txog Yexus, rau lub hli uas tus saib xyuas thaj tsam tuaj xyuas lub koom txoos, lossis rau thaum lub 8 Hli uas tau tseb daim ntawv tseb txog lub Vej xaij. Peb qhuas nej kawg li, rau qhov txawm nej lub neej yuav zoo li cas los, nej yeej siv tag nrho nej lub dag lub zog “ua haujlwm” tsis tseg rau Yehauvas. (Khx. 3:23, 24) Vim li no peb thiaj ua Yehauvas tsaug!
Peb kuj nco nej txiaj ntsig heev rau nej “txojkev hlub uas rau siab ua haujlwm hnyav” ua vaj ua tsev los siv ua Vajtswv tes num rau ntau qhov chaw thoob ntiajteb. Peb cheem tsum cov vaj cov tsev no, rau qhov Yehauvas cov neeg tsuas muaj coob zuj zus lawm xwb. (Yxy. 60:22) Xav seb, ntsaib no peb twb muaj txog li 8,201,545 tug tshaj tawm lawm, thiab ib lub hlis twg cov uas kawm Vajlugkub nrog peb muaj txog li 9,499,933 tug. Vim li no ntau ceg thiaj cheem tsum txuas vaj txuas tsev ntxiv kom loj thiab dav lossis muab tej qub kho dua tshiab kom zoo. Thiab vim peb coob zuj zus lawm, peb cheem tsum ntau lub Tsev Nceeg Vaj ntxiv. Tsis tas li ntawd xwb, thoob ntiajteb peb cheem tsum ua tsev txhais lus rau cov txhais lus mus nyob xwv lawv thiaj nyob ze rau thaj tsam uas hais lawv yam lus.
Yog li ntawd, zoo rau peb nug li no: ‘Puas muaj tej yam uas kuv ua tau los pab ua cov vaj cov tsev no?’ Tej zaum peb ib txhia yuav mus pab tau ua cov vaj cov tsev no. Txawm peb txawj ua vaj ua tsev los tsis txawj, muaj ib yam uas peb txhua tus yeej pab tau, uas yog muab peb tej qhov txhia chaw pub rau Yehauvas. (P.L. 3:9, 10) Lub sijhawm ua lub tsev ntaub, cov Yixayee zoo siab hlo muab tej qhov txhia chaw tuaj pub ua lub tsev ntawd txog thaum uas tshaj tawm kom tsis txhob coj tuaj ntxiv lawm. (Kh.D. 36:5-7) Cov qauv nyob hauv phau Vajlugkub uas zoo li no yeej raug peb siab thiab txhawb tau peb zog kawg li. Peb ua Yehauvas tsaug rau nej “txojkev hlub uas rau siab ua haujlwm hnyav” pab rau seem ua vaj ua tsev.
Thaum peb pom peb cov kwvtij muaj siab ntev thev tej kev sim siab ua rau peb zoo siab xyiv fab kawg li. Xws li peb cov kwvtij uas nyob rau South Korea. Txij xyoo 1950 los, cov kwvtij hluas uas nyob rau lub tebchaws ntawd raug kaw, tus yuav kaw ntev li cas los muaj, vim lawv tsis kam mus ntaus tsov ntaus rog es hla Vajtswv txoj kevcai. Tau ntau tiam lawm uas lawv pheej muab cov kwvtij kaw, tiamsis lawv yeej tsis cia qhov ntawd ua rau lawv txojkev ntseeg tsuag li. Lawv tus qauv uas muaj siab ntev thev txhawb tau peb txojkev ntseeg kawg li!
Nyob rau Eritrea, muaj 3 tug kwvtij twb raug kaw tau 20 tawm xyoo lawm. Muaj ib co muam thiab menyuam kuj raug kaw thiab, tiamsis kaw tsis tau ntev npaum li 3 tug kwvtij no. Twb mus tso lawv ntau zaus lawm, tiamsis tso tsis tau li. Txawm li ntawd los, lawv muaj siab ntev thev tsis pauv siab. Lawv raug ntau yam kev sim siab hnyav kawg li, tiamis lawv yeej tuav rawv txojkev ntseeg. Thaum peb thov Yehauvas, nco ntsoov thov kom pab lawv thiab.—Loos 1:8, 9.
Tseem tshuav nej coob tus uas tsis raug kaw vim nej txojkev ntseeg. Txawm li ntawd los, nej coob tus yeej laus zuj zus, raug kev mob kev nkeeg, raug txij nkawm lossis cov txheeb ze uas tsis ntseeg Yehauvas tsim txom, los yog raug lwm yam teeb meem uas nej thiaj paub xwb. Txawm nej raug tej ntawd los, nej tseem teev tiam Yehauvas tsis tseg! (Yknp. 1:12) Peb qhuas nej kawg li. Peb kuj ua Yehauvas tsaug uas nej muaj siab ntev thev tsis tseg.
Qhov uas nej rau siab ntso khwv ua haujlwm tsis tseg, nej txojkev hlub ua haujlwm hnyav, thiab qhov uas nej muaj siab ntev thev ua rau peb “ua [Yehauvas] tsaug, vim nws zoo kawg.” (Nt.Nk. 106:1) Peb hlub nej txhua tus kawg li, thiab peb thov kom Yehauvas pub dag zog rau nej, pab nej thev kam tiag, thiab foom koob hmoov rau nej kom nej thiaj teev tiam tau nws mus ib txhiab ib txhis tsis kawg.
Nej cov kwvtij,
Pab Uas Ntaus Thawj Ntawm Yehauvas Cov Timkhawv