Yuav Ua Li Cas Thiaj Rov Mus Ua Tau Lub Neej Li Thaum Tsis Tau Muaj Tus Kab Mob Kis? Phau Vajlugkub Pab Tau Peb Li Cas?

Teb chaws Ntsaws Me Nis ib tug thawj coj lub npe hu ua Eentsislam Mawskaus (Angela Merkel) tau hais tias “Peb xav kom lub neej rov zoo li qub.”

Tej zaum koj kuj xav ib yam li tus thawj coj no hais thiab, rau qhov tus kab mob kis tseem kis zuj zus ib lub teb chaws rau ib lub. Peb lub neej puas rov zoo li qub tiag? Tib neeg ntshaw kom lub neej zoo li cas?

• Xav rov mus ua lub neej li thaum tsis tau muaj tus kab mob kis. Tus kws tshuaj Eetawmnis Fauvtshim (Anthony Fauci)a tau hais tias ib txhia tseem nco thaum lawv tau nrog lwm tus sib puag, sib tuav tes, thiab mus ub mus no ua ke. Coob leej ntau tus hais tias, “yuav kom lawv rov mus ua lub neej tau li qub” yuav tsum muaj “tej tsev muag mov tej chaw saib yeeb yaj kiab thiab tej yam xws li no.”

• Muaj lub neej zoo dua qub. Ib txhia xam pom tias lub neej tam sim no zoo dua li lub neej yav tas los lawm. Tos lawv xav li no los yeeb vim yog yav tas los tib neeg khwv heev, muaj kev xaiv ntsej xaiv muag, thiab ua rau tib neeg puas siab puas ntsws tas, tej no yuav tsum tau hloov. Khaus Tshuaj (Klaus Schwab) uas yog ib tug saib xyuas lub koom haum lag luam thoob ntiaj teb tau hais tias “Tus kab mob kis zaum no ua rau peb muaj sij hawm los zaum tsaws xav seb yuav ua li cas thiaj kho tau lub ntiaj teb. No yog ib lub sij hawm zoo thiab yuav tau siv sij hawm ntev zog thiaj ua tiav.”

Tiam sis ib txhia hais tias peb yuav rov tsis tau mus ua lub neej li thaum tsis tau muaj tus kab mob lawm. Rau qhov ib txhia poob hauj lwm, tsis muaj chaw nyob, noj qab tsis nyob zoo, los sis ib tug uas lawv hlub tau tas sim neej lawm.

Yeej tsis muaj leej twg paub tias tom qab tus kab mob no dua lawd peb lub neej yuav zoo li cas. (Tej Lus Qhia 9:11) Txawm li ntawd los, phau Vajlugkub yeej pab tau peb seb peb yuav ua peb lub neej li cas thiab pab peb nyiaj dhau tej teeb meem yuav los raug peb. Tsis tas li ntawd xwb, phau Vajlugkub tseem qhia txog tej uas yuav muaj tshwm sim yav tom ntej, uas tej zaum koj twb tsis txeev hnov dua li.

Tus kab mob COVID-19 qhia peb txog dab tsi

Phau Vajlugkub twb qhia ua ntej lawm tias thaum “lub sim ceeb yuav kawg” yuav muaj ntau qhov xwm txheej. Xws li, kev tsov kev rog, av qeeg loj, kev tshaib kev nqhis thiab “yuav muaj mob thoob plaws txhua qhov huv tibsi.” (Lukas 21:11; Mathais 24:3) Tus kab mob COVID-19 yog ib qhov xwm txheej uas muaj tiav raws li tej lus faj lem hauv phau Vajlugkub.

Tej no pab tau peb li cas: Txawm tus kab mob kis kis tsawg zuj zus lawm los phau Vajlugkub hais tias peb tseem nyob rau lub sij hawm uas “muaj kev ntxhov siab heev.” (2 Timautes 3:1) Qhov no qhia rau peb tias yav tom hauv ntej tseem yuav muaj ntau yam los raug peb.

Phau Vajlugkub pab peb muaj kev cia siab: Txawm tias tam sis no lub ntiaj teb tsuas muaj teeb meem ntau zuj zus xwb los tshuav tsis ntev xwb Vajtswv yuav muab txhua yam kho dua tshiab. Vajtswv yuav kho li cas?

Yuav muaj li cas tom qab tus kab mob kis dua lawm

Phau Vajlugkub tsis yog qhia txog tej teeb meem uas peb raug xwb, tiam sis kuj qhia tias yuav muaj tej yam zoo twg tshwm sim thiab. Tsis muaj ib lub tseem fwv twg uas yuav ua kom muaj tau li no, tsuas yog Vajtswv lub Nceeg Vaj xwb thiaj ua tau. Phau Vajlugkub hais tias “Nws yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”—Tshwmsim 21:4.

Vajtswv Yehauvasb hais tias: “Nimno kuv yuav tsim dua ib puas tsav yam tshiab!” (Tshwmsim 21:5) Nws yuav tshem tawm tej teeb meem huv si hauv lub ntiaj teb no mus, tus kab mob kis los kuj yuav raug tshem thiab. Nws yuav ua kom muaj tiav li nram no:

• Tib neeg yuav zoo tiav log, noj qab nyob zoo tsis muaj mob muaj nkeeg thiab tsis muaj kev ploj kev tuag li lawm.—Yaxayas 25:8; 33:24.

• Tib neeg yuav txaus siab rau lawv tes hauj lwm, lawv yuav tsis tau ua tej hauj lwm sab sab lim lim ntxiv lawm.—Yaxayas 65:22, 23.

• Yuav tsis muaj kev txom nyem thiab kev tshaib kev nqhis.—Phau Ntawv Nkauj 72:12, 13; 145:16.

• Yuav tsis muaj kev quaj ntsuag li lawm, rau qhov Vajtswv cog lus tias peb yuav rov pom tus uas peb hlub ciaj sawv rov los tau txoj sia.—Yaxayas 65:17; Tes Haujlwm 24:15.

Tej no pab tau peb li cas: Phau Vajlugkub hais tias: “Qhov uas peb cia siab no zoo ib yam li tus tswg uas muaj hlua khi peb lub siab kom nyob ruaj ruaj.” (Henplais 6:19) Tej lus cog tseg uas Vajtswv yuav ua no pab tau peb lub siab tus, tsis nco txob tsis nco txhawj kom peb nyiaj tau peb tej teeb meem ib hnub dhau ib hnub, thiab tseem pab tau peb muaj kev kaj siab.

Tiam sis koj puas tso siab tau rau Vajlugkub tej lus cog tseg? Mus nyeem zaj “Tso Siab Tias Phau Vajlugkub Qhia Qhov Tseeb.”

Tom qab tus kab mob kis ntawd tej lus hauv phau Vajlugkub pab peb thev tau txhua yam uas peb raug

• Saib txoj sia rau nqis

  Nqe Vajlugkub: “Tswvyim tuav tau tus uas txawj ntse txojsia.”—Laj Lim Tswvyim 7:12.

  Nqe no txhais tias: Tswv yim yuav pab kom koj txawj txiav txim siab zoo thiab paub zam tej kab mob kis. Yog li ntawd, tshuaj seb ib thaj tsam koj nyob kab mob kis ntau npaum li cas, npog qhov ncauj qhov ntswg txhob mus nyob ze ze lwm tus thiab ib sij ntxuav koj tes ib zaug. Tsis tas li ntawd, tshuaj saib tib neeg kis tau tus kab mob coob npaum li cas, thiab muaj pes tsawg tus twb txhaj tshuaj lawm.

• Ua neeg xyuam xim

  Nqe Vajlugkub: “Tus uas muaj tswvyim ceev faj thiab tig hlo ntawm txojkev phem, tiamsis tus neeg ruam tsis txawj tswj, nws lam tau lam ua.”—Pajlug 14:16.

  Nqe no txhais tias: Kav tsij ua npaum li koj ua tau los tiv thaiv koj tus kheej mus ntxiv. Cov tshawb fawb hais tias tus kab mob kis no yuav nyob ntev heev.

• Mloog tej uas muaj tseeb xwb

  Nqe Vajlugkub: “Tus neeg ruam ntseeg txhua yam, tiamsis cov neeg ntse ua tib zoo xav lawv mam li ua.”—Pajlug 14:15.

  Nqe no txhais tias: Mloog tej xov xwm tseeb xwb. Qhov no tseem ceeb heev, yog mloog xov xwm qhia tsis tseeb ces yuav ua tau rau koj xav yuam kev.

• Xav mus rau qhov zoo

  Nqe Vajlugkub: “Tsis txhob nug hais tias, “Vim li cas yav tas los zoo dua tamsim no?” Qhov uas koj nug li ntawd tsis yog lus ntse.”—Tej Lus Qhia 7:10.

  Nqe no txhais tias: Txawm koj lub neej yuav zoo li cas los cia li ua tiag tsav koj lub neej es txhob muab piv rau yav tas. Los sis pheej nroo tias vim tus kab mob no thiaj ua rau kuv plam yam ub yam no lawm.

• Saib taus lwm tus

  Nqe Vajlugkub: “Nej yuav tsum saib taus sawvdaws.”—1 Petus 2:17.

  Nqe no txhais tias: Thaum muaj tus kab mob kis ib leeg yeej raug teeb meem txawv ntawd ib leeg thiab ib leeg yeej xav txawv ntawd ib leeg txog tus kab mob kis. Yog li ntawd, cia li saib taus lwm tus es txhob yuam kom lwm tus ua raws li koj lub siab xav. Koj yuav tsum xav txog cov laus, cov muaj mob muaj nkeeg, thiab cov tsis tau txhaj tshuaj.

• Xyaum ua siab ntev

  Nqe Vajlugkub: “Tus uas muaj kev hlub, nws ua taus siab ntev, nws muaj lub siab dawb siab zoo.”—1 Kauleethaus 13:4.

  Nqe no txhais tias: Yog thaum luag twb tso cai rau tib neeg mus ub mus no lawm tiam sis muaj qee leej los hais rau koj tias lawv tseem ntshai mus ua qee yam li thaum tsis tau muaj tus kab mob kis los cia li ua zoo mloog lawv hais. Thaum koj yuav ua ib yam dab tsi los nco ntsoov ua siab ntev thiab coj raws li nom tswv qhia tseg.

Thaum muaj tus kab mob COVID-19 phau Vajlugkub pab tau ib txhia li cas?

Tej lus cog tseg hauv phau Vajlugkub txog lub neej yav tom hauv ntej cuab tau Yehauvas Cov Timkhawv lub zog, qhov no pab tau lawv kom txhob nyuaj siab dhau txog tus kab mob kis uas tab tom kis tam sim no. Lawv ib leeg tseem pab ib leeg kom ua tau raws li phau Vajlugkub hais kom sawv daws tuaj pe hawm Vajtswv ua ke. (Henplais 10:24, 25) Peb zoo siab tos txais sawv daws tuaj koom Yehauvas Cov Timkhawv tej kev sib txoos saum huab saum cua rau lub caij muaj kab mob no.

Muaj coob leej ntau tus pom tias Yehauvas Cov Timkhawv tej kev sib txoos pab tau lawv heev. Xwb li, ib tug poj niam uas kis tau tus mob COVID-19 nws tau tuaj koom Yehauvas Cov Timkhawv tej kev sib txoos saum huab saum cua. Lub sij hawm nws mob kev sib txoos no pab tau nws heev. Nws hais tias: “Cuag li kuv yog lawv ib tse neeg. Qhov uas kuv nyeem Vajlugkub pab kuv ua tau siab tus thiab pab kuv xav ntsoov txog tej lus cog tseg yav tom hauv ntej dua li xav txog kuv tus mob. Kuv ris lawv txiaj ntsig uas lawv pab kuv paub Vajtswv vim kuv ib txwm nrhiav nws.