Phau Vajlugkub Puas Pab Tau Koj Thum Yeeb Tshuaj?

Txhua txhua xyoo, muaj tsheej plhom leej tuag yeeb vim yog txoj kev haus yeeb haus tshuaj thiab lwm yam tshuaj uas muaj yees. Thaum muaj tus kab mob COVID-19, tib neeg haj yam quav yeeb quav tshuaj coob zuj zus tuaj. Phau Vajlugkub pab tau coob tus thum tau yeeb tshuaj. Yog koj xav thum yeej pab tau koj thiab.a

Hauv zaj no peb yuav tham seb

• Phau Vajlugkub yuav pab tau peb thum yeeb tshuaj li cas?

• Plaub txoj kev pab tau koj thum yeeb tshuaj?

• Cov nqe Vajlugkub uas pab tau koj thum yeeb tshuaj?

• Cov qauv uas phau Vajlugkub pab tau lawv thum yeeb tshuaj?

• Phau Vajlugkub puas txwv cov tshuaj siv los thum yeeb?

• Phau Vajlugkub puas txwv tsis pub peb siv tej yeeb tshuaj los kho mob?

Phau Vajlugkub yuav pab tau peb thum yeeb tshuaj li cas?

Cov tshawb fawb coob tus tshawb pom tias tib neeg quav yeeb quav tshuaj los twb vim yog lawv nyob ib leeg kho siab khuav, muaj kev nyuaj siab ntxhov plawv, thiab muaj kev txhawj xeeb. Tiam sis phau Vajlugkub yuav pab tau koj muaj kev ntseeg. Txoj kev ntseeg ntawd yuav pab tau koj thev taus koj teeb meem ces koj yuav tsis mus kov yeeb kov tshuaj. Phau Vajlugkub tseem pab tau koj muaj ib txoj kev sib raug zoo nrog Vajtswv. (Phau Ntawv Nkauj 25:14) Txawm koj tej teeb meem loj npaum li cas los Vajtswv yeej pab tau koj daws tej teeb meem ntawd.​—Malakaus 11:22-24.

Plaub txoj kev pab tau koj thum yeeb tshuaj?

1. 1. Paub Vajtswv Yehauvas.b (Yauhas 17:3) Nws yog tus tswv tsim ib puas tsav yam thiab muaj hwj chim loj kawg nkaus. Tsis tas li ntawd xwb, nws yog ib leej txiv uas hlub koj heev. Nws xav nrog koj sib raug zoo thiab nws xav siv nws lub hwj chim los pab koj. (Yaxaxas 40:29-31; Yakaunpaus 4:8) Yog koj los paub nws thiab mloog nws lus nws cog lus tias yav tom hauv ntej koj yuav tau ib lub neej zoo kawg nkaus.​—Yelemis 29:11; Yauhas 3:16.

2. 2. Thov Yehauvas pab. Thov Vajtswv kom nws pab koj thum tau tej yeeb tshuaj koj thiaj ua tau ib tug “neeg daws huv thiab haum Vajtswv siab.” (Loos 12:1) Vajtswv yuav pub nws lub hwj huam rau koj kom tsav tau koj lub zog. (2 Kauleethaus 4:7; Lukas 11:13) Lub zog no yuav pab koj thum tau yeeb tshuaj thiab ua tau ib tug neeg tshiab raws li Vajtswv pom zoo.​—Kaulauxais 3:9, 10.

3. 3. Xav li Vajtswv xav. (Yaxayas 55:9) Vajtswv yuav pab koj “hloov dua siab tshiab” los sis hloov koj txoj kev xav thiaj pab koj thum tau yeeb tshuaj. (Efexus 4:23) Vajtswv yog tus tshoov neeg sau phau Vajlugkub, yog li ntawd tseem ceeb rau koj nyeem Vajlugkub txhua txhua hnub. (Phau Ntawv Nkauj 1:1-3) Muaj coob tus tau kawm thiab to taub tej uas phau Vajlugkub qhia yeej pab tau lawv heev. (Tes Haujlwm 8:30, 31) Yehauvas Cov Tim Khawv qhia Vajlugkub pub dawb rau txhua leej txhua tus. Peb kuj xav caw koj tuaj koom peb tej kev sib txoos thiab, nyob hauv peb tej kev sib txoos peb yuav kawm txog tej uas phau Vajlugkub qhia thiab seb peb yuav muab tej ntawd coj los siv hauv peb lub neej li cas.

4. 4. Xaiv phooj xaiv ywg zoo. Koj cov phooj ywg yuav pab tau koj ua qhov zoo los sis qhov phem, yog koj yuav thum yeeb tshuaj, ces koj yuav tsum muaj cov phooj ywg zoo thiaj pab tau koj. (Pajlug 13:20) Cov pe hawm Vajtswv yog ib co zoo phooj ywg, yog koj nrog lawv ua phooj ua ywg yuav pab tau koj heev. (Phau Ntawv Nkauj 119:63; Loos 1:12) Tsis tas li ntawd xwb, koj yuav tsum ua tib zoo xaiv tej uas koj saib, tej uas koj mloog, thiab tej uas koj nyeem. Thiab zoo rau koj zam txhua yam uas yuav rub tau koj mus ua qhov phem.​—Phau Ntawv Nkauj 101:3; Amaus 5:14.

Cov nqe Vajlugkub uas pab tau koj thum yeeb tshuaj

Filipis 4:13: “Kuv thev taus tej no tib si vim Vajtswv pub dag pub zog rau kuv.”

Pharhixias (Patrizia) uas nyob teb chaws Ithali hais tias: “Kuv yeej tsis muaj peev xwm thum tau yeeb tshuaj li kuv thiaj thov Vajtswv pab kuv nws thiaj pab kuv thum tau lawm tiag.”

Cov qauv uas phau Vajlugkub pab tau lawv thum yeeb tshuaj?

Yauxej Eelinpontsees (Joseph Ehrenbogen) loj hlob hauv ib tsev neeg uas tsiv tsaim heev, thiab quav dej quav cawv, haus luam yeeb, haus xas, thiab haus yeeb dawb. Muaj ntau zaus nws yuav luag tuag vim haus ntau dhau lawm, tiam sis muaj ib nqe Vajlugkub pab tau nws hloov tau nws lub neej. Mus nyeem txog nws lub neej hauv zaj “Kuv Paub Hwm Poj Niam Thiab Saib Taus Kuv Tus Nkeej” (‘I Learned to Respect Women and Myself’) ua lus Askiv.

Yav tas los Dimirhis Khosunov (Dmitry Korshunov) yog ib tus uas nyiam haus cawv heev. Nws ua tiag thum ntau zaus nws thiaj thum tau. Mus saib zaj yeeb yaj kiab “Dhuav Kuv Lub Neej Dhau Lawm” seb dab tsi ho pab tau nws thum tau cawv lawm.

Phau Vajlugkub puas txwv cov tshuaj siv los thum yeeb?

Tsis txwv. Phau Vajlugkub hais tias: “Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.” (Mathais 9:12) Lub koom haum tshuaj xyuas kev haus yeeb haus tshuaj hauv teb chaws U.S. hais tias: “Kev quav yeeb quav tshuaj zoo li tus mob uas nyuaj kho, qhov uas koj xav thum xwb yeej nyuaj thum yuav tsum muaj lwm yam pab thiab thiaj li thum tau.” Yog muaj Vajtswv pab ces koj yeej yuav thum tau. Txawm phau Vajlugkub tej lus qhia pab tau coob tus thum tau tej yeeb tshuaj los lawv kuj cheem tsum mus cuag tej kws kho mob pab thiab.c Ib tus txiv neej hu ua Alees (Allen) hais tias: “Thaum kuv tseg tsis haus cawv lawm ua rau kuv ib ce mob taug leeg cuag li nab thos, thaum ntawd kuv mam paub tias kuv cheem tsum tej kwv kho mob pab thiab tsis yog phau Vajlugkub tej lus qhia xwb.”

Phau Vajlugkub puas txwv tsis pub peb siv tej yeeb tshuaj los kho mob?

Phau Vajlugkub tsis txwv. Hauv phau Vajlugkub yeej hais txog ib txhia uas muab cawv los kho mob los sis pab cov uas mob hnyav heev kom thev taus. (Pajlug 31:6; 1Timautes 5:23) Txawm li ntawd los, zoo ib yam li dej cawv yog koj haus ntau koj yuav quav, tej yeej tshuaj uas koj siv los kho mob kuj yuav ua rau koj quav tau thiab. Yog li ntawd, cia li ceev faj cov tshuaj no es tsis txhob lam tau lam siv tsam ua rau koj quav.​—Pajlug 22:3.