Cov Neeg Tshawb Txuj Ci Muab Lub Moo Hnub Ntiaj Teb Kawg Txav Ze Rau Ib Tag Hmo—Phau Vajlugkub Hais Li Cas Txog Qhov Nod?

Lub 1 Hlis tim 24, 2023, cov neeg tshawb txuj ci muab tus tes ntawm lub moo hnub ntiaj teb kawga (Doomsday Clock) uas ua piv txwv qhia txog lub sij hawm uas lub ntiaj teb yuav kawg txav ze zog rau 12 teev ib tag hmo.

• “‘Lub moo hnub ntiaj teb kawg’ yog lub moo uas ua piv txwv qhia txog hnub uas tib neeg yuav rov ua rau lawv raug kev puas tsuaj. Vim muaj ntau yam kev kub ntxhov hauv ntiaj teb no, xws li muaj tsov rog nyob teb chaws Yus Khees (Ukraine), muaj kev txhawj xeeb txog tsov rog nus qhias (nuclear), thiab tej huab cua phem niaj hnub no ces lub 1 Hlis tim 24, 2023 no lawv thiaj muab lub moo txav ze heev rau ib tag hmo.”—AFP International Text Wire.

• “Cov neeg tshawb txuj ci hais tias lub 1 Hlis tim 24, 2023 no yog zaum uas lawv muab lub moo hnub ntiaj teb kawg txav rau 90 chib ua ntej ib tag hmo. Zaum no yog zaum uas qhia tias tib neeg nyob ze tshaj plaws rau Amankedoos.”—ABC News.

• “Ib pab neeg tshawb txuj ci uas sawv cev ntawm ntau lub teb chaws ceeb toom tias ntxim li niaj hnub no tib neeg yuav rov ua rau lawv raug kev puas tsuaj ntau tshaj li yav tas los.”—The Guardian.

Puas yog peb twb nyob ze ze rau lub sij hawm uas tib neeg thiab lub ntiaj teb yuav raug kev puas tsuaj? Puas tsim nyog peb ntshai thiab txhawj txog tej uas yuav muaj tshwm sim los yav tom hauv ntej? Phau Vajlugkub hais li cas txog tej no?

Yav tom hauv ntej yuav zoo li cas

Phau Vajlugkub hais tias, ‘lub ntiaj teb nyob ruaj mus ib txhis’ thiab yuav muaj neeg “nyob rau hauv mus ib txhis.” (Laj Lim Tswvyim 1:4; Phau Ntawv Nkauj 37:29) Yog li ntawd, tib neeg yuav ua tsis tau kom lub ntiaj teb no puas tsuaj tag los sis ua kom tej uas muaj sia nyob tsis taus rau hauv.

Txawm li los phau Vajlugkub yeej hais txog hnub uas lub ntiaj teb yuav kawg. Xws li phau Vajlugkub hais tias ‘lub ntiaj teb yuav dua mus.’—1 Yauhas 2:17.

• Yog koj xav paub seb qhov uas phau Vajlugkub hais txog lub ntiaj teb yuav dua mus, yog hais txog dab tsi tiag ces mus nyeem zaj lus Askiv “Puas Yog Lub Ntiaj Teb Yuav Kawg? Phau Vajlugkub Hais Li Cas Txog Lub Ntiaj Teb Kawg?”

• Yog koj xav paub seb phau Vajlugkub qhia tias yav tom hauv ntej yuav muaj dab tsi tshwm sim rau lub sij hawm twg ces mus nyeem zaj lus Askiv “Thaum Twg Lub Ntiaj Teb Mam Li Kawg?”

Xav txog qhov zoo xwb

Txawm hais tias lub ntiaj teb no yuav muaj kev kub ntxhov thiab muaj teeb meem npaum li cas los phau Vajlugkub yuav pab kom peb tsis txhob txhawj thiab xav txog qhov zoo xwb. Phau Vajlugkub yuav ua li cas pab tau peb li ntawd?

• Phau Vajlugkub muaj tej tswv yim uas peb siv tau los pab peb lub neej. (2 Timautes 3:16, 17) Xws li zaj “Yuav Ua Li Cas Koj Thiaj Tsis Txhawj Dhau” ua lus Askiv yuav pab kom peb tsis txhob txhawj txhawj thiab tsis tag kev cia siab rau yav tom hauv ntej txawm hais tias peb lub neej yeej tsis yooj yim.

• Phau Vajlugkub pab kom peb muaj kev vam kev cia siab rau yav tom hauv ntej. (Loos 15:4) Phau Vajlugkub qhia tseeb tias niaj hnub no yuav muaj dab tsi thiab yav tom hauv ntej yuav zoo li cas, peb thiaj tsis txhawj thiab tsis ntshai txawm hais tias yuav muaj kev kub ntxhov thoob ntiaj teb.

Yuav kom koj to taub phau Vajlugkub zoo, peb xav caw koj los kawm Vajlugkub nrog peb dawb dawb xwb. Yog li cia ib tug tuaj qhia koj hnub no.