Puas Yog Tias Amankedoos Yuav Pib Hauv Teb Chaws Ixayees?—Phau Vajlugkub Hais Li Cas?

Phau Vajlugkub qhia tias Amankedoos tsis yog ib ntsuj rog muaj tshwm sim rau ib cheeb tsam xwb, tiam sis yog ib ntsuj rog uas tag nrho tej nom tej tswv thoob qab ntuj sawv tawm tsam Vajtswv.

• ‘Cov ntsuj plig ntawd cov dab uas ua tau tej txuj ci loj uas xav tsis thoob. Peb tug ntsuj plig ntawd mus cuag txhua tus vaj ntxwv uas nyob hauv ntiaj teb no thiab coj lawv tuaj ua ke ua rog rau hnub tseem ceeb uas Vajtswv tus uas muaj hwj chim loj kawg nkaus teem cia lawm. Tom qab ntawd peb tug dab txawm coj cov vaj ntxwv tuaj nyob ua ke ntawm ib qhov chaw uas lus Henplais hu ua Amankedoos.’​—Tshwmsim 16:14, 16.

Lo lus “Amankedoos” yog los ntawm lo lus Henplais Har Meghid·dohnʹ, uas txhais tias “Lub Roob Menkidaus.” Puag thaum ub Menkidaus yog ib lub nroog uas nyob rau ib cheeb tsam hauv teb chaws Ixayees. Vim li ntawd, ib txhia tib neeg thiaj xav tias yuav muaj ntsuj rog Amankedoos nyob hauv teb chaws Ixayees. Tiam sis, cheeb tsam hauv Menkidaus los sis tej thaj chaw uas nyob hauv cov teb chaws uas nyob ib ncig lub teb chaws Ixayees tsis loj thiab tsis dav txaus rau “txhua tus vaj ntxwv uas nyob hauv ntiaj teb no” thiab lawv cov tub rog tuaj ua rog.

Cov lus hais hauv phau Tshwmsim uas nyob hauv phau Vajlugkub, yog siv tej lus piv txwv los sau. (Tshwmsim 1:1) Yog li, Amankedoos tsis yog hais txog ib thaj chaw tiag tiag, tiam sis yog hais txog thaum tag nrho tej nom tswv thoob ntiaj teb tuaj sib sau ua ke tawm tsam Vajtswv thiab nws txoj kev kav ua zaum kawg.​—Tshwmsim 19:11-16, 19-21.