Leej Twg Yuav Cawm Cov Pej Xeem?—Phau Vajlugkub Hais Li Cas?

Lub koom haum ntiaj teb UN (United Nations) qhia tias:

• Suav txij lub 10 Hli tim 7 mus txog lub 10 Hli tim 23, xyoo 2023, kev sib ntaus sib tua hauv lub nroog Kaxas thiab teb chaws Ixayees ua rau muaj kev phom sij loj heev. Muaj ntau tshaj li 6,400 tus neeg tau tas sim neej hos muaj ntau tshaj li 15,200 tus tib neeg raug mob, cov neeg no feem ntau yog tej pej xeem xwb. Ntxiv ntawd, muaj txhiab txhiab tus raug khiav mus nyob lwm qhov.

• Txij thaum lub 9 Hlis tim 24, xyoo 2023, qhov uas Lav Xias (Russia) thiab Yus Khees (Ukraine) sib tua, muaj txog li 9,701 tus pej xeem raug tua tuag thiab muaj txog li 17,748 tus tib neeg raug mob nyob hauv teb chaws Yus Khees.

Phau Vajlugkub muaj kev cia siab li cas rau cov uas raug kev txom nyem vim kev tsov kev rog?

Muaj kev cia siab

Phau Vajlugkub qhia tseg lawm tias Vajtswv yuav ‘ua rau tej kev tsov kev rog hauv ntiaj teb no tiaj tus.’ (Phau Ntawv Nkauj 46:9) Vajtswv yuav siv nws lub tseem fwv saum ntuj ceeb tsheej los sis nws lub nceeg vaj los hloov tag nrho tej kev nom kev tswv hauv ntiaj teb. (Daniyees 2:44) Vajtswv txoj kev kav yuav daws tau tag nrho tib neeg tej teeb meem thiab txhua tus yuav nyob kaj siab lug.

Kawm seb Yexus Khetos uas yog tus Vaj Ntxwv ntawm Vajtswv lub Nceeg Vaj yuav ua li cas:

• ‘Nws cawm cov neeg pluag, thiab cov neeg txom nyem uas tsis muaj leej twg pab. Nws hlub tshua cov uas qaug zog thiab cov pluag, nws cawm cov neeg txom nyem txoj sia. Nws cawm lawv dim ntawm cov neeg tsim txom thiab cov neeg lim hiam.’—Phau Ntawv Nkauj 72:​12-14.

Vajtswv txoj kev kav yuav rhuav tshem txhua yam kev nyuaj siab ntxhov plawv uas tib neeg raug vim kev ua nruj ua tsiv thiab kev ua tsov ua rog.

• ‘Nws yuav so lawv tej kua muag huv tib si mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawv daws ib txwm muaj los twb ploj tas lawm.’—Tshwmsim 21:4.

Tshuav tsis ntev lawm xwb Vajtswv lub Nceeg Vaj yuav los kho tej teeb meem hauv ntiaj teb no. Phau Vajlugkub twb qhia tseg lawm tias, peb “yuav hnov suab ntaj suab riam thiab yuav hnov txog kev tsov kev rog” li peb pom thiab hnov niaj hnub no. (Mathais 24:6) Tej xwm no thiab lwm yam xwm txheej qhia tias peb nyob rau “tiam kawg” uas tib neeg kav lawm.—2 Timautes 3:1.