Yehauvas Cov Tim Khawv Puas Tau Hloov Phau Vajlugkub Kom Haum Lawv Txoj Kev Ntseeg?
Yehauvas Cov Tim Khawv tsis tau hloov phau Vajlugkub. Lawv tsuas hloov lawv txoj kev ntseeg kom mus raws li phau Vajlugkub qhia xwb.
Yehauvas Cov Tim Khawv siv sij hawm ntev loo los tshawb nrhiav phau Vajlugkub ua ntej yuav muab phau Vajtswv Txoj Lus Rau Cov Nyob Lub Qab Ntuj Tshiab luam tawm rau xyoo 1950. Lawv kuj muab ntau phau Vajlugkub coj los sib piv kom lawv thiaj ruaj siab tias tej uas lawv ntseeg ntawd yeej mus raws li phau Vajlugkub qhia tiag. Cia peb mus saib qee yam uas qhia tias Yehauvas Cov Tim Khawv tsis tau muab Vajtswv txoj lus hloov.
Yehauvas Cov Tim Khawv ntseeg tias Vajtswv tsis yog Vaj Peb Leeg. Phau Tsom Faj lub 7 Hli xyoo 1882 hais tias, “Cov uas nyeem peb tej ntaub ntawv yeej paub tias peb ntseeg Yehauvas, Yexus thiab lub hwj huam dawb huv. Peb tsis ntseeg tias Vajtswv muaj peb tug uas koom hauv ib lub cev los sis txawj faib ua peb leeg. Tos peb tsis ntseeg li ntawd los vim phau Vajlugkub tsis tau qhia li ntawd.”
Phau Vajlugkub qhia tias: ‘[Yehauvas] tib leeg xwb thiaj yog peb tus Vajtswv.’ (2 Kevcai 6:4) “Tiam sis peb ntseeg tias tsuas muaj tib tug Vajtswv uas yog peb Leej Txiv xwb. Nws yog tus tsim ib puas tsav yam, thiab tsim peb los ua nws tug. Thiab tsuas muaj tib tug Tswv uas yog Yexus Khetos xwb. Vajtswv kom nws tsim ib puas tsav yam thiab twb yog muaj nws peb thiaj muaj txoj sia nyob.” (1 Kauleethaus 8:6) Yexus kiag los nws kuj hais tias: “Leej Txiv muaj hwj chim loj dua kuv.”—Yauhas 14:28.
Yehauvas Cov Tim Khawv ntseeg tias tsis muaj ntuj tawg uas tsim txom neeg mus ib txhis. Phau Tsom Faj lub 6 Hli xyoo 1882, ntawm lub ntsiab “Tus Nqi Uas Them Lub Txim Txhaum Yog Kev Tuag.” Lub ntsiab no rho los ntawm Loos 6:23 phau King James Version ua lus Askiv. Nyob rau hauv zaj kawm no muaj ib kab lus hais tias, “Lub ntsiab ntawm zaj kawm no hais tau meej thiab yooj yim to taub. Txawm li ntawd los, tej kev ntseeg haj tseem tsis ntseeg thiab, tiam sis hos mus ntseeg tej uas qhia tsis tseeb txog phau Vajlugkub. Tsis tas li ntawd, lawv tseem muab Vajtswv txoj lus ntxeev hais tias Vajtswv yuav muab neeg tsim txom hauv ntuj tawg mus ib txhis.”
Phau Vajlugkub qhia tias: “Tus twg ua txhaum, tus ntawd tuag xwb.” (Exekees 18:4, 20) Cov neeg uas tawm tsam Vajtswv thaum kawg “yuav raug puas tsuaj mus ib txhis.”—2 Thexalaunikes1:9.
Yehauvas Cov Tim Khawv ntseeg tias Vajtswv lub Nceeg Vaj yog ib nroog nom tswv saum ntuj tiag tiag, tsis yog nyob hauv tib neeg lub siab xwb. Phau Tsom Faj lub 12 Hlis xyoo 1881 piav txog lub Nceeg Vaj no tias: “Thaum Vajtswv lub Nceeg Vaj pib kav, cov nom tswv los sis tib neeg txoj kev kav hauv ntiaj teb no yuav raug rhuav tshem mus.”
Phau Vajlugkub qhia tias: “Lub sijhawm uas cov nomtswv ntawd tseem kav tebchaws, Vajtswv Ntuj yuav tsa ib lub tebchaws uas yuav nyob mus li ibtxhis. Lub tebchaws ntawd yuav tsis muaj leejtwg kovyeej nws; nws yuav rhuav tagnrho tej tebchaws ntawd kom puastsuaj huvsi mus, tiamsis nws yuav nyob mus li ibtxhis.”—Daniyees 2:44.
Puas yog Yehauvas Cov Tim Khawv tsuas siv phau Vajtswv Txoj Lus Rau Cov Nyob Lub Qab Ntuj Tshiab los piav txog lawv txoj kev ntseeg xwb?
Tsis yog, thaum Yehauvas Cov Tim Khawv mus qhia Vajlugkub pub dawb rau ib lub tsev rau ib lub lawv yeej siv lwm phau Vajlugkub los qhia thiab. Thaum cov Tim Khawv kawm Vajlugkub nrog ib tug twg txawm lawv siv phau Vajtswv Txoj Lus Rau Cov Nyob Lub Qab Ntuj Tshiab los qhia nws xwb los, lawv yeej txaus siab hlo cia nws siv lwm phau Vajlugkub li nws pom zoo thiab.