KEV PAB RAU COV HLUAS
Kuv Yuav Xaiv Ib Tug Los Ua Qauv Tau Li Cas?
Heli (Haley) hais tias, “Thaum kuv ntsib teeb meem tom tsev kawm ntawv, kuv xav txog tus neeg kuv hwm thiab saib taus. Nws kuj txeev ntsib teeb meem ib yam li kuv thiab. Ces kuv xyaum ua li nws, qhov no yeej pab tau kuv lawm ntau.”
Yog koj muaj ib tug ua qauv rau koj, nws yuav pab tau koj zam dhau teeb meem. Nws kuj yuav txhawb kom koj ncav cuag koj lub hom phiaj. Tiam sis koj yuav tsum xaiv tus uas tso tau ib tug qauv zoo rau koj xyaum.
Vim li cas koj yuav tau ua zoo xaiv?
Koj pom nws ua li cas, koj yuav ua raws li nws.
Phau Vajlugkub qhia kom cov Khixatias xyaum cov uas muaj tus yam ntxwv zoo. Phau Vajlugkub hais li no tias, ‘Ua tib zoo xav seb lawv ua lawv lub neej mus txog thaum xaus yog zoo li cas, nej yuav tsum xyaum coj li lawv txoj kev ntseeg.’—Henplais 13:7.
Sim ua li no: Nco ntsoov tias tus koj xyaum yuav rub tau koj mus ua zoo los sis ua phem. Yog li, txhob maj xaiv tus uas muaj suab npe los sis muaj hnub nyoog li koj los ua qauv xyaum. Tiam sis xaiv tus uas coj zoo.
Khauli (Colin) hais tias, “Kuv kawm tau ntau yam los ntawm ib tug Khixatias hu ua Adas. Nws txawj xav thiab coj tau zoo kawg. Kuv tseem nco tau nws tej lus thiab tej uas nws ua tib si. Nws twb tsis paub tias tej nws hais thiab ua pab tau kuv lub neej npaum li cas.”
Koj txoj kev xav yuav hloov raws li tus qauv koj xyaum.
Phau Vajlugkub hais tias, “Tsis txhob xav yuam kev. Yog yus poo tej neeg phem yuav rhuav tau yus tes hauj lwm zoo.”—1 Kauleethaus 15:33.
Sim ua li no: Tsis txhob xyaum coj li ib tug vim nws zoo nkauj zoo nraug xwb, ib tsam ces nws ho ua ib yam uas ua rau koj tu siab.
Thamala (Tamara) hais tias, “Yog koj pheej muab koj tus kheej piv rau tus uas zoo nkauj zoo nraug xwb, ces koj yuav saib koj tus kheej nqi nqi. Tsis tas li ntawd, koj yuav xav txog txoj kev zoo nkauj nkaus xwb.”
Sim xav seb: Yuav muaj li cas yog hais tias koj xaiv cov muaj suab npe los ua qauv xyaum?
Yog koj xyaum tus uas muaj hom phiaj li koj, yuav pab tau koj ncav cuag koj lub hom phiaj.
Phau Vajlugkub hais tias, ‘Nrog cov neeg txawj ntse, koj thiaj yuav txawj ntse.’—Pajlug 13:20.
Sim ua li no: Xaiv cov neeg uas muaj tus yam ntxwv uas koj xav xyaum. Ua li no, koj thiaj pom tias koj yuav tsum ua li cas koj thiaj ncav cuag koj lub hom phiaj.
Milias (Miriam) hais tias, “Muab piv xam tias koj muaj hom phiaj kom koj ua tau ib tug neeg nquag. Yog muaj ib tug qauv zoo rau koj xyaum, koj yuav pom hais tias nws tau ua li cas es nws thiaj li nquag heev. Xws li txhua zaus nws tuaj ncav sij hawm los sis koj pom tias nws rau siab ua hauj lwm.”
Lub ntsiab lus: Yog koj xaiv ib tug qauv zoo los xyaum, yuav pab tau koj pom seb koj xav coj koj lub neej zoo li cas.
Koj yuav ncav cuag koj lub hom phiaj tau sai yog tias koj xyaum ib tug uas koj saib taus uas coj koj txoj hau kev!
Koj yuav xaiv tus qauv twg los xyaum?
Muaj ob yam uas koj ua tau.
Xaiv tus yam ntxwv uas koj xav xyaum ua ntej. Ces mam xaiv tus neeg uas koj nyiam thiab saib taus uas muaj tus yam ntxwv ntawd.
Los sis xaiv tus uas koj nyiam thiab saib taus ua ntej ces mam xaiv seb koj xav xyaum nws tus yam ntxwv twg.
Muaj ib daim qauv nrog rau zaj kawm no uas yuav pab tau koj ua tau li ntawd.
Koj xaiv tau leej twg los ua qauv xyaum?
Tus phooj ywg zoo. Milias hais tias, “Kuv tus phooj ywg yog tus uas kuv xav xyaum tshaj plaws. Tsis muaj ib zaug uas nws hais tias nws tsis xyeej li thiab nws mas hmov tshua txog lwm tus kawg li. Txawm nws yau dua kuv los nws muaj ntau tus yam ntxwv zoo uas kuv tsis muaj. Twb yog vim li ntawd kuv thiaj xav xyaum nws.”
Cov laus. Kuj yog koj niam koj txiv los sis cov uas nrog koj koom tib txoj kev ntseeg. Anes (Annette) hais tias, “Kuv niam kuv txiv yog ob tug qauv uas zoo tshaj plaws rau kuv. Nkawd yeej ua tau tej yam yuam kev thiab, tiam sis nkawd tuav rawv nkawd txoj kev ntseeg khov kho. Thaum kuv laus li nkawd lawm, kuv xav kom lwm tus xam pom tias kuv kuj muaj kev ntseeg khov kho ib yam li nkawd thiab.”
Cov neeg hauv phau Vajlugkub. Maleedas (Melinda) hais tias, “Kuv xaiv ib txhia hauv phau Vajlugkub los ua qauv rau kuv. Xws li, Timautes, Luv, Yauj, Petus, thiab tus me ntxhais Ixayees. Kuv xaiv lawv vim lawv nyias muaj nyias ib qho zoo. Kuv yim kawm txog lawv ces kuv yim paub lawv zoo. Thaum kuv nyeem phau Xyaum Lawv Txoj Kev Ntseeg, thiab cov neeg ntawm lub ntsiab ‘Xyaum Cov Qauv No’ hauv phau ntawv Kev Pab Rau Cov Hluas mas kuj lom zem heev.”
Sim ua li no: Txhob xaiv ib tug los ua qauv xyaum xwb. Povlauj hais rau cov Khixatias tias, “Yoog raws li cov uas twb xyaum tau peb tus qauv lawd.”—Filipis 3:17.
Koj puas paub? Koj kuj ua tau ib tug qauv zoo rau lwm tus xyaum thiab! Phau Vajlugkub hais tias, “Cia tej uas koj hais, koj tes hauj lwm, koj txoj kev hlub, koj txoj kev ntseeg, thiab qhov uas koj ua neeg dawb huv, ua qauv zoo rau cov uas muab siab npuab Vajtswv xyaum.”—1 Timautes 4:12.
Kiab hais tias, “Lub sij hawm uas koj tab tom xyaum tej yam ntxwv zoo, koj kuj pab tau kom lwm tus ua tau neeg zoo thiab. Tej zaum ib txhia twb saib ntsoov koj thiab tej zaum lawv kuj muab koj tej lus khaws cia.”