Ua Li Cas Peb Thiaj Tau Phau Vajlugkub

Phau Vajlugkub twb sau tiav 1,900 xyoo dhau los lawm. Kuj tau muab sau rau tej yam uas txawj lwj txawj puas tsuaj mus, xws li tej ntawv tauj deg thiab tej tawv tsiaj. Cov lus hauv phau Vajlugkub tau muab sau ua yam lus qub qub uas tsis muaj neeg paub hais lawm. Dua ntawd, tseem muaj tej tib neeg uas muaj hwj chim, tej vaj ntxwv, thiab tej thawj coj ntawm tej kev ntseeg uas xav muab phau Vajlugkub ua kom puas tsuaj mus. Txawm li los, phau Vajlugkub tseem nyob los txog niaj hnub nim no.

UA cas phau Vajlugkub ho nyob tau ntev ua luaj thiab yog ib phau ntawv uas nto npe heev? Cia peb mus tham txog ob yam no.

Tau Muab Phau Vajlugkub Theej

Cov Ixayees uas saib xyuas cov tseem kauj ntawv Vajlugkub qub qub thaum ub tau muab theej tawm ua ntau phau. Txawm Ixayees cov vaj ntxwv los nyias yuav tau theej ib phau rau nyias tus kheej.​—2 Kevcai 17:18.

Cov Ixayees yeej paub tias phau Vajlugkub yog Vajtswv Txoj Lus ces lawv yeej nyiam nyeem heev. Yog li thaum theej phau Vajlugkub, yuav tsum yog tus neeg uas txawj theej thiaj li theej tau. Yav thaum ub muaj ib tug txiv neej hu ua Exalas uas paub Mauxes txoj kev cai zoo. Nws yog ib tug txawj txawj theej ntawv heev. (Exalas 7:6) Tsis tas li ntawd, xyoo 500 mus txog xyoo 900 tom qab Yexus yug, muaj ib pab Yudais uas theej phau Vajlugkub Henplais los sis phau Vajlugkub qub. Thaum lawv theej lawv ua tib zoo suav ib tug npe ntawv zuj zus kom tsis txhob sau yuam kev hlo li. Qhov uas lawv ua tib zoo saib thiab theej li no, thiaj li theej raug lub ntsiab thiab phau Vajlugkub thiaj li nyob los txog niaj hnub no. Txawm yuav muaj neeg xav muab ua kom puas tsuaj mus los thiaj rhuav tsis tau.

Nyob rau xyoo 168 ua ntej Yexus yug, Xilia tus thawj coj hu ua Eethai-akhaw tus plaub (Antiochus IV) nhriav phau Vajlugkub qub Henplais thoob plaws lub teb chaws Palexatees yuav muab ua kom puas tsuaj mus. Cov Yudais li keeb kwm qhia tias: “Yog lawv nhriav tau ib kauj ntawv uas sau txog Vajtswv tej kev cai xwb ces lawv yeej muab dua kiag pov tseg los sis muab hlawv kiag.” Phau The Jewish Encyclopedia hais tias: “Yog cov tub ceev xwm nhriav tau ib tug twg muaj phau Vajlugkub xwb ces kom cia li muab tus ntawd tua pov tseg.” Txawm li ntawd los, cov Yudais uas nyob hauv Palexatees thiab nyob lwm lub teb chaws yeej tseem muaj cov thooj ntawv Vajlugkub uas twb tau muab theej tawm lawm.

Tsis ntev tom qab sau phau Vajlugkub tshiab Kilis tiav, txawm muaj neeg muab theej ua ntau phau heev. Thaum tus tub txib Yauhas sau txog Yexus lub neej mas nws sau nyob ze lub nroog Efexus. Tiam sis cov neeg txawj ntse hais tias lawv nrhiav tau tej co ntawv uas tib neeg tau theej tawm ntawm phau Yauhas, uas twb theej tsis tau muaj 50 xyoo, nyob deb tsheej puas mais hauv teb chaws Iyiv. Qhov uas lawv nrhiav tau cov ntawv no qhia tias, yeej muaj cov ntseeg Vajtswv nyob lwm lub teb chaws muaj cov ntawv Vajlugkub uas tau theej tawm ntawd.

Txawm li los, tseem tshuav ib co Vajlugkub uas tsis raug hlawv thiab tib neeg tau muab theej tawm ntxiv. Txawm tib neeg xav muab phau Vajlugkub ua kom puas tsuaj mus los, Vajtswv Txoj Lus tseem muaj nyob txog niaj hnub nim no. Muaj ib zaug nyob rau lub 2 hlis tim 23 xyoo 303 tom qab Yexus, Loos tus huab tais Dai-aukhiseem (Diocletian) txib nws cov tub rog mus tsoo tej tsev teev ntuj mus nrhiav phau Vajlugkub coj los hlawv. Hnub tom qab kiag xwb nws sam hwm thoob plaws lub teb chaws Loos kom cia li coj tag nrho cov Vajlugkub tuaj hlawv tab meeg sawv daws. Nws xav tias yog nws ua li no ces yuav tsis muaj neeg ntseeg Vajtswv lawm. Txawm li los, tseem tshuav ib co Vajlugkub uas tsis raug hlawv thiab tib neeg tau muab theej tawm ntxiv. Lawv tau muab phau Vajlugkub theej yuav luag tag ua lus Kilis, tau ob phau nyob los txog niaj hnub nim no. Ib phau nyob hauv teb chaws Loos hos ib phau nyob hauv teb chaws Askiv.

Txawm tsis muaj cov tseem tseem kauj ntawv Vajlugkub lawm los, tseem muaj ntau txhiab phau Vajlugkub qub qub uas siv tes theej tawm nyob txog niaj hnub nim no. Qhov uas lawv muab theej mus theej los lub ntsiab hauv phau Vajlugkub puas hloov? Tus xib hwb Viyees Nkees (William Green) qhia li no txog phau Vajlugkub qub Henplais. Nws hais tias, “Tsis muaj ib phau ntawv qub qub thaum ub uas yuav theej tau raug thiab tseeb npaum li phau Vajlugkub.” Hos hais txog phau Vajlugkub tshiab Kilis, tus xib hwb Xawm Feedawslem Kheenyeem (Sir Frederic Kenyon) tau hais tias, “Thaum sau kiag tau phau Vajlugkub tiav xwb twb muab theej tawm lawm, yeeb vim li no cov lus hauv phau Vajlugkub peb thiaj ntseeg tau tias yeej tseem raug lub ntsiab. Tiam sis lwm cov phau ntawv qub thaum ub peb tsis paub txog.”

Txhais Phau Vajlugkub

Ib qhov ntxiv uas ua rau phau Vajlugkub muaj nqis tshaj plaws lwm phau ntawv, yog qhov uas muab txhais ua ntau yam lus. Yeej muaj raws nkaus li Vajtswv tau hais tseg tias, txhua haiv neeg thiab txhua xeem yuav los kawm thiab paub txog nws ‘ntawm lub hwj huab dawb huv thiab qhov tseeb.’​—Yauhas 4:23, 24; Mikhas 4:2.

Thawj yam lus uas tau muab phau Vajlugkub qub Henplais txhais yog ua lus Kilis, phau no hu ua Xethuantsees (Septuagint). Tos muab txhais ua lus Kilis los vim lub sij hawm ntawd cov neeg Yudais uas nyob sab nraum lub nroog Palexatees tsuas paub hais lus Kilis xwb. Phau no tau muab txhais tiav 200 xyoo ua ntej Yexus los hauv ntiaj teb. Tsis tas li ntawd, ob peb puas xyoo tom qab no tau muab tag nrho phau Vajlugkub txhais ua ntau yam lus. Twb tsim nyog cov vaj ntxwv thiab cov txiv plig pab kom tib neeg tau phau Vajlugkub los nyeem, tiam sis lawv tsis ua li ntawd. Lawv tsis xav kom tib neeg paub txog Vajtswv Txoj Lus lawv thiaj tsis kam tib neeg muab phau Vajlugkub txhais ua yam lus uas neeg niaj hnub hais.

Txawm cov tshawj thiab cov nom tswv txwv tsis pub muab phau Vajlugkub txhais los, muaj tej tug txiv neej sem lawv txoj sia kom txhais tau phau Vajlugkub. Xws li tus txiv neej Viyees Theesdau (William Tyndale) uas yog thawj tug neeg Askiv, tau muab thawj tsib phau Vajlugkub qub Henplais txhais ua nws yam lus, uas muab hu uas Pheebthathus (Pentateuch). Txawm yuav muaj kev tawm tsam npaum li cas los, nws yog thawj thawj tug tib neeg uas muab phau Vajlugkub Henplais txhais ua lus Askiv thiab siv Yehauvas lub npe ua nws yam lus. Muaj ib tug xib hwb Xapee hu ua Khaxi-audaulaum des Lenam (Casiodoro de Reina) muab phau Vajlugkub txhais ua nws yam lus tiam sis cov Kav Tos Liv nhriav kev nrhw tawm tsam nws. Vim li no nws thiaj khiav mus rau teb chaws Askiv, Ntsaws Me Nis, Fab Kis, Xuvitxawlees thiab Nethawlee los sis Haulees kom nws thiaj txhais tau phau Vajlugkub tiav.a

Niaj hnub no tau muab phau Vajlugkub txhais ua ntau yam lus thiab tseem muab luam tawm qees. Phau Vajlugkub yog ib phau ntawv uas nyob los txog niaj hnub nim no thiab tib neeg paub coob tshaj plaws. Vim li no thiaj muaj raws li Petus cov lus uas hais tias, ‘Tej nroj tsuag tuag tshav qhuav, tej paj kuj zeeg, tiam sis Yehauvas tej lus yuav nyob ruaj mus ib txhis.’​—1 Petus 1:24, 25.

[Cov lus hauv qab taw qhia]

[Ntsiab me/​Duab]

KUV YUAV NYEEM PHAU VAJLUGKUB TWG?

Tau muab phau Vajlugkub txhais ua ntau ntau yam lus. Tej phau txhais ua cov lus qub qub uas tib neeg tsis siv lawm. Hos tej phau txhais ua cov lus yooj yim kom nyeem tau xwb tsis raug li lub ntsiab. Lwm phau txhais ib lo lus rau ib lo lus.

Phau Vajlugkub Askiv New World Translation of the Holy Scriptures yog luam tawm los ntawm Yehauvas Cov Tim Khawv. Lawv muaj ib pab neeg txhais phau Vajlugkub no, uas lawv siv cov tseem qub lus thaum ub los txhais. Tsis tas li ntawd, lawv kuj siv phau Vajlugkub no coj los txhais ua 60 yam lus. Thaum cov txhais lus txhais phau Vajlugkub, lawv ua tib zoo muab tej uas lawv txhais piv rau cov tseem qub lus. Thaum muaj tej ntsiab uas txhais tau raws li cov tseem qub lus, ces phau Vajlugkub Askiv New World Translation yeej txhais raws nkaus li ntawd. Niaj hnub no cov txhais phau Vajlugkub yeej txhais kom yooj yim rau tib neeg nyeem thiab to taub tib yam nkaus li yav thaum ub.

Muaj ib co neeg txawj ntse uas kawm txog ntau yam lus tau ua tib zoo tshuaj ntsuam txog tej Vajlugkub uas tau muab txhais, seb tib neeg txhais puas raug lub ntsiab los sis puas yog lawv txhais raws li lawv siab nyiam xwb. Ib tug ntawd yog Ntsexeem Daviv Bidoo (Jason David BeDuhn) uas yog ib tug xib hwb qhia ntawv qib siab txog kev ntseeg nyob hauv teb chaws Yunaithim Xatej (United States). Nyob rau xyoo 2003, nws sau tau ib phau ntawv txog qhov uas nws soj ntsuam cuaj phau Vajlugkub Askiv uas tib neeg nyiam nyeem tshaj.b Nws tshawb pom ib co nqe Vajlugkub uas cov tshawb fawb xav tias tej zaud cov txhais lus txhais tsis raug lub ntsiab. Yog thaum cov txhais lus “txhais raws li lawv xav xwb ces yuav cuam tshuam rau qhov uas txhais lus.” Thaum nws ua tib zoo kuaj, nws muab ib nqe Vajlugkub Kilis los piv rau ib nqe Askiv zuj zus. Nws ua tib zoo saib seb cov uas txhais lus puas hloov lus los sis txhais raws li lawv siab nyiam uas tsis raug lub ntsiab lawm. Nws tshawb pom li cas?

Bidoo hais tias feem coob tib neeg xav tias phau New World Translation (NW) txhais txawv ntawm lwm cov Vajlugkub. Rau qhov lawv xav tias cov uas txhais phau no tsuas txhais raws li lawv txoj kev ntseeg xwb. Tiam sis Bidoo hais ntxiv tias, “Qhov uas phau New World Translation hais txawv ces tsuas yog lawv txhais raws nkaus li lub ntsiab lus thiab txhais ze li ze tau rau cov tseem qub lus xwb.” Txawm Bidoo tsis xav raws li qee yam hauv phau New World Translation los, nws yeej pom tias phau no txhais tau raug lub ntsiab tshaj lwm phau. Nws tseem qhuas tias, “phau no txhais tau zoo kawg nkaus.”

Tus xib hwb Npeenyamees Kidaws (Benjamin Kedar) uas nyob hauv teb chaws Ixayees, kuj tau hais tib yam nkaus li no txog phau New World Translation thiab. Nyob rau xyoo 1989 nws hais li no, “Phau New World Translation txhais tau ncaj thiab raug lub ntsiab kom yooj yim to taub. Kuv tsis pom tias lawv txhais raws li lawv lub siab nyiam, thiab lawv yeej tsis lam tau lam txhais tej yam uas tsis muaj nyob hauv phau Vajlugkub.”

Ua zoo xav: ‘Kuv xav nyeem phau Vajlugkub zoo li cas? Puas yog kuv xav nyeem ib phau yooj yim xwb tsis raug lub ntsiab los xij? Los sis kuv xav nyeem ib phau Vajlugkub uas yeej hais raug kiag lub ntsiab thiab raws li tej tseem lus uas tau sau tseg?’ (2 Petus 1:20, 21) Nyob ntawm koj xav, seb koj xaiv nyeem phau twg.

[Cov lus hauv qab taw qhia]

[Duab]

Phau Vajlugkub “New World Translation of the Holy Scriptures” kuj tau muab txhais ua ntau yam lus

[Duab]

Cov kauj ntawv Vajlugkub qub Henplais uas muab theej tawm

[Duab]

Ib ntu ntawm Lukas 12:7, “. . . tsis txhob poob siab, nej tseem muaj nqis dua tej noog tsev huv si”

[Credit Line rau cov duab]

Foreground page: National Library of Russia, St. Petersburg; second and third: Bibelmuseum, Münster; background: © The Trustees of the Chester Beatty Library, Dublin