THAWJ ZAJ | PUAS YOG UA TXOG DAB TIAG?
Nyiam Saib Dab Sib Tua Heev!
‘Nimno tibneeg saib dab tuag tom neeg nqus ntshav dhuav tas lawm. Lawv xav saib cov neeg ntiab dab thiab cov raug dab lawm xwb.’—Phau The Wall Street Journal.
NIMNO coob tus nyiam saib tej yeeb yaj kiab, nyeem tej ntaub ntawv, thiab tua nkees ntsig txog dab heev. Vim li cas lawv thiaj nyiam ua luaj?
Ib tug uas tshawb fawb txog tibneeg tej kev coj noj coj ua, hu ua Claude Fischer hais tias, ‘Nimno cov hluas nyob hauv tebchaws U.S.A. ntseeg zuj zus tias muaj dab tiag. Yav tas los 10 feem pua ntseeg xwb, tiamsis nimno muaj txog 33 feem pua ntseeg tias muaj dab. . . . Tiam no ntseeg dua lawv niam lawv txiv tiam, lawv yeej lees hlo tias muaj dab, lawv ntseeg tias muaj xyw zov tsev, thiab saib hmoov heev dua.’
Coob tus thiaj xav saib tej yeeb yaj kiab ua txog neeg raug dab. Michael Calia sau hauv phau The Wall Street Journal tias, ‘Vim muaj tej zaj ua txog dab tuag tom neeg nqus ntshav, coob tus thiaj xav saib ntxiv. Tau ib ntus no, tibneeg txawm nyiam saib tej yeeb yaj kiab ua txog cov neeg raug dab lawm thiab.’
Kuj muaj lwm tus tshawb pom tias ‘yog suav cov tibneeg thoob ntiajteb, yuav luag ib nrab ntseeg tias muaj dab. Lawv sau tej ntaub ntawv ntsig txog dab ntau xwb.’ Nyob rau hauv tebchaws U.S.A. muaj 2 tug yawg hu ua Christopher Bader thiab Carson Mencken tshawb nrhiav ntxiv pom tias, ‘cov neeg Amelikas, 70 mus rau 80 feem pua ntseeg tias muaj dab.’
Thaum luag ua tej yeeb yaj kiab ua ntsig txog dab thiab lwm yam kev txuam nrog dab, puas yog ua kom lomzem xwb?