Koj rhawv kev zoo li cas rau koj cov menyuam taug?
RAU COV NIAM TXIV UAS MUAJ MENYUAM
8 Ua Qauv Zoo
YOG LI CAS?
Cov niam txiv yuav tsum coj raws li lawv qhia, lawv thiaj ua qauv zoo rau menyuam xyaum. Yog yus qhia kom lawv coj ncaj tiamsis lawv ho pom yus dag tias yus tsis nyob tsev vim tsis xav nrog lwm tus tham ces menyuam yuav xyaum dag thiab.
Nkaj Yias tau hais tias: “Coob tus hais li no, ‘Mloog kuv hais txhob xyaum coj li kuv.’ Tiamsis menyuam yeej ntsia ntsoov yus seb yus coj li cas, lawv yuav coj li ntawd. Yog peb tsis coj li peb hais lawv tseem yuav hais peb thiab.”
VAJLUGKUB TEJ HAUV PAUS NTSIAB LUS: “Yog li ntawd koj uas qhia lwm tus koj yuav tsis qhia koj tus kheej lov?”—Loos 2:21.
VIM LI CAS TSIM NYOG UA?
Tej menyuam yaus thiab cov tub ntxhais hluas kheev xyaum leejtwg heev dua? Tsis yog lawv tej phoojywg kwvluag tiamsis lawv xyaum lawv niam lawv txiv heev dua lwm leej lwm tus. Yog li ntawd, leejtwg yuav tsum yog tus xub qhia menyuam? Yog yus tus ua niam ua txiv ntag. Yog li ntawd, yus yuav tsum coj raws li yus qhia thiaj pab tau lawv.
Maiv Nyiaj tau hais tias: “Tej zaum yus qhia tas qhia thiab, yus xav tias xyov nws puas cuab pob ntseg mloog. Tiamsis menyuam yeej khaws tau txhua lo huvsi. Thaum yus tsis coj li yus hais, nws tseem tig los ntuas yus thiab.”
VAJLUGKUB TEJ HAUV PAUS NTSIAB LUS: Lub tswvyim los saum ntuj los “tsis ua txuj yog neeg zoo.”—Yas Kos [Yakaunpau] 3:17, NN.
KOJ YUAV UA LI CAS?
Tig los tshuaj yus tus kheej. Zoo rau cov niam txiv xav txog cov lus nug no: Kuv nyiam saib tej this vis zoo li cas? Kuv puas ua zoo rau kuv tus txij nkawm thiab kuv tej menyuam? Kuv ntaus phoojywg nrog cov neeg zoo li cas? Kuv puas txawj xav txog lwm tus? Ua tib zoo xav li no. Koj tus menyuam yeej yuav xyaum koj. Yog li ntawd, xav seb koj xav kom nws coj li cas xwb?
Hnub Ci tau hais tias: “Wb ob niam txiv tsis lam yuam kom wb cov menyuam ua tshaj li wb ua tau.”
Thov txim thaum ua yuam kev. Tej menyuam yeej paub tias lawv niam lawv txiv txawj ua yuam kev thiab. Yog li ntawd, thaum koj ua yuam kev txhob txaj muag thov txim ntawm koj tus txij nkawm thiab koj cov menyuam. Yog koj ua li ntawd ces qhia rau menyuam tias yuav tsum txo hwjchim thiab qhia qhov tseeb.
Npib tau hais tias: “Wb cov menyuam yuav tsum pom wb ib leeg thov txim ntawm ib leeg. Yog wb tsis ua li ntawd, lawv yuav xav tias tsis tas lees txim thaum lawv ua yuam kev.”
Vam Nruas tau hais tias: “Wb ob niam txiv yeej pab tau wb cov menyuam heev tshaj, rau qhov lawv niaj hnub pom wb. Wb tus qauv zoo ib yam li phau ntawv uas niaj hnub qhia lawv ua neej.”