YAM 6
Paub Qhov Zoo Qhov Phem
PAUB QHOV ZOO QHOV PHEM YOG LI CAS?
Tus neeg uas coj dawb huv yeej paub meej tias yam twg zoo yam twg phem. Nws tsis cia lwm tus muab yam phem ntxeev ua yam zoo, rau qhov nws cia tej kevcai dawb huv coj nws txoj hau kev. Txawm tsis muaj tus pom nws los nws yeej ua qhov zoo.
UA CAS TSIM NYOG PAUB QHOV ZOO QHOV PHEM?
Thaum menyuam mus kawm ntawv, mloog nkauj, saib yeeb yaj kiab, thiab saib this vis, lawv hnov ntau lub tswvyim dag tias yam twg zoo yam twg phem. Tej no yuav ua rau lawv xav tias xyov qhov zoo qhov phem uas lawv niam lawv txiv qhia puas muaj tseeb tiag.
Cov uas nyuam qhuav tiav hluas yog cov uas yuav tau ceev faj. Ib phau ntawv uas qhia txog cov hluas hais tias cov hluas “tej npoj yuav txw kom lawv coj li lwm tus luag thiaj nyiam lawv. Txawm lawv cov phoojywg coj li cas los xij, lawv yuav tsum paub qhov zoo qhov phem lawv thiaj ua qhov yog.” (Beyond the Big Talk) Yog li ntawd, ua ntej ib tug menyuam tiav hluas tsim nyog niam txiv twb qhia tej no rau nws lawm.
YUAV QHIA KOM PAUB QHOV ZOO QHOV PHEM LI CAS?
Qhia meej tias qhov twg zoo qhov twg phem.
VAJLUGKUB TEJ HAUV PAUS NTSIAB LUS: “Cov uas hlob lawd . . . twb xyaum kawm lawm thiaj txawj cais tias yam twg zoo yam twg phem.”—Henplais 5:14.
Menyuam yuav tsum txawj piav tias yam twg zoo yam twg phem. Thaum koj tus menyuam xav ua ib yam dabtsi piav li no: “Ua li ko ncaj; ua li no tsis ncaj lawm.” “Ua li ko qhia tias koj npuab siab rau nws; ua li no ces ntxeev siab lawm.” “Ua li ko thiaj siab zoo; ua li no mas siab phem lawm.” Yog koj qhia kom lawv txawj cais qhov zoo qhov phem li no ces ntev mus nws yuav paub tias yam twg tsim nyog ua thiab yam twg tsis tsim nyog.
Qhia kom menyuam paub vim li cas tsim nyog ua zoo. Nug koj tus menyuam li no: Ua li cas tsim nyog peb hais lus tseeb xwb? Yog peb dag yuav txiav kev phooj kev ywg li cas? Vim li cas tsis zoo rau peb ua tub sab? Yog koj txawj nug li no ces yuav pab koj tus menyuam cob nws lub siab kom paub cais qhov zoo qhov phem.
Qhia menyuam tias yog nws ua zoo ces nws yuav tau zoo. Qhia menyuam li no: “Yog koj coj ncaj lwm tus yuav ntseeg koj dua” thiab “Yog koj paub hlub lwm tus lawv yuav xav ua koj tus phoojywg dua.”
Sawvdaws yuav tsum pom tias koj tsev neeg coj zoo.
VAJLUGKUB TEJ HAUV PAUS NTSIAB LUS: “Cia li sim nej tus kheej.”—2 Khaulee 13:5.
Koj tsev neeg yuav tsum coj zoo, koj thiaj muaj cai hais tias:
“Peb tsev neeg tsis nyiam dag.”
“Peb tsis nyiam sib ntaus sib nthe.”
“Peb tsis nyiam tsawm tus ub tus no saib tsis taus luag.”
Pab menyuam pom tias nej tsev neeg yeej nyiam ua qhov zoo hauv nruab siab tuaj tiag, tsis yog lam ua kom tas kevcai xwb.
Qhia tas qhia thiab menyuam thiaj paub tias yuav tsum coj ncaj li cas. Muab tej lawv niaj hnub pom los ua piv txwv qhia lawv. Piv txwv tias neb hnov xov xwm hauv xov tooj cua, hauv this vis, lossis tom tsev kawm ntawv. Nug koj tus menyuam li no, “Yog qhov xwm ntawd raug koj, koj yuav ua li cas thiaj ncaj? Yog raug peb tsev neeg, peb yuav tu li cas?”
Txhawb kom menyuam muaj siab xib rau qhov zoo.
VAJLUGKUB TEJ HAUV PAUS NTSIAB LUS: “Cia li ua lub siab dawb paug.”—1 Petus 3:16.
Qhuas menyuam thaum nws coj tau zoo. Thaum koj tus menyuam coj ncaj coj zoo nco ntsoov qhuas nws thiab piav tias vim li cas qhov nws ua ntawd tsim nyog qhuas. Tej zaum ib leej niam yuav qhuas tau li no: “Niam tus menyuam mas mloog lus tshaj tsis dag niam li.” Ua li yog koj tus menyuam lees txim rau koj ne? Txawm nws ua yuam kev lawm los nco ntsoov qhuas qhov uas nws tseem muaj peevxwm los lees txim ntawm koj. Tom qab ntawd mam li ntuas nws.
Ntuas menyuam thaum nws coj tsis zoo. Thaum menyuam ua yuam kev qhia kom menyuam paub ris nws lub txim. Pab menyuam paub nws qhov txhaum kom nws pom tias nej tsev neeg tsis coj li ntawd. Muaj tej co niam txiv ntshai tsam menyuam tu siab, lawv thiaj tsis xav qhia ncaj qha tias menyuam ua yuam kev li cas. Tiamsis yog niam txiv phua hlo qhov teeb meem rau menyuam paub, yuav cob kom nws lub siab paub qhov zoo qhov phem. Lwm hnub nws lub siab thiaj nkaug nws yog nws xav mus ua phem.