1. Puas Yog Tim Vajtswv Tibneeg Thiaj Txom Nyem?
Ua Cas Thiaj Nug Li No?
Coob leej tsis kam los ntseeg Vajtswv vim lawv hais tias yog tim Vajtswv lawv thiaj txom nyem.
Xav Txog Qhov No
Muaj ntau tus thawj coj ntawm tej kev ntseeg qhia tias tibneeg txom nyem twb yog tim Vajtswv. Xws li:
Thaum raug xwm txheej phem, twb yog Vajtswv rau txim rau peb.
Thaum ib tug menyuam tag sim neej, twb yog Vajtswv coj nws mus lawm.
Thaum muaj tsov muaj rog, twb yog Vajtswv txhawb ntsuj rog ntawd coob leej thiaj txom nyem
Tiamsis tej no tsis muaj tseeb. Vajtswv tsis yuav cov neeg uas dag txog nws, li cov thawj coj no.
KAWM NTXIV
Saib zaj yeeb yaj kiab Kawm Vajlugkub Ua Dabtsi? hauv lub vej xaij jw.org/hmn.
Phau Vajlugkub Hais Li No
Tsis yog tim Vajtswv.
Vajtswv tsis muaj ib nplooj siab xav ua phem. Phau Vajlugkub hais tias:
“Tej uas [Vajtswv] ua yeej ncaj ncees . . . nws ua qhov yog thiab qhov tseeb xwb.”—2 KEVCAI 32:4.
“Tsis muaj ib zaug Vajtswv yuav ua limhiam kiag li, thiab tus uas muaj hwjchim loj kawg nkaus yuav ua txhaum.”—YAUJ 34:10, TT.
“Vajtswv tus uas muaj hwjchim loj kawg nkaus yeej . . . ibtxwm ua ncaj rau sawvdaws.”—YAUJ 34:12.
Vajtswv tsis txaus siab rau tej kev ntseeg uas rhuav nws lub npe.
Xws li cov uas qhia tias Vajtswv txhawb kev tsov kev rog thiab liam tias Vajtswv ua rau tibneeg txom nyem.
“Cov cevlus tuav kuv lub npe hais lus dag xwb; kuv tsis tau txib lawv mus lossis kuv tsis tau kom lawv mus qhia lossis tsis tau hais ib los rau lawv li. Tej yogtoog uas lawv qhia ntawd tsis yog los ntawm kuv . . . yog lawv xav xwb.”—YELEMIS 14:14.
Yexus tsis npog tej kev ntseeg uas dag txog Vajtswv.
“Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb. Thaum txog hnub ntawd yuav muaj ntau leej hais rau kuv hais tias, ‘Tus Tswv! tus Tswv, peb twb tuav koj lub npe qhia Vajtswv Txojlus, peb tuav koj lub npe ntiab dab thiab ua ntau yam txujci tseemceeb!’ Thaum ntawd kuv yuav hais rau lawv hais tias, ‘Cov neeg siab phem, cia li khiav mus, kuv tsis paub nej!’”—MATHAIS 7:21-23.