Phau Vajlugkub Qhia Li Cas?

Puas yog lub qab ntuj khwb no yeej ib txwm muaj nyob los?

Chivkeeb 1:1 hais tias: “Thaum chivkeeb Vajtswv tsim lub ntuj thiab lub ntiajteb.”

Ua ntej xyoo 1950 cov neeg tshawb txuj ntseeg tias yeej ib txwm muaj lub qab ntuj khwb no. Tiamsis tom qab no thaum cov neeg tshawb txuj ua tib zoo kawm ntxiv, lawv mam pom tias lub qab ntuj khwb no yeej yuav tsum muaj qhov pib.

Thaum chiv thawj lub ntiajteb zoo li cas?

Chivkeeb 1:2, 9 qhia tias thaum xub pib lub ntiajteb “tsis tau muaj dabtsi thiab nyob do dus” tsuas muaj dej xwb.

Cov neeg kawm txujci tshawb pom tias yeej muaj raws li nqe Vajlugkub no hais. Ib tug yawg hu ua Pharhiv Sis (Patrick Shih) uas kawm txog tej yam ciaj sia tau hais tias “thaum pib lub ntiajteb tsis muaj tej huab cua uas yug tau txojsia thiab nyob do cuas tsis muaj dabtsi li.” Ib phau ntawv xov xwm kuj tau sau tias: “Tibneeg nyuam qhuav tshawb pom tias thaum xub pib lub ntiajteb tsuas muaj dej xwb tsis muaj av li.”

Txheej cua uas qhwv lub ntiajteb hloov li cas lawm?

Chivkeeb 1:3-5 qhia tias thawj zaug lub hnub ci tuaj rau lub ntiajteb, tej sab hnub txeem tsis dhau txheej cua uas qhwv lub ntiajteb, tsuas pom ci zem zuag xwb. Tom qab ntawd mam li pom lub hnub lub hli ci tseeb zuj zus.​—Chivkeeb 1:14-18.

Ib lub koom haum uas kawm txog dej thiab huab cua tau hais tias thaum lub hnub nyuam qhuav pib ci tuaj rau lub ntiajteb tsuas pom iab oo ntxoov pes nyos xwb. Ces tom qab tej iab oo yaj tag mam pom lub qab ntug ntsuab xiab tuaj.

Xub muaj dabtsi hauv lub ntiajteb?

Chivkeeb 1:20-27 hais tias xub muaj ntses muaj noog muaj tsiaj txhu, mam li muaj tibneeg. Tej neeg tshawb txuj ntseeg tias twb xub muaj ntses ntev loo lawm mam li muaj tsiaj txhu ces puag tom qab no mam muaj tibneeg.

Tibneeg xav yuam kev li cas txog phau Vajlugkub?

Ib txhia xav tias tej uas phau Vajlugkub qhia tsis mus raws li tej uas cov neeg tshawb txuj nrhiav pom. Tiamsis qhov tseeb tiag cov uas hais li ntawd tsis nkag siab phau Vajlugkub zoo xwb.

Phau Vajlugkub tsis qhia tias lub ntuj thiab lub ntiajteb nyuam qhuav muaj 6,000 xyoo no los xwb. Tiamsis phau Vajlugkub tsuas hais tias: “Thaum chivkeeb Vajtswv tsim lub ntuj thiab lub ntiajteb.” (Chivkeeb 1:1) Phau Vajlugkub tsis qhia tsi ntsees tias twb muaj lub ntuj thiab lub ntiajteb ntev npaum li cas los lawm.

Phau Vajlugkub tsis tau qhia tias tsuas siv 6 hnub los tsim txhua yam hauv ntiajteb. Chivkeeb tshooj 1 qhia tias Vajtswv yeej siv 6 hnub los tsim lub ntiajteb thiab txhua yam uas ciaj sia nyob rau hauv. Tiamsis Chivkeeb 2:4 qhia rau peb tias 6 hnub ntawd yog ‘lub caij Yehauvasa tsim lub ntiajteb thiab lub ntuj.’ (Chivkeeb 2:4 NN ) Yog li thaum phau Vajlugkub hais tias Vajtswv siv ib hnub los tsim ub tsim no, ib hnub tsis yog 24 txoos teev li peb xav. Ib hnub yog ib lub sijhawm uas ntev loo.

Phau Vajlugkub tsis qhia tias txhua yam ciaj sia yuav hloov tsis tau. Ib yam tsiaj twg yeej muaj ntau ntau hom. Phau Vajlugkub qhia tias Vajtswv tsim txhua yam tsiaj txhu “raws li nyias yam.” (Chivkeeb 1:24, 25) Thaum phau Vajlugkub hais li no tsis txhais tias tsiaj yuav hloov tsis tau. Sijhawm dhau mus tsiaj yeej hloov tau lossis yoog thaj chaw uas lawv nyob. Qhov uas lawv hloov no tsis yog lawv txia mus ua lwm yam tsiaj, lawv yeej tseem yog lawv hom tsiaj li qub.

Koj xav li cas xwb?

Raws li hais tas los no phau Vajlugkub yeej qhia meej meej tias thaum pib lub ntuj thiab lub ntiajteb zoo li cas, thiab txhua yam ciaj sia tshwm los li cas. Ua li, phau Vajlugkub puas qhia txog tus uas tsim txhua yam thiab? Phau ntawv Encyclopædia Britannica hais tias: “Cov neeg tshawb txuj yeej pom tias tsuas yog ib tug uas muaj hwjchim tshaj plaws xwb thiaj li tsim tau txhua yam uas ciaj sia.”b