Ua Cas Tseem Ceeb Rau Koj Paub Tias Muaj Tus Tsim?
Ua cas thiaj tseem ceeb rau koj paub tias muaj tus tsim los tsis muaj? Yog koj paub tias muaj tus tsim ces koj yeej yuav xav kawm seb nws txojlus hais li cas ntxiv. Thaum koj tso siab rau nws txojlus lawd yuav pab tau koj lub neej li no.
Koj yuav txaus siab rau koj lub neej
PHAU VAJLUGKUB HAIS TIAS: ‛Vajtswv pub muaj tshav muaj nag kom tej qoob loo siav raws caij raws nyoog thiab pub zaub mov rau nej noj kom nej tau nyob kaj siab lug.’—Tes Haujlwm 14:17.
NQE NO TXHAIS TIAS: Txhua yam uas peb pom nyob puag ncig peb yog tej uas Yehauvas tsim rau peb. Yog peb paub tias nws tsim txhua yam rau peb vim nws hlub peb, peb yuav ris nws txiaj ntsig.
Phau Vajlugkub yuav pab koj muaj laj lim tswvyim ua neej
PHAU VAJLUGKUB HAIS TIAS: “Yog koj mloog kuv lus koj yuav paub qhov tseeb, paub ua qhov ncaj ncees, paub ua raws kevcai thiab paub ua koj lub neej.”—Pajlug 2:9.
NQE NO TXHAIS TIAS: Vajtswv yog tus tsim peb. Nws paub tias yam twg yuav ua rau peb zoo siab tshaj. Yog peb kawm nws txojlus yuav pab tau peb lub neej.
Phau Vajlugkub qhia peb txog tej uas peb xav paub
PHAU VAJLUGKUB HAIS TIAS: Koj “yuav paub tseeb hais tias Vajtswv yog tus zoo li cas.”—Pajlug 2:5.
NQE NO TXHAIS TIAS: Thaum peb paub tias muaj tus tsim lawd peb lub neej yuav muaj hauv paus hauv ntsis. Peb yuav nkag siab tias: Vim li cas tibneeg raug kev txom nyem? Ua cas rau tibneeg thaum lawv tuag lawm? Phau Vajlugkub qhia txog tej yam no.
Muaj kev cia siab rau yav tom ntej
PHAU VAJLUGKUB HAIS TIAS: ‛Kuv tib leeg thiaj paub tej uas kuv npaj yuav ua rau nej, kuv yuav pab kom nej vam meej tsis yog ua kom nej puas tsuaj, nej thiaj muaj kev cia siab rau yav tom ntej.’—Yelemis 29:11.
NQE NO TXHAIS TIAS: Vajtswv cog lus lawm tias yav tom ntej nws yuav rhuav tshem kev phem kev limhiam, kev txom nyem, thiab yuav tsis muaj kev ploj kev tuag lawm. Yog peb tso siab rau Vajtswv tej lus cog tseg ces txawm peb ntsib dabtsi los peb yuav nyiaj dhau.