THAUM MUAJ KEV KUB NTXHOV

4 | Txhob Tag Kev Cia Siab

VIM LI CAS?

Yog peb muab tej kev kub ntxhov hauv lub qab ntuj no xav ntau dhau lawm, peb lub siab yuav nyob ntxhov hnyo thiab peb yuav nyob tug niag qaug zog zis. Thaum zoo li no ib txhia tag kev cia siab. Yog li, muaj li cas rau lawv?

Lawv tsis quav ntsej txog lub neej rau yav tom ntej.
Lawv mus haus dej haus cawv, ua yeeb ua tshuaj kom txhob xav txog lawv tej kev nyuaj siab.
Tej tug xav tias txoj kev tuag zoo dua li ua neej nyob.

Nco Ntsoov Tias

Peb tsuas raug kev nyuaj siab thiab teeb meem ib ntus xwb. Muaj hnub tsaus los yeej yuav rov muaj hnub kaj.
Txawm peb tej teeb meem tsis ploj los peb yeej ua tau tej yam los pab kom peb nyiaj dhau.
Phau Vajlugkub muab tau kev cia siab rau peb, thiab txoj kev cia siab no yuav kho tau txhua yam teeb meem.

Koj Ua Tau Li Cas

Phau Vajlugkub hais tias: “Txhob txhawj txog tag kis, rau qhov tag kis tseem yuav muaj lwm yam kev nyuaj siab. Hnub no twb muaj kev txhawj txaus lawm.”—Mathais 6:34.

Tsis txhob cia tej kev txhawj xeeb txog tag kis los cuam tshuam tej uas koj yuav tau ua rau hnub no.

Yog twb tsis tau muaj teeb meem tshwm sim es koj twb pib txhawj lawm ces yuav ua rau koj nyuaj siab thiab tag kev cia siab.

TEJ YAM UAS YUAV—Pab Tau Koj

XAV TXOG QHOV ZOO

Phau Vajlugkub hais tias: ‘Cov neeg uas raug kev txom nyem lub niaj xyoo puav leej phem, tiam sis cov uas lub siab xyiv fab muaj kev pam noj pam haus tsis tu li.’ (Paj Lug 15:15) Yog koj pheej xav tsis zoo xwb ces txawm muaj ib txoj hau kev pab koj los koj yuav tsis pom. Tiam sis yog koj xav txog qhov zoo, koj yuav pom tias yeej muaj txoj hau kev rau koj taug.

Txhob saib los sis mloog tej xov phem heev heev.
Txhua hnub ua tib zoo xav seb koj twb muaj tej yam zoo twg lawm.
Ib hnub twg, xav seb koj yuav ua dab tsi ces sau tej uas koj ua tau xwb. Muab tej txog hauj lwm loj faib ua ob peb txoj me koj thiaj pom tias koj yeej ua hauj lwm qig.

NRHIAV KEV PAB

Phau Vajlugkub hais tias: ‘Tus uas tawm mus ua twm zeej twm kawv ua raws li nws lub siab xwb, thiab tawm tsam sawv daws tej tswv yim zoo.’ (Paj Lug 18:1) Yog koj poob rau hauv ib lub qhov tob tob lawm, yuav tsum muaj tus pab rub koj tawm koj thiaj tawm tau.

Hais koj tsev neeg los sis tej phooj ywg pab koj.
Nrhiav kev pab lwm tus thiab. Yog koj ua li no, koj thiaj yuav tsis xav ntsoov txog koj tej kev nyuaj siab xwb.
Yog koj tag kev cia siab thiab tsis xav ua neej nyob lawm, koj yuav tsum mus cuag kws kho mob. Tej thaud yog koj nyuaj siab dhau lawm, tsam yog koj muaj tus mob nyuaj siab. Coob tus uas muaj tus mob no twb mus kho zoo lawm.a

a Phau Tsim Dheev! no tsis tau hais tias nej yuav tsum mus ntsib ib tug kws kho mob twg.

Peb Cia Siab Tau Rau Phau Vajlugkub

Thaum ub ib tug txiv neej hais rau Vajtswv tias: ‘Koj txoj lus zoo ib yam li lub teeb uas taws ua kuv ntej thiab ci rau kuv txoj hau kev.’ (Phau Ntawv Nkauj 119:105) Cia peb tham seb Vajtswv Txoj Lus zoo li lub teeb li cas.

Yog peb taug kev tsaus ntuj nti, yuav tsum muaj lub teeb tsom peb thiaj li pom txoj hau kev. Ib yam li ntawd, tej uas phau Vajlugkub qhia yuav pab kom peb paub txiav txim thaum peb lub neej tsaus nti.

Zoo li lub teeb uas cig lam lug rau tom hauv ntej, phau Vajlugkub pab kom peb pom tias lub neej yav tom ntej yuav mus li cas.

Phau Vajlugkub qhia tias tib neeg lub neej pib li cas thiab qhia txog tej kev cia siab rau yav pem suab. Tsis tag li ntawd, phau Vajlugkub kuj qhia tias:

Ua Li Cas?

Ua li cas noob neej thiaj raug kev txom nyem? Phau Vajlugkub qhia tias, “Vim ib tug neeg ua txhaum, txhua tus hauv ntiaj teb thiaj muaj txim. Lub txim ntawd ua rau neeg raug kev ploj kev tuag. Txoj kev tuag thiaj kis mus rau txhua tus rau qhov lawv puav leej yog neeg txhaum.”—Loos 5:12.

Vim Li Cas?

Vim li cas tib neeg kho tsis tau noob neej tej teeb meem? Phau Vajlugkub qhia tias neeg lub neej tsis yog nyob ntawm nws tus kheej, neeg coj tsis tau neeg tshais kauj ruam. (Yelemi 10:23) Tej teeb meem uas peb pom hauv lub ntiaj teb no yeej qhia tias cov lus no muaj tseeb.

Yuav Muaj Li Cas?

Vajtswv yuav ua li cas los kho txhua yam teeb meem? Phau Vajlugkub qhia tias, ‘Nws yuav so lawv tej kua muag huv tib si mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.’ —Tshwmsim 21:4.