Saib Taus Lwm Tus

VIM LI CAS HO TSEEM CEEB?

Thaum ib leeg saib taus ib leeg ces yuav zam tau teeb meem.

Muaj ib zaj paj lug hauv phau Vajlugkub hais tias: ‘Lo lus mos lus muag ua rau kev chim ploj mus, tiam sis lo lus nruj tsiv ua rau kev chim tawm tuaj.’ (Pajlug 15:1) Qhov uas hais lus saib tsis taus lwm tus tsuas ua kom muaj teeb meem ntxiv xwb.
Yexus hais tias: “Lub siab xav li cas, lub ncauj hais tawm li ntawd.” (Mathais 12:34) Tej lus peb hais saib tsis taus lwm tus, qhia tias peb xav li cas hauv nruab siab txog lawv haiv neeg los sis qhov uas lawv muaj lawv pluag.

Nyuam qhuav no, muaj ib txoj kev soj ntsuam nyob hauv 28 lub teb chaws thiab lawv nrog coob tshaj li 32,000 tus tib neeg tham. Ntawm cov neeg no, 65 feem puas teb tias, niaj hnub no ib leeg haj yam saib tsis taus ib leeg lawm.

KOJ UA TAU LI CAS?

Tsis hais koj yuav nyob qhov twg thiab nrog leej twg tham, thaum luag tsis xav li koj xav los tsis txhob thuam luag. Xav seb neb ob leeg hais haum yam twg. Yog koj ua li no, yuav pab tau kom koj tsis txhob xav phem txog nws.

“Cia li tseg tsis txhob txiav txim rau luag, Vajtswv thiaj yuav tsis txiav txim rau nej.”—Mathais 7:1.

Yog koj xav kom lwm tus ua zoo rau koj ces koj yuav tsum xub ua zoo rau lwm tus.

“Yog nej xav kom lwm tus ua li cas rau nej, nej yuav tsum ua ib yam li ntawd rau lawv thiab.”—Lukas 6:31.

Zam txim. Thaum luag hais saib tsis taus yus los txhob muab xav tias nws txhob txwm hais. Tej zaum tsuas yog nws tsis xav tom ntej tom qab xwb.

‘Yog koj txawj xav, koj yuav tswj kom tau koj txoj kev chim. Txawm yog luag ua tsis yog rau koj los puam chawj, koj ua li ntawd zoo dua.’—Pajlug 19:11.

Nyob hauv Yehauvas Cov Tim Khawv ib lub Tsev Nceeg Vaj, muaj ntau haiv neeg thiab muaj cov laus cov hluas, ib leeg hu ib leeg luag ntxhi.

YEHAUVAS COV TIM KHAWV UA LI CAS LOS PAB?

Txawm yuav nyob lub zej lus zos twg los, Yehauvas Cov Tim Khawv yeej ua qhia tias lawv saib taus lwm leej lwm tus.

Peb qhia Vajlugkub rau tib neeg tiam sis peb tsis yuam kom ib leej twg ntseeg li peb ntseeg. Peb ua li phau Vajlugkub hais kom ua lub siab mos siab muag thiab hais saib taus lwm tus.—1 Petus 3:15; 2 Timautes 2:24.

Peb tsis xaiv ntsej xaiv muag, peb zoo siab tos txais txhua leej txhua tus tuaj koom peb tej kev sib txoos thiab nrog peb kawm Vajlugkub. Peb yeej ‘saib taus sawv daws’ txawm lawv tsis coj li peb coj.—1 Petus 2:17.

Peb hwm nom tswv tej kev cai txawm peb yuav nyob rau lub teb chaws twg. (Loos 13:1) Peb mloog nom tswv lus thiab them se. Peb tsis xaiv tuaj ib roog nom tswv twg tog, txawm li los peb saib taus lwm tus txoj kev xav thaum hais txog kev nom kev tswv.