KEV PAB RAU THAUM KHOOM KIM ZUJ ZUS TUAJ

Muaj Kev Cia Siab Rau Lub Neej Yav Tom Hauv Ntej

Tej zaum koj yeej muaj kev txhawj xeeb txog lub neej yav tom hauv ntej vim hais tias kev noj kev haus kim zuj zus tuaj, thiab koj tej nyiaj hli los kuj tsis txaus yuav noj yuav haus rau koj yim neeg. Txawm li ntawd los, tsis txhob tag kev cia siab, vim txoj kev cia siab yog ib qho uas yuav pab tau koj thev dhau lub sij hawm no.

KEV CIA SIAB YUAV PAB TAU KOJ LI CAS?

Cov neeg muaj kev cia siab tsis yog cov neeg uas nyob twj ywm tos kom txhua yam rov qab zoo. Tiam sis lawv yog cov uas yuav ua npaum li lawv ua tau los thev, txawm lub neej yuav zoo li cas los xij. Muaj ib co neeg tshawb fawb kawm tau tias, cov neeg uas muaj kev cia siab . . .

yog cov neeg uas thev taus tej kev nyuaj siab dua
yog cov uas txawj hloov lawv lub neej raws li lawv ntsib, zoo li Hmoob ib txwm hais, nyob luag ntuj txawj yoog luag txuj
thiab yog cov uas txawj txiav txim tau zoo rau lawv lub neej kom lawv noj qab nyob zoo

KOJ YUAV UA LI CAS XWB?

Ua ntej tshaj, mus saib seb phau Vajlugkub pab tau koj li cas. Vim phau Vajlugkub yuav pab tsav tswv yim rau koj rau lub sij hawm uas txhua yam kim zuj zus tuaj. Xws li pab kom koj muaj siab zim ua neej thiab ua neej kom muaj chaw txawb chaw rau.

‘Tej uas koj to taub thiab tej uas koj paub txhij paub txhua yuav tsom kwm koj.’—Pajlug 2:11.

Tsis tas li ntawd xwb, mus saib seb phau Vajlugkub hais li cas txog lub neej yav tom hauv ntej. Thaum koj pom hais tias phau Vajlugkub pab tsav tswv yim li cas rau koj ces yuav ua rau koj xav paub seb phau Vajlugkub qhia li cas txog lub neej yav tom hauv ntej. Xws li, koj yuav kawm tau tias Vajtswv xav kom koj “muaj kev cia siab rau yav tom ntej.” (Yelemis 29:11) Txoj kev cia siab no yeej muaj hauv paus hauv ntsis vim muaj Vajtswv lub Nceeg Vaj.

VAJTSWV LUB NCEEG VAJ YOG DAB TSI THIAB YUAV UA DAB TSI?

Vajtswv lub Nceeg Vaj yog Vajtswv txoj kev kav uas nyob saum ntuj ceeb tsheej thiab yuav kav thoob plaws ntiaj teb. (Daniyees 2:44; Mathais 6:10) Vajtswv lub Nceeg Vaj no yuav muab txhua yam kev txob kev txhawj thiab kev tshaib kev nqhis rhuav tshem mus ib txhiab ib txhis, tsuas yuav muaj kev thaj yeeb nyab xeeb thiab muaj noj muaj haus nplua mias lawm xwb, raws li cov nqe Vajlugkub hauv qab no piav:

‘Koj yuav muaj kev zoo siab thiab koj lub neej yuav vam meej.’—Phau Ntawv Nkauj 128:2.

‘Kuv yuav foom koob hmoov rau lawv [uas yog cov pej xeem nyob hauv Vajtswv txoj kev kav] thiab lawv cov xeeb ntxwv ib tiam dhau ib tiam mus ib txhis li.’—Yaxayas 65:23.

‘Thov kom lub teb chaws ntawd muaj nplej ntsu nplua mias.’—Phau Ntawv Nkauj 72:16.

Muaj coob tus uas tuav rawv thiab ntseeg cov lus cog tseg no rau qhov lawv paub tseeb tias Vajtswv “yeej tsis dag li.” (Titus 1:2) Sim mus nyeem phau Vajlugkub! Yog koj nyeem, yuav pab tau koj muaj kev cia siab thiab tseem yuav pab koj thev taus lub sij hawm uas txhua yam kim zuj zus tuaj.