Pib Lub Neej Nyuaj Siab

NYOB sab nraum lub vaj Edee, Adas thiab Eva muaj ntau yam teeb meem. Nkawd yuav tsum khwv heev thiaj tau noj. Nkawd tsis pom tej txiv hmab txiv ntoo uas zoo zoo nkauj lawm, tiamsis tsuas pom muaj pos thiab nroj tsuag tuaj lawm xwb. Tau muaj tej no vim Adas thiab Eva tsis mloog Vajtswv lus thiab nkawd tsis ua Vajtswv tus phoojywg lawm.

Tiamsis qhov uas nyuaj siab tshaj yog Adas thiab Eva pib txawj laus txawj tuag. Koj puas nco qab, Vajtswv twb ceeb toom tias yog nkawd noj tsob txiv uas nws tsis pub noj ntawd ces nkawd yuav tuag? Yog li txij hnub nkawd noj lub txiv ntawd nkawd pib txawj laus txawj tuag. Ua cas nkawd yuav ruam ua luaj es tsis mloog Vajtswv lus!

Tom qab Vajtswv muab Adas thiab Eva ntiab tawm hauv lub vaj Edee lawm, nkawd mam li muaj menyuam. Yog li ntawd, cov menyuam yuav txawj laus txawj tuag ib yam thiab.

Kheev Adas thiab Eva mloog Yehauvas lus, ces nkawd tsev neeg yuav muaj kev zoo siab thiab lawv sawvdaws yuav tau nyob kaj siab lug mus ib txhis rau hauv lub ntiajteb. Yuav tsis muaj leejtwg txawj laus, txawj mob thiab txawj tuag li.

Vajtswv xav kom tibneeg muaj kev zoo siab nyob mus ib txhis, thiab Nws cog lus tias muaj ib hnub lawv yuav tau nyob li ntawd. Tsis yog thoob lub ntiajteb no yuav zoo nkauj xwb, tiamsis txhua tus tibneeg yuav noj qab nyob zoo thiab. Txhua leej txhua tus hauv lub ntiajteb yuav ua phoojywg zoo thiab lawv yuav ua phoojywg zoo nrog Vajtswv.

Tiamsis Eva tsis tau ua Vajtswv tus phoojywg lawm. Yog li ntawd, thaum Eva yug menyuam nws thiaj mob plab heev. Tsis yoojyim rau nws. Qhov uas nws tsis mloog Yehauvas lus ua rau nws muaj kev nyuaj siab ntau yam, puas yog?

Adas thiab Eva muaj tub muaj ntxhais coob. Thaum yug tau tus tub hlob, nkawd muab tis npe hu ua Khayee. Tom qab ntawd, nkawd yug tau ib tug tub ntxiv, muab hu ua Anpee. Koj puas paub ua li cas rau 2 tug tub ntawd?