Yakhauj Tsev Neeg Tsiv Mus Nram Iyi Teb

YAUXEJ tswj tsis taus nws lub kua muag li lawm. Yog li ntawd, nws thiaj hais kom nws cov tub qhe tawm mus. Thaum tshuav nws thiab nws cov kwvtij lawm xwb, Yauxej txawm pib quaj. Nws cov kwvtij xav tsis thoob li, rau qhov lawv tsis paub vim li cas nws quaj. Yauxej thiaj hais rau lawv tias: ‘Kuv yog Yauxej. Kuv txiv puas tseem muaj txojsia nyob?’

Yauxej cov kwvtij ntshai heev thiab lawv teb tsis taus ib los li. Tiamsis Yauxej hais tias: ‘Thov txav los ze kuv.’ Thaum lawv txav los ze Yauxej, nws hais rau lawv tias: ‘Kuv yog nej tus kwv Yauxej, uas nej muab muag los rau Iyi tebchaws no.’

Yauxej ua tib zoo hais ntxiv rau lawv tias: ‘Tsis txhob poob siab thiab tsis txhob txhawj rau qhov nej muab kuv muag los rau ntawm no. Tiag tiag twb yog Vajtswv xa kuv los rau hauv Iyi tebchaws, kom cawm tau tibneeg txojsia. Falau tsa kuv ua tus kav tag nrho lub tebchaws huvsi. Yog li ntawd, kavtsij mus qhia tej no rau kuv txiv. Thiab hais kom nws los nrog kuv nyob nram no.’

Ces Yauxej txawm puag nkaus nws cov kwvtij thiab nwj lawv txhua tus. Thaum Falau hnov tias Yauxej cov kwvtij tuaj, Falau hais rau Yauxej tias: ‘Cia lawv coj tej tsheb nees mus tos lawv txiv thiab lawv tsev neeg los nyob nram no. Kuv yuav muab thaj av uas zoo tshaj plaws hauv Iyi tebchaws rau lawv nyob.’

Yakhauj thiab nws tsev neeg thiaj tsiv mus nram Iyi tebchaws. Hauv daim duab no koj puas pom Yauxej tabtom tuaj ntsib nws txiv?

Yakhauj tsev neeg coob heev lawm. Thaum lawv tsiv mus nram Iyi tebchaws, Yakhauj thiab nws cov xeeb ntxwv tag nrho huvsi muaj 70 leej, tsis suav lawv tej pojniam thiab lawv tej tub qhe. Tag nrho lawv sawvdaws mus nyob rau Iyi tebchaws. Vajtswv muab Yakhauj lub npe hu ua Yixayee. Yog li ntawd, thiaj muab Yakhauj tsev neeg hu ua cov Yixayee. Cov Yixayee thiaj tau ua ib co neeg tseem ceeb heev rau Vajtswv. Peb tseem yuav kawm ntxiv txog lawv.