Lahaj Zais 2 Tug Txivneej Tshuaj Tebchaws

OB TUG txivneej hauv daim duab no tau ntsib teeb meem. Yog tias nkawd tsis khiav tawm ces nkawd yuav raug tua. Nkawd yog cov Yixayee 2 tug neeg tshuaj tebchaws, thiab tus pojniam uas pab nkawd yog Lahaj. Lub moos Yelikhau muaj ntsa loog xov ib ncig. Lahaj lub tsev txuas nkaus rau sab phab ntsa loog. Cia peb kawm saib vim li cas 2 tug txivneej no ntsib teeb meem.

Cov Yixayee tabtom yuav hla tus Dej Yaladee mus rau hauv lub tebchaws Khana-as. Tiamsis ua ntej lawv mus, Yausua txib 2 tug txivneej no mus tshuaj tebchaws. Nws hais rau nkawd tias: ‘Mus saib lub tebchaws thiab lub moos Yelikhau.’

Thaum 2 tug txivneej tshuaj tebchaws mus rau hauv Yelikhau, nkawd mus rau hauv Lahaj lub tsev. Tiamsis muaj neeg hais rau tus vajntxwv hauv Yelikhau tias: ‘Hmo no muaj 2 tug Yixayee tuaj tshuaj tebchaws.’ Thaum vajntxwv hnov li no, nws txib neeg mus hais rau Lahaj tias: ‘Coj 2 tug txivneej uas nyob hauv koj tsev tawm los!’ Tiamsis Lahaj twb muab nkawd zais rau saum ru tsev lawm. Yog li ntawd, nws teb tias: ‘Muaj 2 tug txivneej tuaj hauv kuv tsev tiag, tiamsis kuv tsis paub xyov nkawd tuaj qhovtwg tuaj. Thaum yuav tsaus ntuj ua ntej kaw rooj loog, nkawd twb mus lawm. Yog tias nej mus tamsim no nej yuav caum cuag nkawd!’ Yog li ntawd, cov txivneej thiaj mus caum nkawd qab.

Thaum lawv mus dhau lawm, Lahaj maj nroos mus saum ru tsev. Nws hais rau 2 tug txivneej tias: ‘Kuv paub tias Yehauvas yuav muab lub tebchaws no rau nej. Peb twb hnov qhov uas Yehauvas ua rau dej Hiavtxwv Liab qhuav kiag thaum nej tawm hauv Iyi tebchaws, thiab qhov uas nej tua Vajntxwv Xihoo thiab Vajntxwv Aus. Kuv twb ua zoo rau neb lawm, yog li ntawd, thov neb cog lus tias neb yuav ua zoo rau kuv thiab. Thov cawm kuv niam kuv txiv, thiab kuv cov nus thiab kuv cov viv ncaus.’

Ob tug txivneej tshuaj tebchaws cog lus tias nkawd yuav ua li ntawd, tiamsis Lahaj yuav tsum ua ib yam ntxiv. Ob tug txivneej tshuaj tebchaws hais tias: ‘Muab txoj hlua liab liab no khi rau ntawm koj lub qhov rais thiab coj tag nrho koj tsev neeg tuaj nyob hauv koj lub tsev. Thaum peb sawvdaws rov qab tuaj txeeb Yelikhau, ces peb yuav pom txoj hlua no nyob ntawm koj lub qhov rais, thiab peb yuav tsis tua ib tug uas nyob hauv koj lub tsev li.’ Thaum 2 tug txivneej uas tshuaj tebchaws rov mus txog Yausua, nkawd qhia Yausua txog txhua yam uas tau muaj tshwm sim.