Tus Tub Yexus Nyob Hauv Lub Tuam Tsev

KOJ puas pom tus tub hauv daim duab no? Nws tabtom nrog cov txivneej uas qhia hauv Vajtswv lub tuam tsev tham. Tus tub no yog Yexus. Nws twb loj kawg li lawm. Nimno nws muaj 12 xyoos lawm.

Cov uas qhia hauv lub tuam tsev xav tsis thoob li rau qhov Yexus paub ntau yam txog Vajtswv thiab Vajtswv Txojlus. Tiamsis ua cas tsis pom Maivliag thiab Yauxej nyob ntawm no thiab? Nkawd dua twg lawm? Cia peb kawm saib ua cas ho muaj li ntawd.

Txhua xyoo Yauxej coj nws tsev neeg mus ua Kevcai Hla Dhau nram Yeluxalees. Qhov Kevcai Hla Dhau no yog ib lub caij uas tseem ceeb heev. Naxale nyob deb heev ntawm Yeluxalees. Lub sijhawm ntawd lawv tsis muaj tsheb, thiab tsis muaj tsheb nqaj. Cov tibneeg feem coob mus kotaw xwb. Lawv yuav tsum mus li peb hnub ke mam mus txog Yeluxalees.

Lub sijhawm ntawd Yauxej tsev neeg coob tuaj lawm. Yog li ntawd, Yexus kuj muaj cov kwv thiab cov muam uas nkawd yuav tau saib xyuas. Xyoo ntawd, thaum lawv ua Kevcai Hla Dhau tas, Yauxej thiab Maivliag, thiab cov menyuam rov qab mus tsev rau pem Naxale. Nkawd xav tias Yexus nrog lwm tus mus ua ke lawm. Tiamsis thaum lawv mus tau ib hnub ke lawm, nkawd nrhiav tsis pom Yexus. Nkawd nug cov kwvtij thiab cov phoojywg, tiamsis Yexus tsis nrog lawv leejtwg li! Yog li ntawd, nkawd thiaj rov qab mus nrhiav Yexus nram Yeluxalees.

Thaum kawg nkawd thiaj nrhiav tau Yexus nrog cov txivneej uas qhia hauv lub tuam tsev. Yexus mloog lawv qhia thiab nug lawv ntau yam. Sawvdaws xav tsis thoob tias ua cas Yexus yuav muaj tswvyim ua luaj li. Tiamsis Maivliag hais tias: ‘Metub’e, vim li cas koj yuav ua li no rau wb? Koj txiv wb nrhiav koj thiab txhawj koj kawg li.’

Yexus teb tias: ‘Vim li cas neb nrhiav kuv, neb tsis paub tias kuv yeej yuav nyob hauv kuv Txiv lub tsev lov?’

Yexus nyiam mus kawm txog Vajtswv kawg li. Tsim nyog peb coj li ntawd thiab, puas yog? Nyob pem Naxale, Yexus yeej mus koom kev sib txoos pe hawm Yehauvas txhua lub lim tiam. Yexus ua tib zoo mloog, nws thiaj kawm tau ntau yam los ntawm Vajtswv Txojlus. Cia peb xyaum coj li Yexus thiab.