Yexus Qhia Saum Ib Lub Roob

KOJ puas pom Yexus hauv daim duab no? Nws tabtom qhia cov tibneeg no saum ib lub roob uas nyob hauv Kalilais. Cov uas zaum ze ntawm Yexus yog nws cov thwjtim. Nws tau xaiv lawv 12 leeg los ua nws cov tubtxib. Cov tubtxib yog Yexus cov thwjtim uas tseem ceeb heev. Koj puas paub lawv cov npe hu li cas?

Ib tug yog Ximoos Petus thiab ib tug yog nws tus kwv hu ua Anru. Muaj 2 tug ntxiv hu ua Yakaunpau thiab Yauhas, nkawd yog kwvtij thiab. Tsis tas li ntawd xwb, muaj dua ib tug tubtxib hu ua Yakaunpau. Muaj dua ib tug hu ua Ximoos. Muaj 2 tug tubtxib npe hu ua Yudas: Ib tug yog Yudas Ikhali-au, thiab ib tug yog Yudas uas muaj dua ib lub npe hu ua Thade-a. Ces kuj muaj lwm cov tubtxib hu ua Fili, Nathana-ee (lossis Npathaulaumai), Mathai thiab Thauma.

Tom qab Yexus rov tom Xamali los txog, Yexus pib tshaj tawm tias: ‘Lub nceeg vaj saum ntuj ceeb tsheej los ze lawm.’ Koj puas paub lub nceeg vaj ntawd yog dabtsi? Lub nceeg vaj ntawd yog ib lub tseem fwv tiag tiag. Lub tseem fwv ntawd yog Vajtswv lub. Yexus yog tus vajntxwv uas kav lub nceeg vaj ntawd. Yexus yuav kav saum ntuj ceeb tsheej thiab yuav ua kom muaj kev thaj yeeb rau hauv lub ntiajteb. Vajtswv lub nceeg vaj yuav muab tag nrho lub ntiajteb no kho ua ib lub vaj kaj siab uas zoo nkauj heev.

Hauv daim duab no Yexus tabtom qhia cov tibneeg txog lub nceeg vaj ntawd. Yexus piav tias: ‘Nej yuav tsum thov Vajtswv li no, “Peb Leej Txiv uas nyob saum ntuj ceeb tsheej, thov kom sawvdaws hwm koj lub npe. Thov cia koj lub nceeg vaj los. Thov cia kom muaj raws li koj lub siab nyiam, rau hauv ntiajteb ib yam li muaj saum ntuj ceeb tsheej.”’ Coob leej muab cov lus thov no hu ua ‘Tus Tswv Tej Lus Thov.’ Koj hais puas tau tag nrho zaj lus thov uas Yexus qhia ntawd?

Yexus tabtom qhia cov tibneeg tias lawv ib leeg yuav tsum coj li cas rau ib leeg. Nws hais tias: ‘Yog nej xav kom lwm tus ua li cas rau nej, nej yuav tsum ua li ntawd rau lwm tus thiab.’ Koj yeej nyiam thaum lwm tus ua zoo rau koj, puas yog? Yog li ntawd, Yexus cov lus no qhia kom peb ua zoo rau lwm tus. Yuav zoo heev thaum txhua tus hauv lub vaj kaj siab coj li no, puas yog?