Kev Ntseeg Ntawm Yehovaj cov Timkhawv Muaj Licas?

“Peb xav paub txog koj tej kev ntseeg, rauqhov tej peb paub txog Kheto cov Thwjtim ntawd mas tsuas yog haistias lawv mas raug thuam rauqhov txhia chaw li. Raug tej neeg qhov txhia chaw ntxub kawg li!” (Tej Num 28:22, The Living Bible [Phau Vajlugkub Ciajsia].) Cov thawj coj hauv lub nroog Hlauma tsa tau ibtug qauv pivtxwv zoo kawg. Lawv xav paub losntawm lub hauvpaus, zoodua losntawm cov neeg thuam nkausๆ xwb.

Zoo nkaus ibyam lintawd, niajhnub no Yehovaj cov Timkhawv tau raug luag hais lus tawmtsam txhuaๆ zaus, thiab yog yuav npaj tos kawm qhov tseeb hais txog lawv losntawm lub hauvpaus kev ntxub mas yog ibqho yuam kev lawm. Yog lino mas peb zoosiab kawg haistias uas yuav tau piav rau koj txog tej ntsiab kevcai tseemceeb ntawm qhov peb tau ntseeg.

Phau Vajlugkub, Yexu Kheto, thiab Vajtswv

Peb ntseeg haistias “tagnrho cov nqe sau puavleej yog tshoj tawm losntawm Vajtswv mas yuav pab tau zoo heev.” (2 Timotiam 3:16.) Thiab tabtxawm muaj ibtxhia liam haistias peb tsis yog Kheto cov Thwjtim tejno lam liam xwb tsis muaj tiag. Peb muaj siab dawbpaug txheem tau tej lus ntawm Yexu tus tuavcev Pobzeb tej lus pov thawj hais txog Yexu Kheto zaj: “Yeej tsis muaj lwm lub npe twg uas nyob hauv qab ntuj khwb no uas tau muab rau neeg lawd yuav muaj peevxwm cawm kom tau peb dim.” (Tej Num 4:12.)

Mas yog lintawd, thaum Yexu tau haistias nws yog “Vajtswv leej Tub” thiab haistias leej “Txiv txib kuv los,” Yehovaj cov Timkhawv ntseeg tau haistias Vajtswv lub hwjchim loj tshaj Yexu lub. (Yauhaa 10:36; 6:57.) Yexu tus kheej los yeej paub lintawd: “Leej Txiv yeej muaj hwjchim loj tshaj dua kuv muaj.” (Yauhaa 14:28; 8:28.) Vim lintawd peb thiajli ntseeg tsis tau haistias Yexu yog sibluag li leej Txiv, xwsli cov tau ntseeg txog Tswv Peb Leeg txoj cai qhia. Tsis yog lintawd, peb ntseeg haistias Vajtswv yog tus tsim Yexu thiab haistias nws yog nyob hauv qab ntawm Vajtswv. (Koloxaij 1:15; 1 Koleetau 11:3.)

Nyob rauhauv lus Hmoob Vajtswv lub npe hu ua Yehovaj. Vajlugkub haistias: “Koj, tibleeg xwb tus uas muaj lub npe hu ua YEHOVAJ, yog tus uas siab tshajplaws tagnrho lub ntiajteb.” (Zaj Nkauj 83:18, King James Version [Vajntxwv Yaqhauva Txhais (Aakiv)].) Nyob muaj rawsli nqe lus tshaj tawm ntawm no, Yexu tau muab Vajtswv lub npe ua ibqho mobsiab ntso hais, qhia nws cov thwjtim txog kev thov: “Peb Txiv nyob saum ntuj, cia kom koj lub npe ua kom iblub dawbhuv.” Thiab Yexu tus kheej tau tham nrog Vajtswv: “Kuv twb tau muab koj lub npe ua nto moo lug tag rau cov neeg uas koj tau muab rau kuv lawm.” (Mataij 6:9; Yauhaa 17:6.)

Yehovaj cov Timkhawv ntseeg haistias lawv yuavtsum ua ibyam li Yexu uas tau ua Vajtswv lub npe thiab nws tej tes haujlwm kom lwmtus paub txog. Vim lino peb tau ris lub npe Yehovaj cov Timkhawv mas yog peb xyaum li Yexu, “tus Timkhawv Ntseeg Ruajntseg.” (Tshwmsim 1:5; 3:14.) Yog kawg nkausli, Yasayab 43:10 hais rau Vajtswv cov neeg sawv cev: “‘Nej yog kuv cov timkhawv’ yog Yehovaj lolus, ‘xws nkausli kuv cov tub txib uas kuv tau xaiv los.’”

Tswv Ntuj tus Vajtseemfwv

Yexu tau qhia rau nws cov thwjtim kom thov raws lino, “Cia koj tus vajtseemfwv los,” qhov nws qhia tseemceeb tshajplaws mas yog tus Vajtseemfwv. (Mataij 6:10; Luka 4:43.) Yehovaj cov Timkhawv ntseeg haistias tus Vajtseemfwv mas yog ibtug tseemfwv los saum ntuj tiagๆ, uas yuav kav thoob-plaws thooj av no, thiab haistias Yexu Kheto yog tus tau xaiv tsa los ua tus Huabtais uas peb qhov muag tsis pom ntawd. “Tus tseemfwv ntawd yuav sawv tuaj saum nws lub xubpwg,” phau Vajlugkub haisli. “Nws tus tseemfwv mas yuav kav loj zujzus mus thiab kev thajyeeb losntawm nws yuav muaj mus tsis kawg li.” (Yasayab 9:6, 7, King James Version.)

Yog lintawd, Yexu Kheto yuav tsis yog tibtug huabtais uas yuav kav hauv Vajtswv tus tseemfwv xwb. Yexu yuav muaj cov koom kav ntauๆ leej nrog nws mus nyob saum ntuj ceebtsheej. “Yog peb ua siab ntev tiv mus,” Yexu tus tuavcev Povlauj tau sau, “peb yeej yuav tau kav uake xwsli cov huabtais ibyam nkaus thiab.” (2 Timotiam 2:12.) Phau Vajlugkub tau qhia rau peb haistias cov neeg uas lawv yuav raug tsa sawv hauv qhov tuag los mus nrog Kheto kav uake nyob saum ntuj mas tau cais muaj “ib puas plaubcaug plaub txhiab leej, cov uas tau yuav hauv ntiajteb no tawm los mus.” (Tshwmsim 14:1, 3.)

Muaj tiag lino, cov tseemfwv twg los nws yuavtsum muaj nws ibco pejxeem, thiab Yehovaj cov Timkhawv ntseeg tau haistias yuav muaj ibpab ntau tshaj ntawm cov yuav mus kav saum ntuj uas lawv muaj qas txhiab qas vam tus yuav tau txais txojsia ntev dhawv mus ibtxhis. Mas yuav muaj ib hnub xwb lauj lub ntiajteb no, yuav hloov mus ua iblub vaj kajsiab uas zooๆ nkauj, mas yuav muaj puv txhia chaw cov tsimnyog ua pejxeem rau ntawm Tswv ntuj tus Vajtseemfwv, txhuaๆ tus uas lees txais txoj kev tswjfwm ntawm Yexu thiab nws cov timkav. Vim lintawd Yehovaj cov Timkhawv thiajli muaj siab ruajntseg ntseeg haistias lub ntiajteb no yuav tsis muaj raug kev puastsuaj ibzaug li thiab tej uas Vajlugkub tau cogtseg lawd mas yuavtsum muaj rawsli xwb: “Tej ncajncees lawv tus kheej yuav tau yuav lub ntiajteb, thiab lawv yuav nyob hauv mus ibtxhis.” (Zaj Nkauj 37:29; 104:5.)

Tiamsis Tswv ntuj tus Vajtseemfwv yuav los licas? Puas yog losntawm txhuaๆ tus neeg zoosiab hlo los lees txais txoj kev tswjfwm rau ntawm Vajtswv tus tseemfwv ntawd lod? Tsis yog lintawx! Vajlugkub yeej qhia ncajๆ lawm haistias tus Vajtseemfwv yuav los ntawd mas yuavtsum muaj Vajtswv ua tus lis nrog ncajnraim hauv ntiajteb no tej quag tej num: “Tus Vajtswv saum ntuj yuav tsa muaj ibtug vajtseemfwv uas haistias yuav tsis muaj raug kev puastsuaj ibzaug li. Thiab tus vajtseemfwv kheej ntawd . . . yuav tsoo thiab muab kev puasntsoog rau tagnrho cov vajtseemfwv ntawd, mas nws tus kheej yuav sawv kav mus ibtxhis.” (Danyele 2:44.)

Thaumtwg Tswv ntuj tus Vajtseemfwv mamli los? Nyob tau muaj qab muaj quag ntawm tej lus uas Vajlugkub tau cogtseg los lawd mas niajhnub no tau muaj samsim nkausli, yog lintawd Yehovaj cov Timkhawv ntseeg tau haistias nws yuav los saiๆ no. Peb thov caw koj ua twb zoo xav txog tej lus cogtseg lawm uas xub qhia txog tej xwm uas nyob rauhauv “hnub kawg” ntawm neeg tej kev coj phem no. Tej ntawd tau khaws sau cia rauhauv Mataij 24:3-14; Luka 21:7-13, 25-31; thiab 2 Timotiam 3:1-5.

Vim haistias ‘peb hlub peb tus Vajtswv Yehovaj nrog tagnrho peb lub siab lub ntsws, tus ntsuj [lub cev], lub tswvyim, thiab lub dag lub zog, thiab peb cov kwvtij zejzog ibyam li peb tus kheej,’ peb yog cov tsis muaj kev sibcais ntawm cov haiv neeg, tawv nqaij, thiab kev sibraug zoo. (Mawkau 12:30, 31.) Peb yog cov nrov nto moo paub txog kev sibhlub rauqhov txhia chaw ntawm peb cov kwvtij ntawm Kheto cov Thwjtim uas yog muaj nyob thoobplaws rauhauv txhuaๆ haiv neeg. (Yauhaa 13:35; 1 Yauhaa 3:10-12.) Vim lintawd peb thiajli khaws txoj kev tuaj nruabnrab rau ntawm cov nomtswv tej kev lis lawv tej fai. Peb xyaum li Yexu cov Thwjtim yav ntxov thaum ub, cov uas Yexu tau haistias: “Lawv tsis muaj feem siblis fai ntawm qab ntuj no, ibyam nkausli uas kuv tsis muaj kev siblis fai ntawm qab ntuj no thiab.” (Yauhaa 17:16.) Peb ntseeg haistias tsis muaj feem siblis fai ntawm qab ntuj no mas txhais haistias yuavtsum zam tej kev coj uas ua phem ua qias, feem coob uas niajhnub no coj, muaj ntxiv nrog kev dag, tub sab, sibdee, deev hluas, txivneej deev txivneej pojniam deev pojniam, siv ntshav mus rauqhov tsis yog, hawm mlom, thiab lwmyam uas Vajlugkub txwv. (1 Koleetau 6:9-11; Efexau 5:3-5; Tej Num 15:28, 29.)

Kev Vamkhom rau Tomntej

Yehovaj cov Timkhawv ntseeg tau haistias peb lub neej ntawm ntiajteb neeg no tsis yog tas lino lawm xwb. Peb ntseeg tau haistias Yehovaj txib Kheto los rauhauv ntiajteb no, los hliv nws txojsia ntshav xwsli ibqho txhiv uali mas cov tibneeg thiajli yuav muaj cuabkav tau ibtxoj kev ncajncees nres nrog Vajtswv mas thiajli yuav txais tau txojsia ntev dawv mus ibtxhis nyob rauhauv txoj kev neeg coj tshiab ntawd. Xwsli Yexu ibtug tuavcev tau hais: “Muaj tau tshaj tawm txoj kev ncajncees tau rau peb tamsis no lawm vim losntawm nws cov nroj ntshav.” (Hlauma [Loo] 5:9; Mataij 20:28.) Yehovaj cov Timkhawv mas muaj siab dawbpaug ua Vajtswv thiab nws tus Tub tsaug kawg nkausli rau rauqhov txhiv ua uas tau npaj cia rau kom muaj tau lub neej lawm yav tomntej.

Yehovaj cov Timkhawv tau muaj kev ntseeg tiagๆ nyob muaj rauhauv iblub neej lawm yav tomntej, vim haistias nws yuav muaj qhov tsa sawv rov los ntawm lub qhov tuag losntawm Tswv ntuj tus Vajtseemfwv. Peb ntseeg, xwsli Vajlugkub qhia, haistias thaum ibtug neeg tuag lawm nws tsis muaj ua tau dabtsi nyob lawm tiagๆ, uas “nyob rau hnub ntawd nws lub cimxeeb twb yaj tag lawm.” (Zaj Nkauj 146:3, 4; Yegzeqhele 18:4; Tub Koomhaum 9:5.) Yog tiagๆ, lub neej yav tomntej rau cov neeg tuag mas yog muaj nyob rau ntawm Vajtswv lub cimxeeb thaum kev tsa neeg sawv. (Yauhaa 5:28, 29.)

Tseem muaj ntxiv haistias, Yehovaj cov Timkhawv ntseeg tau haistias yuav muaj coobๆ tus uas muaj txojsia nyob niajhnub no yuav muaj peevxwm haj tseem muaj sia nyob mus thaum Tswv ntuj tus Vajtseemfwv muab kev puasntsoog los rau txhuaๆ cov tseemfwv nimno, xwsli Nau’ag thiab nws tsevneeg tau dim thaum dej nyab, lawv yuav muaj peevxwm nyob tsosiab lug uaneej mus ibtxhis hauv lub ntiajteb no thaum huvๆ lawm. (Mataij 24:36-39; 2 Pobzeb 3:5-7, 13.) Tiamsis peb ntseeg tau haistias kev dim no mas tsuas yog losntawm ua tau rawsli Yehovaj lub siab nyiam xwb, xwsli Vajlugkub haistias: “Qab ntuj no yuav dua mus . . . , tiamsis tus uas ua rawsli Vajtswv lub siab nyiam yuav nyob mus ibtxhis.” (1 Yauhaa 2:17; Zaj Nkauj 37:11; Tshwmsim 7:9,13-15; 21:1-5.)

Pom tseeb kawg, yuav tsis txaus qhia kom tag rauhauv daim ntawv tseb no txog cov kev ntseeg ntawm Yehovaj cov Timkhawv, tiamsis peb thov caw koj mus muab kom tau cov lusxov ntauๆ no mus ntxiv.

Thaum uas tsis muaj phau Vajlugkub twg lub npe, ces tagnrho cov nqe Vajlugkub muab rauhauv no mas yog losntawm phau Qab Ntuj Tshiab Txhais cov Nqe Sau Dawbhuv [Aakiv].

[Cov lus rho hauv zaj no, nyob sab 4]

Peb tau ris lub npe Yehovaj cov Timkhawv mas yog peb xyaum li Yexu