Tej Plig Tsis Tau Xub Ua Neeg Nyob Thiab Tuag Hauv Ntiajteb

Yeej muaj plig tiag! Muaj cov plig zoo thiab cov plig phem. Ua li lawv puas yog cov neeg uas tau nyob hauv lub ntiajteb no es tuag lawm?

Lawv tsis yog. Thaum ib tug neeg tuag lawm, nws tsis muaj ib tug plig mus rau ib qho chaw qhov twg zoo li coob leej tau xav. Ua li cas peb ho paub li ntawd? Rau qhov phau Vajlugkub hais li ntawd. Phau Vajlugkub yog ib phau ntawv uas qhia qhov tseeb. Phau no yog los ntawm tib tug tseem Vajtswv uas yog Yehauvas. Yehauvas yog tus tsim tibneeg; nws yeej paub zoo tias thaum lawv tuag lawm lawv zoo li cas.​—Ntawv Nkauj 83:18; 2 Timaute 3:16.

Phau Vajlugkub hais tias Vajtswv muab “hmoov av” los puab ua thawj tug txivneej uas yog Adas. (Chiv Keeb 2:7) Vajtswv muab nws tso hauv lub Vaj Kaj Siab, uas yog lub vaj Edee. Yog tias Adas ua raws li Yehauvas txojcai, ces nws yeej tsis tuag thiab tseem muaj txojsia nyob hauv lub ntiajteb los txog niaj hnub nimno. Tiamsis thaum Adas txhob txwm hla Vajtswv txojcai, Vajtswv hais rau nws tias: “Koj [yuav] rov qab mus rau hauv av, vim yog tsim koj tawm hauv av los. Koj yog hmoov av, mas koj yuav rov mus ua hmoov av.”​—Chiv Keeb 3:19.

Qhov no txhais li cas? Ua ntej Yehauvas tsis tau muab hmoov av los puab ua Adas, nws nyob qhov twg? Tsis muaj nws nyob qhov twg li. Nws tsis yog ib tug plig nyob saum ntuj uas tsis tau yug los. Yeej tsis muaj nws li. Yog li ntawd thaum Yehauvas hais tias Adas yuav “rov mus ua hmoov av” ces twb yog nws hais tias Adas yuav tuag. Adas tsis muaj ib tug plig mus rau ib qho chaw qhov twg. Thaum Adas tuag, nws rov qab tsis muaj sia thiab tsis muaj nws nyob qhov twg ntxiv lawm. Kev tuag yog qhov uas tsis muaj txojsia li lawm.

Tiamsis ua li cas rau lwm cov uas tau tuag lawd? Puas yog tsis muaj lawv li lawm thiab? Phau Vajlugkub teb li no:

• “Txhua tus [tibneeg thiab tsiaj txhu] puavleej mus rau tib lub chaw. Txhua tus puavleej yog tshwm ntawm hmoov av los thiab txhua tus yuav rov mus ua hmoov av.”​—Laj Lim Tswvyim 3:20.

• “Cov uas tuag lawm tsis paub dabtsi li lawm.”​—Laj Lim Tswvyim 9:5.

• “Qhov uas nws hlub thiab ntxub thiab khib twb ploj tag lawm.”​—Laj Lim Tswvyim 9:6.

• “Rau qhov hauv tub tuag teb [lub qhov ntxa] uas koj yuav mus ntawd tsis muaj haujlwm thiab tsis muaj kev xav, tsis muaj kev txawj ntse thiab tsis muaj tswvyim.”​—Laj Lim Tswvyim 9:10.

• “Thaum . . . [neeg] tuag, lawv yuav rov mus ua av; lawv tej tswvyim yuav kawg rau hnub ntawd.”​—Ntawv Nkauj [Phau Ntawv Nkauj] 146:4, TMZ.

Puas nyuaj rau koj ntseeg cov nqe Vajlugkub no? Yog tias nyuaj rau koj ntseeg, ces muab xav li no: Muaj ntau tsev neeg, tus txiv yog tus uas mus khwv los pab nws lub cuab lub yig. Ntau zaus thaum tus txiv tuag lawm nws tsev neeg raug kev txom nyem heev. Tej lub sijhawm nws tus pojniam thiab cov menyuam tsis muaj txaus noj txaus siv. Tej zaum tus txiv cov yeeb ncuab tseem tuaj ua phem rau lawv thiab. Nug koj tus kheej saib: ‘Yog tias tus txiv muaj ib tug plig mus nyob rau ib qho chaw qhov twg lawm, vim li cas nws ho tsis los pab nws tsev neeg? Vim li cas nws ho tsis tiv thaiv nws tsev neeg ntawm cov neeg phem?’ Rau qhov yeej muaj tseeb raws li phau Vajlugkub hais. Tus txiv yeej tsis muaj sia lawm tiag, nws thiaj pab tsis tau dabtsi li lawm.​—Ntawv Nkauj 115:17.

Qhov no puas yog qhia tias cov neeg tuag yuav tsis rov qab ciaj sia li lawm? Tsis yog li ntawd. Peb tseem yuav kawm txog txojkev sawv hauv qhov tuag rov qab los. Tiamsis ntawm no yog qhia tias cov tuag tsis paub tej uas koj ua. Lawv tsis pom koj, tsis hnov koj hais lus, thiab nrog koj txuas lus tsis tau lawm. Koj tsis tas yuav ntshai lawv. Lawv yuav pab tsis tau koj, thiab lawv ua phem tsis tau rau koj lawm.​—Laj Lim Tswvyim 9:4; Yaxaya 26:14.