Tuav Rawv Lub Siab Uas Paub Qhov Zoo

1, 2. Ua li cas lub koob taw kev tseem ceeb ua luaj li, thiab lub koob ntawd ho zoo li peb lub siab li cas?

YOG tias koj pom ib lub nkoj khiav rag ntws saum nplaim dej hiavtxwv; lossis pom ib tug neeg taug kev hla roob moj sab qhua; lossis pom ib lub dav hlau ya tshoom siab zuj zus saum cov huab, koj yuav xav li cas? Dabtsi coj lawv kev? Yog tias lawv tsis coj ib lub koob taw kev, lawv yeej yuav poob zoo.

² Lub koob taw kev muaj ib rab koob uas taw rau sab qaum teb tas zog li. Yog tias lub koob ntawd khiav zoo thiab koj paub siv nrog daim ntawv qhia kev, ces yuav cawm tau koj txojsia. Lub koob taw kev ntawd, zoo ib yam li lub siab paub qhov zoo ntawm qhov phem uas Yehauvas tau pub rau peb. (Yakaunpau 1:17) Yog tias peb lub siab paub qhov zoo ntawm qhov phem, ces peb yuav tsis yuam kev. Tiamsis peb yuav paub tias txojkev twg zoo rau peb taug tiag. Cia peb kawm txog peb yam no: (1) Peb yuav cob kom peb lub siab paub qhov zoo ntawm qhov phem li cas, (2) peb ib leeg lub siab xav txawv ntawm ib leeg, yog li peb yuav saib taus lwm tus li cas, thiab (3) yog tias peb lub siab txiav txim tau zoo, ces peb yuav tau txais tej koob hmoov twg.

LUB SIAB PAUB QHOV ZOO NTAWM QHOV PHEM LI CAS?

3. Raws li lo lus Kili hauv phau Vajlugkub, tibneeg txawv li cas ntawm tej uas Vajtswv tsim hauv ntiajteb no?

³ Phau Vajlugkub siv ib lo lus Kili uas txhais tau tias ‘paub ntsuas yus tus kheej.’ Phau Vajlugkub Hmoob tau muab lo lus ntawd txhais tias “lub siab uas paub qhov zoo ntawm qhov phem.” Tibneeg lub siab paub dabtsi? Lub siab ntawd paub teem txim lossis zam txim rau peb. Vim peb paub txiav txim li ntawd, peb txawv ntawm ib puas tsav yam uas Vajtswv tau tsim hauv ntiajteb no. Lub siab paub ntsuas peb tus kheej seb peb coj ncaj los coj nkhaus, seb peb coj tus cwj pwm zoo los phem, thiab seb peb txiav txim yog los tsis yog. Tom qab peb txiav txim siab tas lawm, peb lub siab yuav nkaug peb lossis qhuas peb.

4, 5. (1) Ua li cas peb ho paub tias Adas thiab Eva muaj lub siab paub qhov zoo ntawm qhov phem, thiab tom qab uas nkawd txhob txwm hla Vajtswv txoj kevcai, tau muaj li cas? (2) Ua li cas peb ho paub tias, Vajtswv cov tub qhe puag thaum ub muaj lub siab uas paub qhov zoo ntawm qhov phem?

⁴ Thaum Vajtswv xub tsim txivneej thiab pojniam, nws muab lub siab uas paub qhov zoo ntawm qhov phem tso rau hauv nkawd. Ua li cas peb ho paub li ntawd? Rau qhov tom qab Adas thiab Eva ua txhaum, nkawd txaj muag heev. (Chiv Keeb 3:7, 8) Txawm tias nkawd lub siab rov rau txim rau nkawd los, pab tsis tau nkawd lawm. Vim tias nkawd twb yog neeg zoo kawg nkaus tsis muaj txhaum, tiamsis nkawd txhob txwm fav xeeb tawm tsam Vajtswv thiab hla nws txoj kevcai. Zaum no nkawd thim tsis tau li lawm.

⁵ Tiamsis coob leej ntau tus tsis coj li Adas thiab Eva coj. Txawm tias lawv yog neeg txhaum los, lawv tau ua raws li lawv lub siab ceeb toom rau lawv. Zoo ib yam li tus txivneej hu ua Yauj tau hais tias: “Kuv yuav tuav rawv kuv txojkev ncaj ncees cia, tsis tso tseg li, kuv lub siab tsis thuam kuv mus tag kuv sim neej.” (Yauj 27:6) Yauj muaj lub siab paub cais qhov zoo ntawm qhov phem. Nws cia lub siab ntawd coj nws txoj hau kev. Vim li ntawd, nws lub siab thiaj tsis rov nkaug nws thiab ua rau nws txaj muag. Tiamsis Davi tau coj txawv ntawm Yauj. Thaum Davi ua saib tsis taus Vajntxwv Xa-u, Davi lub siab pheej nkaug nws ua rau nws “tu siab,” rau qhov Xa-u yog tus vajntxwv uas Yehauvas tau tsa. (1 Xamuyee 24:5) Qhov uas Davi lub siab rov nkaug nws, pab tau kom Davi txhob ua tej yam phem li ntawd lawm.

6. Ua li cas peb ho paub tias Vajtswv pub lub siab uas paub qhov zoo ntawm qhov phem rau txhua tus?

⁶ Puas yog Yehauvas muab lub siab uas paub qhov zoo ntawm qhov phem tso rau hauv nws cov tub qhe xwb? Tsis yog. Vajtswv tshoov kom tus tubtxib Povlauj sau tias: “Lwm haiv neeg uas tsis muaj Vajtswv txoj kevcai muaj lub siab ua lawv lub neej raws nraim li txoj kevcai ntawd, mas txawm yog lawv tsis muaj Vajtswv txoj kevcai los lawv rov rhawv txoj kevcai rau lawv. Lawv ua lub neej kom pom tias txoj kevcai twb sau cia rau hauv lawv lub siab lawm, thiab lawv lub siab uas paub qhov phem qhov zoo kuj ua timkhawv, thiab lawv tej kev xav uas tej zaum yog rau txim tej zaum yog zam txim.” (Loos 2:14, 15) Yog li ntawd, txawm tias cov neeg uas twb tsis paub Vajtswv tej kevcai los, qee zaus lawv kuj coj tau raws li Vajtswv tej hauv paus ntsiab lus thiab. Vim lawv muaj lub siab ua timkhawv tias lawv ua zoo lossis ua phem.

7. Vim li cas muaj tej lub caij peb lub siab ho rub tau peb yuam kev?

⁷ Tiamsis yuav muaj tej lub sijhawm, peb lub siab yuav ntxias tau peb yuam kev. Vim li cas? Zoo ib yam li lub koob taw kev, yog tias muaj hlau nplaum nyob ze, yuav ua rau rab koob taw yuam kev. Yog tias koj tseem tsis muaj ib daim ntawv qhia kev thiab, ces koj yeej yuav poob zoo. Tej yam tsis zoo uas peb lub siab ntshaw kuj zoo ib yam li lub hlau nplaum uas yuav rub tau peb lub siab yuam kev thiab. Yog tias peb tseem tsis cia Vajtswv Txojlus qhia peb kev thiab, ces peb lub siab yeej yuav tsis paub qhov zoo ntawm qhov phem kiag li. Yuav kom peb lub siab pab tau peb tiag, peb yuav tsum cia Yehauvas lub hwj huam dawb huv coj peb lub siab. Povlauj hais tias: ‘Kuv lub siab uas paub qhov zoo qhov phem kuj ua timkhawv raws li lub hwj huam dawb huv.’ (Loos 9:1) Peb yuav ua li cas peb thiaj paub txiav txim raws li Yehauvas lub hwj huam dawb huv? Peb yuav tsum cob peb lub siab kom peb paub txiav txim zoo.

COB LUB SIAB LI CAS

8. (1) Thaum peb txiav txim ua ib yam dabtsi, peb yuav tsum ceev faj li cas, thiab peb yuav tsum xub xav txog dabtsi? (2) Yog tias peb lub siab tsis nkaug peb, puas yog peb tsis tau ua txhaum? (Saib cov lus hauv qab taw qhia.)

⁸ Ib txhia tsuas txiav txim raws li lawv xav lossis raws li lawv ntshaw xwb. Lawv hais tias, “Ntawm kuv mas tsis ua li cas li, nyob ntawm yus lub siab xwb.” Tej yam tsis zoo uas peb ntshaw muaj zog heev, yuav rub kom peb lub siab txiav txim yuam kev. Thaum muaj li ntawd, phau Vajlugkub thiaj hais tias: “Lub siab yog tus uas dag ntxias heev dua lwm yam huvsi, thiab phem kawg li. Leejtwg yuav paub tau neeg lub siab?” (Yelemi 17:9) Yog li ntawd, tsis yog peb yuav txiav txim raws li peb lub siab ntshaw xwb, tiamsis peb yuav tsum xub xav seb yam uas peb txiav txim ua ntawd, puas haum Vajtswv Yehauvas siab.a

9. Qhov uas peb paub ntshai Vajtswv yog li cas tiag, thiab qhov ntawd yuav pab peb txiav txim siab li cas?

⁹ Yog tias peb twb cob tau peb lub siab kom paub qhov zoo ntawm qhov phem lawm, ces tej uas peb txiav txim siab ua yuav qhia tias peb paub ntshai Vajtswv. Peb yeej yuav tsis txiav txim raws li peb ntshaw xwb. Cia peb xav txog tus tswv xeev hu ua Nehemi. Nws yeej muaj cai sau se hnyav los ntawm cov pejxeem hauv Yeluxalees. Tiamsis nws tsis sau. Vim li cas? Vim nws tsis xav kom Yehauvas tu siab rau nws. Nws hais tias: “Kuv tsis tau ua li ntawd vim kuv hwm thiab paub ntshai Vajtswv.” (Nehemi 5:15) Tseem ceeb heev rau peb paub ntshai Vajtswv. Qhov uas peb paub ntshai Vajtswv yog li cas tiag? Yog qhov uas peb tsis xav ua ib yam dabtsi kom Vajtswv tu siab rau peb. Yog tias peb hwm thiab paub ntshai Vajtswv, ces ua ntej peb txiav txim siab ua ib yam twg, peb yuav nrhiav kev pab los ntawm Vajtswv Txojlus.

10, 11. Phau Vajlugkub qhia li cas txog kev haus dej haus cawv, thiab peb yuav cia Vajtswv coj peb kev li cas peb thiaj li paub txiav txim siab?

¹⁰ Cia peb tham txog kev haus dej haus cawv. Thaum peb tuaj noj haus ua ke, tej zaum koj yuav xav tias, Puas zoo rau kuv haus cawv? Peb yuav tsum xub kawm seb phau Vajlugkub tej hauv paus ntsiab lus qhia li cas. Phau Vajlugkub yeej tsis txwv peb haus dej haus cawv, yog haus kom hauj sim xwb tsis txhaum. Phau Vajlugkub kuj qhuas tias dej caw yog Yehauvas pub. (Ntawv Nkauj 104:14, 15) Tiamsis, phau Vajlugkub txwv txojkev qaug dej qaug cawv thiab ua nqaj ua nqug. (Luka 21:34; Loos 13:13) Tsis tas li ntawd, phau Vajlugkub tseem qhia tias kev qaug dej qaug cawv txhaum loj npaum nkaus li kev nkauj kev nraug thiab kev deev luag poj luag txiv.b​—1 Khaulee 6:9, 10.

¹¹ Cov hauv paus ntsiab lus ntawm phau Vajlugkub tej kevcai, yuav cob kom peb lub siab paub qhov zoo ntawm qhov phem. Yog li ntawd, thaum peb tuaj sib sau noj haus ua ke es lwm tus ce cawv rau peb haus, peb yuav tsum xav txog tej no ua ntej: ‘Peb tuaj sib sau noj haus ua dabtsi? Yog tias lawv ce cawv los, sawvdaws puas yuav qw ua nqaj ua nqug? Ua li, kuv yog ib tug neeg uas kheev coj li cas? Puas yog kuv tos tsis hnyoo haus cawv xwb, thiab kheev haus cawv los pab daws kuv tej kev nyuaj siab? Kuv puas tswj tau kuv tus kheej kom haus hauj sim xwb?’ Thaum peb ua tib zoo xav txog tej hauv paus ntsiab lus ntawm phau Vajlugkub, peb yeej yuav muaj lus nug. Zoo rau peb thov kom Yehauvas coj peb txoj hau kev, peb thiaj yuav paub txiav txim zoo. (Nyeem Ntawv Nkauj 139:23, 24.) Yog tias peb ua li no, ces twb yog peb xav kom Yehauvas lub hwj huam dawb huv coj peb kev. Tsis tas li ntawd xwb, kuj yog peb cob kom peb lub siab paub txiav txim raws li Vajtswv tej hauv paus ntsiab lus. Tiamsis tseem tshuav ib yam uas peb yuav tau xav txog thiab. Cia peb kawm txog qhov no.

YUAV TXIAV TXIM SIAB LI CAS, THIAJ SAIB TAUS LWM TUS?

12, 13. Vim li cas cov Khixatia nyias xav txawv nyias lawm ib yam, thiab peb yuav xav li cas yog tias lwm tus coj txawv ntawm peb?

¹² Koj yuav pom tias cov Khixatia nyias xav txawv lawm nyias ib yam. Yog li peb ib leeg yuav txiav txim txawv mentsis ntawm ib leeg. Tibneeg muaj tej kevcai uas ib txhia pom zoo mus koom, lawv lub siab tsis txwv lawv. Tiamsis lwm cov ho tsis pom zoo mus koom. Thaum hais txog kev ua si, xws li kev haus dej haus cawv, ib txhia nyiam nrog ob peb tug phoojywg noj hmo ua ke, thiab haus mentsis cawv ua si. Tiamsis lwm cov lub siab tsis kheev lawv ua li ntawd. Vim li cas nyias ho xav txawv nyias lawm ib yam? Vim peb paub li no, peb yuav txiav txim li cas?

¹³ Peb nyias loj hlob txawv nyias lawm ib yam. Peb txhua tus nyias yeej paub nyias tus kheej. Tej zaum muaj tej yam nyuaj heev rau ib txhia tso tseg yav tas los. (1 Vajntxwv 8:38, 39) Zoo li, yog ib tug neeg thum cawv nyuaj heev yav tas los, ces tej zaum nws yuav tsis kam kov cawv ntxiv lawm. Yog tias nws tuaj saib koj, es nws lub siab tsis kheev nws haus cawv, koj yuav tu siab lod? Koj yuav txhob tiag kom nws haus lod? Koj yeej tsis ua li ntawd. Tsis tas nws yuav qhia koj tias vim li cas nws tsis haus. Koj txojkev hlub rau tus kwvtij ntawd, yuav pab kom koj paub xav txog nws.

14, 15. Yav thaum ub cov Khixatia muaj teeb meem dabtsi, thiab Povlauj txhawb lawv li cas?

¹⁴ Yav thaum ub, tus tubtxib Povlauj pom tias cov Khixatia nyias xav txawv nyias lawm ib yam thiab. Ib txhia Khixatia, lawv lub siab tsis pub lawv noj tej nqaij uas twb muab xyeem rau dab mlom lawm. (1 Khaulee 10:25) Thaum luag coj tej nqaij no tuaj muag tom kiab, Povlauj lub siab kuj kheev nws noj tej nqaij ntawd. Povlauj pom tias tej mlom yeej tsis muaj sia, thiab tej nqaij ntawd tsis yog tej mlom ntawd li. Yog los ntawm Yehauvas los xwb. Tiamsis Povlauj paub tias ib txhia tsis xav li nws xav. Tej zaum yav tas los cov Khixatia ntawd teev mlom loj heev. Lawv thiaj ntxub tsis xav kov ib yam uas muaj feem nrog kev teev mlom li. Povlauj yuav tu qhov teeb meem no li cas?

¹⁵ Povlauj hais tias: “Peb cov uas ruaj khov lawm tsim nyog thev qhov uas cov tsis tau muaj zog ua yuam kev, thiab peb tsis txhob ua kom txaus peb lub siab xwb. Rau qhov Khetos tsis ua yam uas txaus nws siab xwb.” (Loos 15:1, 3) Povlauj qhia tias peb yuav tsum coj li Yexus Khetos es xav txog peb cov kwvtij ua ntej. Nyob rau lwm nqe, Povlauj kuj hais tias, yog tej nqaij twg ua rau Yexus Khetos ib tug yaj xav yuam kev, nws yeej yuav tsis noj kiag li.​—Nyeem 1 Khaulee 8:13; 10:23, 24, 31-33.

16. Vim li cas cov uas coj nqaim yuav tsum zam tsis txhob thuam cov uas coj txawv ntawm lawv?

¹⁶ Tsis tas li ntawd, cov uas coj nqaim zog yuav tsum tsis txhob ua nyuaj rau cov uas coj dav zog. Lawv yuav tsum tsis txhob yuam kom lwm tus muaj lub siab xav li lawv xav xwb. (Nyeem Loos 14:10.) Peb lub siab tsuas yog txiav txim rau peb tus kheej xwb, tsis yog txiav txim rau lwm tus. Nco ntsoov Yexus cov lus tias: “Nej tsis txhob txiav txim rau luag nej thiaj tsis raug txiav txim.” (Mathai 7:1) Txhua tus hauv lub koom txoos yuav tsum tsis txhob sib cav sib ceg txog tej uas nyias yuav tau txiav txim siab rau nyias tus kheej. Peb yuav tau nrhiav kev los pab kom muaj kev sib hlub thiab kev sib haum xeeb. Ib leeg txhawb ib leeg, tsis yog ib leeg txo ib leeg.​—Loos 14:19.

LUB SIAB UAS TXIAV TXIM ZOO YUAV TXAIS KOOB HMOOV

17. Niaj hnub no, coob leej lub siab zoo li cas lawm?

¹⁷ Tus tubtxib Povlauj hais tias: “Tuav rawv . . . lub siab uas paub qhov zoo.” (1 Timaute 1:19) Yog ib qho koob hmoov zoo kawg li, yog tias peb tuav rawv lub siab uas paub qhov zoo rau ntawm Vajtswv Yehauvas. Peb yuav tsis ntxhov siab li coob leej ntau tus niaj hnub no. Povlauj hais tias “lawv lub siab uas paub qhov zoo qhov phem raug hluavtaws kub tuag lawm.” (1 Timaute 4:2) Yog tias yus cov nqaij kub hnyiab ua caws pliav lawm, qhov nqaij ntawd yuav loog tas tsis hnov mob li lawm. Ib yam li ntawd, niaj hnub no coob leej lub siab loog tas. Lawv lub siab tsis ceeb toom thiab tsis teem txim rau lawv. Lawv thiaj tsis paub txaj muag rau lawv tej kev txhaum li lawm.

18, 19. (1) Thaum peb lub siab nkaug peb, qhov ntawd pab tau peb li cas? (2) Yog tias tom qab uas peb ntxeev dua siab tshiab, tiamsis peb lub siab pheej nkaug peb, peb yuav ua li cas?

¹⁸ Qhov tseeb tiag, tej zaum peb lub siab pheej nkaug peb, rau qhov peb tau ua txhaum lawm. Yog tias peb cia txojkev nyuaj siab ntawd pab kom peb hloov thiab ntxeev dua siab tshiab, ces txawm peb twb ua txhaum loj heev los, Vajtswv yuav zam txim rau peb. Ib yam li Vajntxwv Davi, nws tau ua txhaum loj heev, tiamsis nws yuj xeeb lias xav ntxeev dua siab tshiab, Vajtswv thiaj zam txim rau nws. Davi ntxub qhov uas nws tau ua txhaum ntawd thiab nws kub siab coj raws li Yehauvas tej kevcai, nws thiaj pom tseeb tias Yehauvas yog “tus uas zoo kawg thiab zam txim.” (Ntawv Nkauj 51:1-19; 86:5) Yog tias tom qab uas peb ntxeev dua siab tshiab thiab peb twb txais kev zam txim lawm, tiamsis peb lub siab tseem pheej nkaug peb, peb yuav ua li cas?

¹⁹ Yog tias tus neeg txhaum lub siab nkaug nws heev dhau lawm, ces yuav pab tsis tau nws. Thaum muaj li ntawd, peb yuav tsum nco ntsoov tias Yehauvas loj dua peb lub siab. Zoo ib yam li peb tau txhawb lwm tus, peb yuav tsum ntseeg thiab txais yuav Yehauvas txojkev hlub thiab kev zam txim. (Nyeem 1 Yauhas 3:19, 20.) Thaum peb paub tias Yehauvas txais yuav peb, ces peb lub siab yuav tsis nkaug peb lawm. Tiamsis peb yuav muaj txojkev kaj siab thiab kev xyiv fab uas nrhiav tsis tau lwm qhov los li. Coob leej ntau tus, uas ua txhaum loj tau pom Yehauvas txojkev zam txim. Yog li ntawd, lawv tso siab tau tias Vajtswv Yehauvas yeej txaus siab rau lawv txojkev pe hawm.​—1 Khaulee 6:11.

20, 21. (1) Phau ntawv no lub ntsiab yog dabtsi? (2) Vajtswv pub cov Khixatia muaj kev ywj pheej li cas, tiamsis peb yuav tsum tsis txhob siv txojkev ywj pheej ntawd ua dabtsi?

²⁰ Phau ntawv no yog sau los pab koj nrhiav txojkev xyiv fab ntawd, kom koj tuav rawv lub siab uas paub qhov zoo mus tas tiam kawg no. Tiamsis phau ntawv no tsis qhia txhua txoj kevcai thiab hauv paus ntsiab lus ntawm phau Vajlugkub. Tsis tas li ntawd xwb, txhua txhua hnub muaj ntau yam los raug peb, tiamsis peb yuav tsum tsis txhob xav tias phau Vajlugkub yuav qhia ib qho zuj zus tuaj tias peb yuav tsum tau txiav txim li cas. Phau ntawv no lub ntsiab yog los pab kom koj txawj siv Vajtswv Txojlus, xwv koj thiaj cob tau koj lub siab los paub qhov zoo ntawm qhov phem. “Khetos txoj kevcai” txawv ntawm Mauxe txoj, vim Khetos txoj kevcai txhawb kom peb coj peb lub neej raws li peb lub siab uas paub qhov zoo ntawm qhov phem, thiab kom peb paub siv tej hauv paus ntsiab lus hauv phau Vajlugkub. (Kalatia 6:2) Yehauvas cia cov Khixatia txiav txim rau lawv tus kheej, tiamsis Vajtswv Txojlus qhia tias peb yuav tsum tsis txhob siv txojkev ywj pheej ntawd “mus ua txhaum.” (1 Petus 2:16) Qhov uas Yehauvas cia peb muaj kev ywj pheej li ntawd, qheb kev rau peb los qhia tias peb hlub nws npaum li cas tiag.

²¹ Ib yam li thaum koj xub los kawm Vajlugkub, rau siab ntso thov Yehauvas seb koj yuav coj raws li phau Vajlugkub tej hauv paus ntsiab lus li cas, ces tom qab ntawd ua raws li koj thov. Thaum koj ua li ntawd, twb yog koj “xyaum” cob koj lub siab kom koj “thiaj txawj cais tias yam twg zoo yam twg phem.” (Henplais 5:14) Zoo ib yam li lub koob taw kev, koj lub siab uas paub qhov zoo ntawm qhov phem, yuav pab koj txiav txim tau zoo raws li koj Leej Txiv saum ntuj lub siab nyiam, thiab koj yuav tau txais koob hmoov. Qhov uas koj ua li no, yuav pab tau koj nyob hauv Vajtswv txojkev hlub.