Yuav Rov Muaj Lub Vaj Kaj Siab!

PHAU ntawv Qhia Tshwm pab kom noob neej muaj kev cia siab. Phau no yog phau kawg nkaus thiab. Tus tubtxib Yauhas yog tus sau. Phau no muaj tej yog toog uas qhia tias ib puas tsav yam yuav muaj tiav raws li Yehauvas lub ntsiab.

Hauv thawj zaj yog toog, Yauhas pom Yexus saum ntuj. Yexus qhuas thiab ntuas ib co koom txoos. Zaj yog toog tom qab ntawd, Yauhas pom Vajtswv lub zwm txwv saum ntuj ceeb tsheej thiab ib co tubtxib saum ntuj qhuas Yehauvas.

Muaj yog toog ntxiv los qhia tias Yehauvas lub ntsiab muaj tiav li cas. Yauhas pom ib tug menyuam yaj uas piv txog Yexus, txais ib thooj ntawv muaj xya lub cim. Thaum tev thawj plaub lub cim, muaj plaub tug txivneej caij nees tshwm los. Thawj tug piv txog Yexus. Nws caij ib tug nees dawb thiab ntoo kaus mom kub ua Vajntxwv. Peb tug uas los tom qab, caij nees liab, nees dub, thiab nees txheeb. Lawv piv txog kev tsov kev rog, kev tshaib nqhis, thiab kev mob nkeeg. Tag nrho tej ntawd yuav muaj rau tiam uas lub sim ceeb no yuav kawg. Thaum nws tev lub cim xya, ces xya tus tubtxib saum ntuj txawm tshuab xya lub raj xyu, uas piv tias yuav muab Vajtswv tej lus txiav txim tshaj tawm. Thaum hnov tshuab tej raj xyu nrov ces piv txwv tias yuav muaj xya qhov xwm txheej phem tshwm los, lossis yuav qhia txog Vajtswv txojkev npau taws.

Yauhas ua yog toog pom ib tug metub nyuam qhuav yug los. Tus metub ntawd piv txwv txog Vajtswv lub Nceeg Vaj uas tau pib kav saum ntuj. Txawm muaj tsov rog saum ntuj. Ces Xatas thiab nws cov tubtxib phem raug muab pov rau hauv ntiajteb. Muaj ib lub suab hais nrov nrov tias: “Lub ntiajteb thiab dej hiavtxwv’e, nej yuav raug txom nyem.” Ntxwg Nyoog chim kawg li vim nws paub tias nws lub sijhawm tshuav tsis ntev lawm.​—Qhia Tshwm 12:12.

Yauhas pom ib tug menyuam yaj uas piv txwv txog Yexus saum ntuj. Muaj 144,000 leej nrog nws ua ke. Lawv raug xaiv ntawm noob neej los “nrog nws kav.” Yog li ntawd, phau Qhia Tshwm pab peb pom tias feem ob ntawm tus xeeb ntxwv yuav muaj 144,000 leej.​—Qhia Tshwm 14:1; 20:6.

Tej nom tswv uas kav ntiajteb yuav sib sau ua ke “mus ua rog rau hnub loj kawg uas Vajtswv . . . teem cia.” Ntsuj rog ntawd hu ua Amakedoo. Lawv ntaus rog nrog Yexus, tus uas caij tus nees dawb. Yexus coj ib pab tub rog saum ntuj. Tag nrho tej nom tswv uas kav ntiajteb yuav raug rhuav tshem. Xatas yuav raug kaw cia. Ces Yexus thiab cov 144,000 leej yuav kav lub ntiajteb “ib txhiab xyoo.” Tom qab ib txhiab xyoo, Xatas yuav raug rhuav tshem.​—Qhia Tshwm 16:14; 20:4.

Thaum Yexus thiab cov 144,000 leej Kav Ib Txhiab Xyoo, cov mloog lus yuav muaj lub neej zoo li cas xwb? Yauhas sau tias: “[Yehauvas] yuav so txhua ncos kua muag ntawm lawv qhov muag, txojkev tuag yuav tsis muaj dua li lawm, txojkev quaj ntsuag txojkev quaj thiab kev mob yuav tsis muaj dua li lawm, vim tej qub twb dua tag lawm.” (Qhia Tshwm 21:4) Lub ntiajteb yuav hloov ua lub vaj kaj siab!

Txoj xov hauv phau Vajlugkub xaus rau phau Qhia Tshwm. Lub Nceeg Vaj uas tus Mexiyas kav yuav ua kom Yehauvas lub npe dawb huv thiab kom sawvdaws pom tias Yehauvas tib leeg xwb thiaj tsim nyog kav mus ib txhiab ib txhis!

​—Zaj no muaj nyob rau hauv phau ntawv Qhia Tshwm.