ZAJ KAWM 12
Peb Ua Tes Haujlwm Tshaj Tawm Lub Nceeg Vaj Li Cas?
Tebchaws Xapee
Tebchaws Belarus
Tebchaws Hong Kong
Tebchaws Peru
Ua ntej Yexus tuag, nws tau tshaj li no rau nws cov thwjtim: “Txoj xov zoo uas hais txog Vajtswv lub [“Nceeg Vaj,” NW] yuav raug muab tshaj tawm thoob plaws lub ntiajteb ua timkhawv rau ib tsoom tebchaws, mas thaum ntawd lub sijhawm kawg yuav los txog.” (Mathai 24:14) Yuav kom lawv ua tau tes haujlwm no tiav, lawv yuav tsum taug nraim tus qauv uas Yexus tso tseg rau lawv.—Luka 8:1.
Peb nrhiav tibneeg ib lub tsev rau ib lub. Yexus qhia kom nws cov thwjtim tshaj tawm txoj xov zoo ib lub tsev rau ib lub. (Mathai 10:11-13; Tubtxib Tes Haujlwm 5:42; 20:20) Cov uas tshaj tawm txoj xov zoo rau thawj 100 xyoo, tshaj tawm hauv koog uas tu tseg rau lawv qhia. (Mathai 10:5, 6; 2 Khaulee 10:13) Ib yam li ntawd, niaj hnub no cov kwvtij tu tseg kom txhua lub koom txoos nyias muaj nyias ib koog mus qhia, thiaj qhia thoob. Vim peb ua tib zoo npaj li no, peb ua tau raws li Yexus sam hwm kom peb “ua timkhawv rau sawvdaws.”—Tubtxib Tes Haujlwm 10:42.
Peb qhia txhua qhov chaw uas ntsib tibneeg. Yexus tseg tus qauv zoo heev rau peb xyaum. Nws tshaj tawm txoj xov zoo rau cov neeg uas ntsib ntawm tej tog kev, ntawm ntug hiavtxwv, thiab ntawm tej qhov dej. (Malakau 4:1; Yauhas 4:5-15) Thaum peb ntsib tibneeg ntawm tej tog kev, hauv tej kiab tej khw, lossis nrog lawv tham xov tooj, los peb kuj xyaum ib yam li Yexus es nrhiav kev los qhia Vajlugkub rau lawv thiab. Thaum zoo caij nyoog, peb kuj ua timkhawv rau tej neeg zej zos, rau tej neeg nrog peb ua haujlwm, kawm ntawv ua ke, thiab rau peb cov neeg nruab ze. Vim sawvdaws kub siab qhia li no, thiaj muaj tsheej plhom leej thoob ntiajteb tau hnov txoj xov zoo txog kev “cawm dim.”—Ntawv Nkauj 96:2.
Koj puas xav kom koj tsev neeg thiab koj cov phoojywg paub txog Vajtswv lub Nceeg Vaj, thiab paub txog tej yam zoo uas lub Nceeg Vaj yuav pub rau lawv yav tom hauv ntej? Tsis txhob muab txoj xov zoo no khaws cia rau koj ib leeg paub xwb. Cia li tshaj tawm txoj xov zoo rau lwm tus paub thiab!
Yuav tsum tshaj tawm “txoj xov zoo” twg?
Yehauvas Cov Timkhawv xyaum Yexus tus qauv tshaj tawm txoj xov zoo li cas?