Cov Tub Leg Num Pab Lub Koom Txoos Li Cas?

Phau Vajlugkub tsuas qhia txog 2 pab txivneej Khixatia uas tuav haujlwm saib xyuas lub koom txoos xwb. Ib pab yog “cov saib xyuas cov ntseeg” uas yog cov txwj laus; thiab ib pab yog cov “pab ua haujlwm” uas yog cov tub leg num. (Filipi 1:1) Hauv ib lub koom txoos twg, muaj ob peb tug txwj laus thiab ob peb tug tub leg num ua haujlwm. Cov tub leg num tes haujlwm yog dabtsi?

Lawv pab cov txwj laus. Cov tub leg num yog ib co txivneej uas muaj kev ntseeg heev rau Yehauvas. Cov tub leg num, tsis hais tus laus tus hluas, kub siab lug ua lawv tes haujlwm kom tiav. Peb tso siab tau rau lawv. Lawv saib xyuas tej haujlwm uas niaj hnub ua hauv lub koom txoos. Vim muaj cov tub leg num pab li no, cov txwj laus thiaj muaj sijhawm npaj tej lus qhuab qhia rau lub koom txoos thiab mus xyuas Yehauvas pab yaj.

Lawv pab leg haujlwm hauv lub koom txoos. Tej zaum cov txwj laus yuav txib kom cov tub leg num tos txais qhua hauv lub koom txoos. Cov tub leg num pab tuav paj taub thiab tso suab nkauj, faib tej ntaub ntawv Vajlugkub, thiab saib xyuas tej nyiaj txiag hauv lub koom txoos. Lawv npaj cov ntawv qhia kev rau lub koom txoos tau siv, sawvdaws thiaj paub tias yuav mus qhia Vajlugkub rau koog twg. Lawv kuj pab tu thiab kho lub Tsev Nceeg Vaj. Tej zaum cov txwj laus yuav txib kom cov tub leg num pab saib xyuas cov laus hauv lub koom txoos thiab. Txawm cov tub leg num tes haujlwm zoo li cas los xij, lawv zoo siab hlo ua tes haujlwm ntawd. Tsim nyog peb hwm lawv thiab.​—1 Timaute 3:13.

Lawv tseg tus qauv zoo rau sawvdaws xyaum. Cov kwvtij uas raug xaiv los tuav tes haujlwm ua ib tug tub leg num, yog cov uas muaj kev ntseeg thiab muaj cwj pwm zoo. Thaum lawv qhuab qhia hauv lub koom txoos, lawv txhawb tau sawvdaws txojkev ntseeg. Lawv kuj ntaus thawj mus tshaj tawm txoj xov zoo. Lawv tus qauv pab kom peb kub siab lug mus qhia thiab. Vim lawv koom tes nrog cov txwj laus ua haujlwm ua ke, lawv pab tau lub koom txoos muaj kev koom siab thiab kev xyiv fab. (Efexau 4:16) Ntev mus, lawv yuav tau tuav tes haujlwm ua ib tug txwj laus hauv lub koom txoos thiab.

• Cov tub leg num yog neeg zoo li cas?

• Cov tub leg num pab li cas lub koom txoos thiaj mus zoo?