ZAJ KAWM 25
Vim Li Cas Peb Thiaj Tsa Tej Tsev Nceeg Vaj?
Tebchaws Bolivia
Tebchaws Nigeria, ua ntej tsis tau kho, thiab tom qab kho tiav lawm
Tebchaws Tahiti
Vim li cas peb ho muab lub tsev uas peb sib txoos hu ua lub Tsev Nceeg Vaj? Vim Vajtswv lub Nceeg Vaj yog lub ntsiab peb kawm heev tshaj. Thaum Yexus los hauv ntiajteb, nws lub ntsiab kuj yog lub Nceeg Vaj thiab.—Luka 8:1, NW.
Lub Tsev Nceeg Vaj yog qhov chaw pe hawm tseeb uas nyob hauv lub zej lub zos. Yehauvas Cov Timkhawv sib txoos hauv lub Tsev Nceeg Vaj ua ntej lawv tawm mus tshaj tawm txoj xov zoo. (Mathai 24:14) Txawm tias cov Tsev Nceeg Vaj no zoo tsis sib thooj los, peb yeej tsa kom zoo nkauj zoo saib. Ntau zaus muaj ob peb lub koom txoos siv ib lub Tsev Nceeg Vaj xwb. Vim tibneeg los ntseeg coob zuj zus ntxiv, tau ob peb xyoos dhau los no, peb thiaj tsa tau ntau txhiab lub Tsev Nceeg Vaj tshiab. Yog muab xam ua ke mas ib hnub twg peb tsa tau 5 lub Tsev Nceeg Vaj. Ua li cas peb thiaj tsa tau cov tsev no?—Mathai 19:26.
Lawv siv cov nyiaj siab dawb los tsa tsev. Cov koom txoos muab cov nyiaj siab dawb xa rau Npe-ee tuav. Thaum ib lub koom txoos twg cheem tsum txais nyiaj ua Tsev Nceeg Vaj, lawv thiaj tau txais ntawm Npe-ee.
Cov kwvtij pab ua haujlwm tsa lub Tsev Nceeg Vaj dawb xwb. Hauv ntau lub tebchaws, muaj ib pab kwvtij los ua Cov Tsim Tsa Tsev Nceeg Vaj. Txawm nyob nrug deb li cas los, lawv mus ib lub koom txoos rau ib lub hauv lub tebchaws ntawd. Lawv pab cov koom txoos ntawd ua Tsev Nceeg Vaj. Nyob lwm tebchaws ho muaj ib co Timkhawv uas paub tab, pab saib xyuas tes haujlwm kho thiab tsa tej Tsev Nceeg Vaj tshiab rau ib cheeb tsam twg. Lawv yog cov saib xyuas tes haujlwm ntawd thaum pib mus txog thaum xaus. Cov kwvtij uas txawj ua tsev kuj tuaj pab dawb thiab xwb. Cov kwvtij nkauj muam hauv lub koom txoos yog cov uas nqes tes pab heev tshaj. Vim muaj Yehauvas lub hwj huam pab, thiab muaj cov kwvtij nkauj muam uas muab siab rau ua haujlwm heev, thiaj tsa tau cov Tsev Nceeg Vaj no.—Ntawv Nkauj 127:1; Khaulauxi 3:23.
Vim li cas peb ho muab lub tsev pe hawm Vajtswv hu ua Tsev Nceeg Vaj?
Ua li cas peb thiaj tsa tau tej Tsev Nceeg Vaj thoob qab ntuj?