Tsev Neeg Yuav Tsum Ua Li Cas Thiaj Muaj Kev Zoo Siab?

1. Yuav kom tsev neeg muaj kev zoo siab, vim li cas ob niam txiv yuav tsum sib yuav raws li txoj cai?

Yehauvas yog tus Vajtswv uas “muaj kev zoo siab,” nws thiaj muaj txoj xov zoo uas yuav pab tau lub cuab lub yig muaj kev zoo siab. (1 Timaute 1:11, NW) Vajtswv yog tus tsim thawj nkawm niam txiv thiab yog tus muab nkawd txis ua txij ua nkawm. Yog li ntawd, nws yog tus muaj tswvyim tshaj los pab lub cuab lub yig. Vajtswv xav kom cov Khixatia ua ntaub ntawv sib yuav raws li txoj cai hauv lub tebchaws uas lawv nyob. (Titau 3:1) Thaum cov txij nkawm ua li ntawd ces yuav pab kom tej menyuam muaj chaw tiag siab.​—Nyeem Chiv Keeb 2:24.

Vajtswv pom zoo ib tug txivneej yuav ib tug pojniam xwb. Thaum nkawd sib yuav lawd, nkawd ib leeg yuav tsum npuab siab rau ib leeg mus li. (Henplais 13:4) Vajtswv ntxub txojkev sib nrauj. (Malakhi 2:16) Tiamsis Vajtswv tso cai rau cov Khixatia sib nrauj mus yuav dua lwm tus, yog tias nws tus txij nkawm mus ua nkauj ua nraug lawm.​—Nyeem Mathai 19:3-6, 9.

2. Ob niam txiv yuav tau sib hwm li cas?

Yehauvas tsim kom tus txiv thiab tus pojniam nyias muaj nyias tes haujlwm, los sib txhawb sib pab, thiaj tab tau lub cuab lub yig. (Chiv Keeb 2:18) Tus txiv tsev yuav tsum ntaus thawj hlo mus khwv kom tsev neeg tau noj tau haus thiab kom tsev neeg txav ze rau Vajtswv. Nws yuav tsum muab tej uas nws tus pojniam cheem tsum, tso ua ntej ntawm nws tus kheej. Thiab ob niam txiv yuav tau sib hwm, ib leeg xyaum hais lus mos lus muag rau ib leeg. Txhua tus yog neeg txhaum, yog li ntawd, ob niam txiv yuav tsum sib zam xeeb thiaj kaj siab.​—Nyeem Efexau 4:31, 32; 5:22-25, 33; 1 Petus 3:7.

3. Yog tias tsis muaj kev zoo siab, puas tsim nyog sib cais?

Yog tias neb ob niam txiv muaj teeb meem, neb yuav tsum xyaum ua siab ntev, ib leeg hais lus zoo rau ib leeg. (1 Khaulee 13:4, 5) Cov uas muaj txij nkawm yeej yuav ntsib kev nyuaj siab, tiamsis Vajtswv Txojlus tsis tau hais tias, yuav tsum sib cais thiaj kho tau.​—Nyeem Malakau 10:9.

4. Cov menyuam, Vajtswv xav kom nej tau dabtsi?

Yehauvas xav kom koj muaj kev zoo siab. Nws tib leeg xwb thiaj qhia tau kom koj muaj kev zoo siab thaum koj tseem hluas. Nws xav kom koj khaws thiab mloog koj niam koj txiv lus. (Khaulauxi 3:20) Tsis tas li ntawd xwb, Yehauvas xav kom koj paub tias, koj yuav tau lub neej zoo tshaj plaws li yog tias koj coj raws li Nws thiab nws tus Tub tej lus qhia.​—Nyeem Laj Lim Tswvyim 11:9–12:1; Mathai 19:13-15; 21:15-16.

5. Cov niam txiv, nej yuav pab nej cov menyuam muaj kev zoo siab li cas?

Neb yuav tsum khwv kom neb cov menyuam muaj noj muaj hnav, muaj vag muaj tse nyob. (1 Timaute 5:8) Tiamsis yuav kom neb cov menyuam tau txojkev zoo siab tiag, neb yuav tsum qhuab qhia kom lawv hlub Vajtswv Yehauvas thiab coj raws li nws hais. (Efexau 6:4) Qhov tseem ceeb yog neb tseg tus qauv zoo rau lawv xyaum. Yog tias neb hlub Vajtswv tiag yuav rub tau cov menyuam lub siab kom xav xyaum ib yam li neb thiab. Tsis tas li ntawd xwb, yog tias neb siv Vajlugkub los cob qhia, lawv yuav thoob tsib to nrog.​—Nyeem Kevcai 6:4-7; Paj Lug 22:6.

Yog tias neb txhawb thiab qhuas neb tej menyuam yuav pab kom lawv ua tau zoo. Tseem ceeb rau neb qhuab ntuas menyuam, lawv thiaj paub khiav deb ntawm tej kev phem uas yuav rhuav tau lawv lub neej. (Paj Lug 22:15) Tiamsis nco ntsoov tias thaum cov niam txiv qhuab qhia menyuam, tsis txhob rau txim hnyav dhau lossis ua nruj ua tsiv rau lawv.​—Nyeem Khaulauxi 3:21.

Yehauvas Cov Timkhawv luam tau ntau phau ntawv uas yuav pab tau cov niam txiv thiab cov menyuam. Cov ntaub ntawv no yog rho los ntawm phau Vajlugkub.​—Nyeem Ntawv Nkauj 19:7, 11.