ZAJ 55
Yehauvas Tus Tubtxib Saum Ntuj Tiv Thaiv Hexekhiya
Cov Axilia tuaj txeeb tau 10 xeem Yixayee lawm. Zaum no Xenakhawli xav tuaj txeeb kom tau 2 xeem Yuda thiab. Nws txeeb tau cov Yuda tej nroog zuj zus. Lub nroog uas nws xav tau tshaj yog Yeluxalees. Tiamsis Xenakhawli tsis paub tias Yehauvas twb tiv thaiv Yeluxalees lawm.
Hexekhiya uas yog cov Yuda tus vajntxwv twb muab nyiaj ntau heev mus them Xenakhawli kom nws tsis txhob tuaj txeeb Yeluxalees. Txawm li ntawd, los Xenakhawli tseem txhij pab tub rog tuaj ntaus Yeluxalees thiab. Cov Yuda ntshai heev vim cov Axilia twb tuaj yuav txog. Hexekhiya thiaj hais rau lawv tias: ‘Tsis txhob ntshai. Cov Axilia muaj zog heev, tiamsis Yehauvas yuav ua kom peb muaj zog dua lawv.’
Xenakhawli txawm txib nws tus tub xa xov Lasakhe mus thuam cov neeg hauv Yeluxalees. Lasakhe tuaj nres sab nraum lub ntsa loog thiab qw tias: ‘Txhob cia Hexekhiya dag nej tias Yehauvas yuav pab nej. Tsis muaj ib tug vajtswv twg yuav cawm tau nej dim ntawm peb li.’
Hexekhiya thiaj thov Yehauvas pab nws. Yehauvas teb tias: ‘Tsis txhob ntshai tej lus uas Lasakhe hais ntawd. Xenakhawli yeej yuav txeeb tsis tau Yeluxalees ib zaug li.’ Tom qab ntawd, Xenakhawli xa ntawv tuaj hem Hexekhiya ntxiv tias: ‘Cia li zwm rau peb. Yehauvas yeej tsis pab nej li.’ Hexekhiya thiaj thov Yehauvas dua tias: ‘Yehauvas thov koj pab peb dim kom ib tsoom tebchaws paub tias koj thiaj yog tus tseem Vajtswv.’ Yehauvas teb tias: ‘Axilia tus vajntxwv yeej yuav tuaj tsis txog Yeluxalees li. Kuv yeej yuav tiv thaiv lub nroog no.’
Xenakhawli xav tias Yeluxalees yeej yuav poob rau nws sai sai. Tiamsis muaj ib hmos, thaum cov Axilia pab tub rog tsuam chaw rau sab nraum lub nroog Yeluxalees, Yehauvas txib ib tug tubtxib saum ntuj los tua cov Axilia 185,000 leej tub rog tuag tag huvsi! Vajntxwv Xenakhawli tsis muaj zog lawm, ces nws thiaj swb thiab rov mus tsev. Yehauvas yeej tiv thaiv Hexekhiya thiab lub nroog Yeluxalees raws nkaus li nws tau cog lus lawm. Yog tias koj nyob hauv lub nroog Yeluxalees, koj puas yuav tso siab rau Yehauvas?
“[Yehauvas] tus tubtxib saum ntuj zov vij rawv cov uas paub ntshai [Yehauvas], thiab cawm kom lawv dim.”—Ntawv Nkauj 34:7