ZAJ KAWM 14

Txhawb Cov Ntsiab Tseem Ceeb

Henplais 8:1

LUB NTSIAB LUS: Teeb cov ntsiab tseem ceeb kom muaj chaw txawb chaw rau, thiaj txhawb tau lub ntsiab loj thiab lub hom phiaj. Yog koj qhia li no, luag yuav khaws tau coj mus siv.

XYAUM LI NO:

Paub lub hom phiaj. Xav seb lub hom phiaj uas koj qhia yog dabtsi. Puas yog koj tshaj xo rau luag paub xwb? Puas yog koj xav kom luag ntseeg ib yam tshiab? Los yog koj txhawb kom luag nqes tes ua ib yam dabtsi? Ces npaj tej ntsiab me tseem ceeb los txhawb lub hom phiaj ntawd.

Piv txwv tias koj tabtom npaj ib zaj lus qhia ntsig txog thaum Vajtswv tsa cov tuag sawv rov los. Xav li no: ‘Tibneeg xav paub dabtsi txog lub ntsiab no? Lawv yuav nug dabtsi ua ntej? Thaum kuv teb tas, lawv yuav nug dabtsi ntxiv thiab? Puas muaj tej yam uas kuv yuav piav tshab tshab lawv thiaj ntseeg?’ Yog koj teeb cov ntsiab me kom muaj chaw txawb chaw rau li ntawd ces tibneeg yuav to taub zoo dua. Zoo li koj coj lawv kev ib qho rau ib qho mus txog chaw.
Txhawb lub ntsiab loj. Txhua zaj lus qhia yuav tsum muaj ib lub ntsiab loj. Yog koj ib sij rov hais txog lub ntsiab ntawd, luag yuav khaws tau. Xaiv tej lus thiab hais tej lus piv txwv uas yuav ua rau luag xav txog koj lub ntsiab. Ua li no thoob plaws koj zaj lus qhia.
Piav cov ntsiab tseem ceeb kom meej thiab yoojyim to taub. Xaiv tej ntsiab me tseem ceeb uas yuav txhawb lub ntsiab loj, thiab npaj kom txaus koj lub sijhawm xwb. Yog koj xaiv ob peb lub ntsiab me xwb, koj yuav muaj sijhawm piav meej thuav thiab luag yuav cim tau dua. Thaum koj tham ib lub ntsiab me rau ib lub, nco ntsoov nres thiab tham kom npliag.

Piav tom hauv paus tias koj yuav tham pes tsawg lub ntsiab me tseem ceeb, lawv thiaj caum cuag koj. Yog koj xub hais li no ces lawv twb npaj tos lawm. Thaum koj yuav xaus lus rov hais ib lwm txog cov ntsiab me uas koj tau qhia, lawv thiaj cim tau.