Vajtswv Puas Txaus Siab Rau Txhua Yam Koob Tsheej?

Vajtswv Yehauvas yeej xav kom peb muaj kev zoo siab thiab ua koob tsheej muaj noj muaj haus lom zem. Tiam sis kuj tsis yog hais tias Yehauvas yuav txaus siab rau txhua yam koob tsheej. Yog hais tias peb hlub Yehauvas, peb yuav ua li cas xwb?

1. Vim li cas thiaj muaj ntau yam koob tsheej uas tsis haum Vajtswv Yehauvas siab?

Muaj ntau yam koob tsheej uas yog los ntawm tej kev ntseeg cuav thiab tsis ua raws li Vajtswv Txoj Lus. Xws li tej koob tsheej uas txuam nrog kev teev dab teev mlom, txoj kev ntseeg tias tib neeg muaj ntsuj plig, los sis kev saib neeb saib yaig thiab saib hmoov. (Yaxayas 65:11) Twb yog vim li no, Yehauvas thiaj ceeb toom kom nws cov neeg “tsis txhob kov tej uas qias tsis huv.”​—2 Kauleethaus 6:17.a

2. Yehauvas xav li cas thaum tib neeg ua koob tsheej los hawm ib tug neeg?

Muaj tej co koob tsheej yog ua los hawm thiab los qhuas tej nom tswv los sis tej tub rog. Hos tej co yog ua los hawm lub teb chaws tus chij thiab ua nco txog hnub uas lub teb chaws tau kev ywj pheej. (1 Yauhas 5:21) Thiab muaj tej co yog ua los qhuas ib pab neeg los sis ib lub koom haum. Tiam sis Yehauvas ceeb toom kom peb tsis txhob “cia siab rau neeg.” (Nyeem Yelemis 17:5.) Koj sim xav seb, Yehauvas puas yuav zoo siab yog hais tias peb mus qhuas thiab mus hawm ib tug neeg los sis ib lub koom haum uas txhawb nqa tej tswv yim uas tsis haum Nws siab?

3. Yehauvas tsis nyiam tej cwj pwm zoo li cas thaum tib neeg ua koob tsheej?

Phau Vajlugkub hais tias peb yuav tsum tsis txhob ‘quav dej quav cawv, noj tsau haus qaug, thiab qw ua nqaj ua nqug.’ (1 Petus 4:3) Ib txhia koob tsheej cia tib neeg ua phem ua qias ywj siab. Yog hais tias peb xav muaj kev sib raug zoo nrog Yehauvas, peb yuav tsum tsis txhob ua li lawv ua.

KAWM NTXIV

4. Tsis txhob ua tej koob tsheej uas yuav rhuav tau Yehauvas lub koob lub npe

Nyeem Efexus 5:10 thiab tham txog cov lus no:

• Ua ntej peb yuav mus los tsis mus koom ib lub koob tsheej twg, peb yuav tsum paub kom meej meej txog dab tsi?

• Tib neeg nyiam ua tej koob tsheej twg xwb, ntawm thaj tsam uas koj nyob?

• Koj puas xav tias Yehauvas yuav txaus siab rau tej koob tsheej ntawd?

Vajtswv xav li cas xwb, thaum tib neeg ua koob tsheej nco txog hnub yug? Yeej tsis muaj ib nqe hauv phau Vajlugkub uas hais tais cov uas teev tiam Yehauvas ua koob tsheej nco txog hnub yug. Phau Vajlugkub tsuas hais txog ob tug neeg ua koob tsheej nco txog hnub yug xwb, tiam sis nkawd puav leej tsis teev tiam Yehauvas. Nyeem Chivkeeb 40:20-22 thiab Mathais 14:6-10 thiab tham txog ob lo lus no:

• Ob lub koob tsheej nco txog hnub yug no, muaj dab tsi tshwm sim?

• Raws li cov nqe Vajlugkub no, koj puas xav tias Yehauvas nyiam thaum tib neeg ua koob tsheej nco txog hnub yug?

Yog koj tseem xav tias, “Xyov puas tseem ceeb rau Yehauvas txawm kuv mus thiab tsis mus koom ua tej koob tsheej nco txog hnub yug los sis lwm yam koob tsheej uas tsis ua raws li Vajtswv Txoj Lus hais?” Nyeem Khiav Dim 32:1-8 ces saib zaj YEEB YAJ KIAB thiab tham txog ob lo lus no:

YEEB YAJ KIAB: Tej Koob Tsheej Uas Tsis Haum Vajtswv Siab (5:07)

• Vim li cas peb yuav tsum paub kom meej tias yam twg thiaj li haum Yehauvas siab?

• Peb yuav ua li cas peb thiaj paub?

Xav seb puas haum Vajtswv siab

• Lub koob tsheej no puas ua li Vajtswv tej lus cob qhia? Mus tshawb nrhiav seb lub koob tsheej no pib li cas los.

• Lub koob tsheej no puas yog ua los hawm ib tug neeg, ib lub koom haum, los sis ib lub teb chaws tus chij? Peb tsuas hawm Yehauvas thiab tso siab tias tsuas yog nws tib leeg xwb thiaj li daws tau tag nrho tej teeb meem hauv ntiaj teb no.

• Lub koob tsheej no tej kab ke puas cov nyom nrog Vajtswv Txoj Lus? Peb yuav tsum paub rau qhov peb xav ua neeg dawb huv rau Yehauvas.

5. Pab kom lwm tus to taub koj txoj kev ntseeg

YEEB YAJ KIAB: Ua Zoo Piav Koj Txoj Kev Ntseeg Rau Lwm Tus (2:01)

Nyeem Mathais 7:12 thiab tham txog ob lo lus no:

• Raws li nqe Vajlugkub no, puas zoo rau koj hais kom koj tsev neeg uas tsis teev tiam Yehauvas tsis txhob ua lawv tej koob tsheej ntxiv lawm?

• Koj yuav ua li cas koj tsev neeg thiaj paub hais tias txawm koj tsis nrog lawv ua lawv tej koob tsheej los koj yeej tseem hlub tshua lawv?

6. Yehauvas xav kom peb muaj kev zoo siab

Yehauvas xav kom peb muaj kev zoo siab thiab muaj kev lom zem nrog peb tsev neeg thiab peb cov phooj ywg. Nyeem Tej Lus Qhia 8:15 thiab tham txog lo lus no:

• Raws li nqe Vajlugkub no hais, ua li cas peb thiaj paub hais tias Yehauvas xav kom peb muaj kev zoo siab?

Yehauvas xav kom nws cov neeg muaj kev zoo siab xyiv fab thiab muaj noj muaj haus lom zem xauv npo. Saib zaj YEEB YAJ KIAB seb peb cov kwv tij nkauj muam muaj kev zoo siab npaum li cas thaum lawv mus tej rooj sib txoos rau ntau teb chaws.

YEEB YAJ KIAB: Tos Txais Cov Tuaj Koom Tej Rooj Sib Txoos Rau Ntau Teb Chaws (5:40)

Nyeem Kalatias 6:10 thiab tham txog cov lus no:

• Puas yog hais tias peb yuav tsum mus koom nrog luag tej ua lawv tej koob tsheej, thiaj li yog peb ua zoo rau lawv thiab pab lawv?

• Thaum koj muab khoom pub rau lwm tus, qhov twg ua rau koj zoo siab dua? Thaum koj zoo siab hlob muab pub rau luag los yog thaum uas koj yuav tsum tau muab?

• Muaj tej thaud, Yehauvas Cov Tim Khawv yeej ua kev zoo siab rau lawv cov me nyuam thiab muab khoom pub rau lawv. Yog koj muaj me nyuam, sim xav seb puas muaj tej yam twg uas koj yuav ua tau rau lawv?

KOJ KAWM TAU DAB TSI

Yehauvas xav kom peb muaj kev zoo siab nrog peb tsev neeg thiab peb cov phooj ywg. Tiam sis Nws kuj tsis xav kom peb mus ua tej koob tsheej uas tsis haum nws siab.

Rov Tham Dua

• Tej lus nug twg yuav pab kom peb paub tias tej koob tsheej twg tsis haum Yehauvas siab?

• Peb yuav hais li cas peb cov kwv tij phooj ywg thiaj to taub tias yog vim li cas peb koom tsis tau lawv tej koob tsheej?

• Ua cas peb thiaj paub tias Yehauvas xav kom peb muaj kev zoo siab?

TSHAWB NTXIV

Mus nyeem txog tej kab lig kev cai uas Yehauvas cov neeg tsis ua.

“Ua Cas Yehauvas Cov Tim Khawv Tsis Koom Tib Neeg Tej Kev Lig Kev Cai?” (Nyeem hauv jw.org/hmn)

Mus nyeem seb vim li cas peb thiaj ntseeg tias ua koob tsheej nco txog hnub yug tsis haum Vajtswv siab.

“Vim Li Cas Yehauvas Cov Tim Khawv Thiaj Tsis Ua Koob Tsheej Nco Txog Hnub Yug?” (Nyeem hauv jw.org/hmn)

Saib seb cov me nyuam ua tau haum Yehauvas siab li cas thaum muaj koob tsheej.

Peb Muaj Nqis Rau Yehauvas (11:35)

Muaj cov Khixatias tsheej plhom leej tsis ua kev cai Khixamav. Mus nyeem seb lawv hais li cas xwb.

“Lawv Nrhiav Tau Ib Yam Zoo Tshaj Lawm” (Phau Tsom Faj lub 12 Hlis tim 1 xyoo 2012)