PAB LAWV LOS UA THWJ TIM
ZAJ KAWM 11
Qhia Kom Yooj Yim
Hauv paus ntsiab lus: Yog nej hais lus txawv txawv, cov mloog yuav ua li cas nkag siab?—1 Kauleethaus 14:9.
Yexus Coj Li Cas?
1. Saib zaj YEEB YAJ KIAB, los sis nyeem Mathais 6:25-27. Tom qab ntawd, tham txog ob lo lus no:
Yexus muab dab tsi los ua piv txwv qhia tias Yehauvas mob siab peb?
Txawm Yexus paub ntau yam txog tej noog los nws tsuas qhia kiag lub ntsiab yooj yim xwb. Vim li cas qhia li ntawd zoo dua?
Peb Kawm Tau Li Cas Los Ntawm Yexus?
2. Thaum peb qhia yooj yim, tib neeg yuav khaws tau tej uas peb qhia. Tsis tas li ntawd, tseem yuav raug lawv siab dua thiab.
Xyaum Yexus
3. Txhob hais lus ntau ntau. Txawm tias ntxim li twb zoo tham txhua yam rau nws los, tham txog lub ntsiab uas tab tom kawm ntawd xwb. Thaum koj nug txog ib yam dab tsi ua siab ntev tos nws teb tso. Yog nws tsis paub teb los sis teb tsis raug li phau Vajlugkub qhia, zoo rau koj siv lus nug ntxiv los pab nws. Thaum nws nkag siab lub ntsiab loj lawm, neb mam mus kawm zaj tom ntej.
4. Pab tus kawm pom tias tej uas nws kawm tag thiab tseem yuav kawm sib dhos li cas. Piv txwv li no, yav tag los neb twb kawm tias cov tuag rov mus ua av lawm, tiam sis tam sim no neb yuav kawm tias Yehauvas yuav tsa cov tuag sawv rov los. Zoo rau neb rov tham me ntsis txog lub ntsiab qub.
5. Ua tib zoo xaiv tej lus piv txwv. Ua ntej yuav hais ib lo lus piv txwv twg, zoo rau peb nco ntsoov li no:
Siv tej lus piv txwv yooj yim.
Nws puas yuav to taub qhov piv txwv?
Qhia kom nws cim tau lub ntsiab, tsis yog cim tau qhov piv txwv xwb.