Vim Li Cas Vajtswv Nqua Hu Kom Peb Thov Nws?

Vajtswv xav kom peb nrog nws ntaus phoojywg.

Yog peb xav nrog leejtwg ntaus phoojywg, peb yuav tsum nrog nws tham lus. Ib yam li ntawd, yog peb xav nrog Vajtswv ntaus phoojywg, peb yuav tsum nrog nws tham lus thiab. Vajtswv nqua hu peb li no: “Nej yuav thov hu kuv thiab los taij kuv mas kuv yuav mloog nej.” (Yelemi 29:12) Yog peb thov Vajtswv, peb yuav txav ze rau nws ces nws yuav txav los ze peb thiab. (Yakaunpau 4:8) Phau Vajlugkub thiaj qhia tias: “[Yehauvas] nyob ze txhua tus uas thov hu nws.” (Ntawv Nkauj 145:18) Yog peb yimhuab thov Vajtswv ces peb yimhuab nrog nws sib raug zoo xwb.

Vajtswv xav pab koj.

Yexus hais tias: “Nej cov muaj leejtwg uas nws tus tub thov ncuav noj es yuav muab ib lub pob zeb rau nws? Lossis yog nws thov ntses es yuav muab ib tug nab rau nws lov? Yog li no nej . . . twb paub muab tej yam uas zoo rau nej tej menyuam, nej leej Txiv uas nyob saum ntuj yimhuab yuav muab tej yam uas zoo rau cov uas thov nws.” (Mathai 7:9-11) Yog li ntawd, Vajtswv nqua hu koj los thov nws vim nws “mob siab” txog koj. (1 Petus 5:7) Nws kuj xav kom koj qhia koj tej kev nyuaj siab rau nws paub. Phau Vajlugkub hais tias: “Tsis txhob txhawj rau ib yam dabtsi, tiamsis cia li taij thiab thov thiab ua Vajtswv tsaug qhia txhua yam uas koj cheem tsum rau nws paub.”​—Filipi 4:6.

Tibneeg cheem tsum nrog Vajtswv sib raug zoo.

Cov neeg uas fawb txog tibneeg tej kev coj noj coj ua, tshawb pom tias muaj ib tsheej plhom leej cheem tsum kev thov Vajtswv. Txawm cov neeg uas twb tsis ntseeg Vajtswv, los tseem muaj ib nplooj siab xav thov Nws thiab.a Tej no ua pov thawj tias Vajtswv tsim tibneeg los nrog Nws sib raug zoo tiag. Yexus thiaj hais tias: “Tsis yog tib cov mov xwb thiaj yug tau neeg txojsia, tiamsis yog txhua lo lus uas tawm ntawm Vajtswv qhov ncauj los thiaj yug tau.” (Mathai 4:4) Yuav kom peb tau nrog Vajtswv sib raug zoo, peb yuav tsum thov nws tsis tu ncua.

Yog peb thov Vajtswv ces yuav pab tau peb li cas?