Kev Thov Vajtswv Yuav Pab Tau Koj Li Cas?

Ua ntej peb yuav ua ib yam dabtsi, peb yeej xav paub seb yam ntawd puas muaj qabhau rau peb lub neej tiag. Thaum peb thov Vajtswv, peb kuj xav paub seb puas muaj qabhau dabtsi rau peb thiab.

Peb twb kawm lawm tias tsis yog peb thov Vajtswv kom tas kevcai lossis kom siab nqeg xwb. Tus tseem Vajtswv Yehauvas yeej mloog ntsoov peb tej lus thov. Yog peb thov raws li nws lub siab nyiam, thiab thov txog tej yam zoo xwb ces nws yeej mloog. Nws nqua hu kom peb txav ze rau nws. (Yakaunpau 4:8) Yog peb thov Vajtswv tsis tu ncua yuav pab tau peb li cas? Cia peb kawm txog qhov no.

Lub siab tus yees.

Thaum peb ntsib teeb meem, yeej ua rau peb ntxhov siab kawg li. Tiamsis phau Vajlugkub txhawb kom peb “thov Vajtswv tsis tu ncua” thiab “qhia txhua yam uas [peb] cheem tsum rau nws paub.” (1 Thexalaunika 5:17; Filipi 4:6) Phau Vajlugkub cog lus tias yog peb thov Vajtswv ces nws “txojkev siab tus uas ntau dhau li neeg nkag siab tau yuav tsom kwm [peb] lub siab thiab [peb] tej kev xav.” (Filipi 4:7) Yog peb qhia siab rau peb Leej Txiv Yehauvas, ces Nws yuav pab tau peb muaj lub siab tus yees. Yehauvas thiaj txhawb peb li no: “Cia li muab koj lub nra tso plhuav rau [Yehauvas], mas nws yuav tuav rawv koj.”​—Ntawv Nkauj 55:22.

Thoob ntiajteb muaj neeg suav tsis txheeb tau thov Vajtswv, lawv thiaj muaj lub siab tus yees. Ib tug hu ua Hee Ran [hi la] nyob Kaus Lim Qab Teb hais tias: “Txawm kuv muaj kev nyuaj siab ntau yam los thaum kuv thov Vajtswv, yeej txo tau kuv lub nra, kuv thiaj li tiv dhau.” Ib tug hu ua Cecilia [xi·xe·lia] nyob tebchaws Philippines nyuaj siab ntau yam thiab. Nws niaj hnub txhawj txog nws niam thiab nws 2 tug ntxhais. Nimno nws niam mob hnyav heev, tsis paub leejtwg li lawm. Txawm li ntawd los, Cecilia hais li no: “Vim kuv thov Vajtswv kuv thiaj peem taus ib hnub dhau ib hnub, ua rau kuv tsis nco qab kuv tej kev nyuaj siab. Kuv tso siab tias Yehauvas yuav pab kuv saib xyuas kuv tsev neeg.”

Txhawb tau peb lub siab.

Ib txhia ntxhov siab kawg li vim lawv muaj ib tug mob uas kho tsis tau, lossis lawv raug lwm yam kev ceeblaj. Yog koj tabtom raug tej kev nyuaj siab loj, cia li thov tus “Vajtswv uas txhawb siab txhua yam.” Phau Vajlugkub qhia tias nws yuav “txhawb peb lub siab rau txhua yam kev ceeblaj uas peb raug.” (2 Khaulee 1:3, 4) Muaj ib zaug thaum Yexus nyuaj siab heev, nws “txhos caug thov Vajtswv.” Vajtswv thiaj tso ib “tug tubtxib saum ntuj los tshwm rau Yexus thiab txhawb nws lub zog.” (Luka 22:41, 43) Muaj dua ib tug txivneej hu ua Nehemi uas raug ntau yam kev nyuaj siab. Ib co neeg limhiam heev tawm tsam kom nws tso Vajtswv tes haujlwm tseg. Nws thiaj thov Vajtswv li no: “Nimno thov koj txhawb kuv txhais tes lub zog.” Thaum kawg Vajtswv thiaj pab nws muaj lub siab tawv qhawv ua nws tes haujlwm tiav. (Nehemi 6:9-16) Ib tug kwvtij hu ua Reginald [le·ntses·nau] nyob tebchaws Ghana tau hais li no: “Thaum kuv thov Vajtswv tag nrho kuv kaj siab lawm ntau. Zoo ib yam li kuv qhia kuv tej kev nyuaj siab rau ib tug uas muaj cuab kav pab tau kuv tiag tiag, thiab txhawb kom kuv ua siab loj.” Yog li ntawd, thaum peb thov Vajtswv yeej txhawb tau peb lub zog tiag.

Muaj Vajtswv lub tswvyim.

Yog peb tsis txawj txiav txim zoo, peb yuav tsim teeb meem rau peb tus kheej thiab rau cov uas peb hlub tshua. Yuav ua li cas peb thiaj muaj tswvyim txiav txim zoo? Phau Vajlugkub hais tias: “Yog nej cov leejtwg tsis muaj tswvyim, cia tus ntawd thov Vajtswv uas muaj lub siab dav pub rau txhua tus tsis thuam leejtwg li, mas Vajtswv yuav pub tswvyim rau nws.” (Yakaunpau 1:5) Yog peb thov kom Vajtswv pub tswvyim rau peb, ces nws yuav pub nws lub hwj huam dawb huv coj peb txoj hau kev. Tsis tas li ntawd xwb, yog peb xav thov kom Vajtswv pub kiag lub hwj huam rau peb los kuj tau thiab. Yexus thiaj hais li no: “Nej leej Txiv uas nyob saum ntuj yimhuab yuav muab [lub hwj huam] uas dawb huv rau cov uas thov nws.”​—Luka 11:13.

Txawm Yexus los kuj thov Vajtswv ua ntej nws txiav txim siab ua ib yam dabtsi thiab. Phau Vajlugkub qhia tias ua ntej nws yuav xaiv nws 12 tug tubtxib, nws “thov Vajtswv ib hmos kaj ntug.”​—Luka 6:12.

Cov uas xyaum Yexus tus qauv pom tias Vajtswv yeej pub tswvyim rau lawv tiag. Regina [le·ntsi·na] uas nyob tebchaws Philippines raug ntau yam kev nyuaj siab. Nws tus txiv tau tuag, tseg nws ib leeg tu nkawd cov menyuam xwb. Tom qab ntawd nws tseem poob haujlwm lawm thiab. Nws tau ua li cas nws thiaj muaj tswvyim txiav txim zoo? Nws hais tias twb yog nws thov Yehauvas tas zog xwb. Muaj dua ib tug kwvtij hu ua Kwabena [kha·npe·na] hauv tebchaws Ghana hais tias nws thov Vajtswv pab thaum nws poob nws txoj haujlwm ua tsev. Nws thov Yehauvas tsis tseg kom nws muaj tswvyim nrhiav tau ib txoj haujlwm zoo. Thaum kawg nws hais tias: “Kuv ntseeg tias twb yog Yehauvas pab kuv xaiv ib txoj haujlwm zoo.” Tes haujlwm ntawd pab kom nws khwv txaus noj txaus haus, thiab kom nws muaj sijhawm teev tiam Yehauvas. Yog koj thov Vajtswv txog koj txojkev sib raug zoo nrog Nws, ces Yehauvas yeej yuav pub tswvyim rau koj.

Kev thov Vajtswv tseem pab tau koj ntau tshaj li peb kawm no thiab. (Mus saib lub ntsiab me “Kev Thov Vajtswv Pab Tau Peb Li Cas?”) Tiamsis yog koj xav kom Vajtswv pab koj tiag, koj yuav tsum kawm ntxiv txog nws, seb nws xav kom koj ua dabtsi thiaj haum nws siab. Koj puas xav kawm thiab? Cia li nug Yehauvas ib tug Timkhawv. Lawv yuav zoo siab tuaj qhia Vajlugkub rau koj.a Kev kawm Vajlugkub yuav pab koj txav ze rau Vajtswv, tus uas mloog tibneeg tej lus thov.​—Ntawv Nkauj 65:2.