Yog Tim Leejtwg?

Niaj hnub no muaj ntau yam xwm txheej tsis hais tsov rog, kab mob kev nkeeg, thiab kev tshaib nqhis. Vajtswv tsis yog tus tsim tej ntawd. Phau Vajlugkub qhia tias tibneeg raug kev txom nyem vim 3 qho nram no:

1. Kev Qia Dub, Siab Hlob, Thiab Kev Ntxub Ntxaug. “Ib tug muaj hwjchim kav ib tug, ua rau nws raug txom nyem.” (Laj Lim Tswvyim 8:9) Muaj kev txom nyem vim muaj cov neeg qia dub thiab cov neeg limhiam quab yuam caij tsuj lwm tus.

2. Neeg Yeej Tsis Paub Nws Lub Caij Lub Nyoog. Muaj kev txom nyem vim “lub caij lub nyoog phem los raug kiag lawv tamsid.” (Laj Lim Tswvyim 9:12) Muaj tej lub sijhawm ib txhia cia li mus tom thawj xwm txheej phem. Tej zaum xwm txheej phem ho los raug lawv vim lwm tus tsis xyuam xim. Tsis tas li ntawd, vim neeg zoo tsis tiav lawv kuj rov ua raug lawv tus kheej thiab.

3. Tus Uas Limhiam Kav Lub Qab Ntuj No. Phau Vajlugkub qhia meej tias leejtwg thiaj yog tus uas tsim kev kub ntxhov. 1 Yauhas 5:19 hais tias: “Lub ntiajteb huvsi nyob hauv tus uas Phem qab hwjchim.” Tus uas “Phem” ntawd yog Xatas Ntxwg Nyoog. Thaum chiv thawj nws yog Vajtswv ib tug tubtxib saum ntuj, tiamsis “nws tsis nyob hauv qhov tseeb.” (Yauhas 8:44) Kuj muaj lwm cov tubtxib saum ntuj uas xav ua raws li lawv lub siab ntshaw. Lawv nrog Xatas ntxeev siab rau Vajtswv, lawv thiaj tau mus ua cov dab lawm. (Chiv Keeb 6:1-5) Txij thaum ntawd los lawv ua limhiam thiab tswj nrees qab ntuj neeg. Nimno lawv hajyam ua limhiam rau tibneeg. Qhia Tshwm 12:9, 12 hais tias Xatas npau taws heev, nws “yog tus uas dag ntxias neeg thoob ntiajteb.” Neeg ntiajteb thiaj “raug txom nyem vim Ntxwg Nyoog.” Xatas phem thiab limhiam kawg nkaus, nws zoo siab heev thaum tibneeg raug kev txom nyem. Yog tim Xatas tsis yog tim Vajtswv, thiaj muaj kev txom nyem.

XAV LI NO: Tus neeg uas tsis muaj siab muaj ntsws thiaj tsim txom lwm tus xwb. Vajtswv puas muaj tus yam ntxwv phem li ntawd? Phau Vajlugkub qhia tias Vajtswv yeej tsis coj li ntawd ib zaug li. 1 Yauhas 4:8 hais tias “Vajtswv yog txojkev hlub.” Yauj 34:10 hais ntxiv tias “tsis muaj ib zaug Vajtswv yuav ua limhiam kiag li, thiab tus uas muaj hwjchim loj kawg nkaus yuav ua txhaum.”

Vajtswv ntxub kev limhiam kawg li, thaum peb raug kev txom nyem mob Vajtswv siab heev. Phau Vajlugkub hais tias: “Cia li muab nej txhua yam kev txhawj xeeb tso plhuav rau nws, vim nws mob siab nej.” (1 Petus 5:7) Yog li ntawd, yuav ntev npaum li cas Vajtswv mam muab Xatas tshem tawm kom thiaj tsis muaj kev txom nyem lawm? Vajtswv hlub peb heev thiab nws muaj hwjchim loj kawg nkaus, nws yuav muab Xatas thiab txhua txojkev txom nyem, kev tsis ncaj ncees tshem tawm huvsi mus. Zaj tom ntej yuav piav txog lub ntsiab no.a​—Saib cov lus hauv qab taw qhia.