Vajtswv Lub Npe Hu Li Cas?

Thaum koj ntsib ib tug twg, koj yeej xub nug nws lub npe. Yog koj nug Vajtswv lub npe, nws yuav teb koj li cas?

“Kuv yog [Yehauvas], no yog kuv lub npe.”​—Yaxaya 42:8.

Koj puas tau hnov lub npe Yehauvas dua? Coob tus tsis tau hnov dua rau qhov thaum tibneeg txhais phau Vajlugkub lawv tsis tshua txhais nws lub npe. Ntau phau luag muab nws lub npe tshem tawm thiab muab hloov ua “tus Tswv.” Tej phau ho siv “Yawmsaub” los hloov Vajtswv lub npe. Tiamsis thaum xub sau phau Vajlugkub Vajtswv lub npe Yehauvas tshwm txog li 7,000 zaus diam. Vajtswv lub npe muab sau ua 4 tug tsiaj ntawv txiv Henplais uas yog, YHWH lossis JHVH. Lub npe no sau ua lus Hmoob yog “Yehauvas.”

Vajtswv lub npe tshwm hauv cov nqe Vajlugkub ua lus Henplais thiab hauv ntau phau Vajlugkub uas luag txhais tau lawd

VAJTSWV LUB NPE MUAJ NQES HEEV

Vajtswv saib nws lub npe muaj nqes. Tsis muaj leejtwg tis npe rau Vajtswv tiamsis nws yog tus uas tis lub npe Yehauvas rau nws tus kheej. Yehauvas hais tias: “No yog kuv lub npe mus ib txhis, mas txhua tiam neeg yuav tsum nco hu li no mus.” (Khiav Dim 3:15) Vajtswv muaj ntau lub npe meej mom xws li tus muaj hwjchim loj kawg nkaus, Leej Txiv, tus Tswv, thiab Vajtswv. Tiamsis nws lub npe Yehauvas tshwm hauv phau Vajlugkub ntau tshaj tej npe meej mom ntawd tibsi. Tseem tshwm ntau tshaj tej npe xws li Aplahas, Mauxe, Davi thiab Yexus huv tibsi. Twb yog Vajtswv xav kom nws lub npe nrov ncha thoob plaws ntiajteb. Phau Vajlugkub hais tias: “Thov ua kom lawv paub tias koj tib leeg xwb uas npe hu ua [Yehauvas] thiaj yog tus Vajtswv Loj Dua Ntais uas kav tag nrho thoob ntiajteb.”​—Ntawv Nkauj 83:18.

Yexus saib Vajtswv lub npe muaj nqes. Yexus qhia kom nws cov thwjtim thov li no txog Vajtswv lub npe: “Peb leej Txiv uas nyob saum ntuj, thov sawvdaws hwm koj lub npe kom dawb huv.” (Mathai 6:9) Niaj hnub no coob leej tau muab zaj lus thov ntawd hu ua Tus Tswv Tej Lus Thov. Yexus kuj thov tias: “Au leej Txiv, thov koj ua rau koj lub npe tau koob meej.” (Yauhas 12:28) Yexus siv tag nrho nws lub neej los qhuas Vajtswv lub npe. Nws thiaj thov li no: “Kuv twb qhia koj lub npe rau lawv paub lawm thiab kuv tseem yuav qhia rau lawv paub thiab.”​—Yauhas 17:26.

Cov uas paub Vajtswv saib nws lub npe muaj nqes. Vajtswv cov tibneeg puag thaum ub yeej paub tias lawv yuav tsum siv nws lub npe Yehauvas, Nws thiaj tsom kwm lawv thiab cawm lawv dim. Paj Lug 18:10 hais tias: “[Yehauvas] lub npe yog lub chaw tsom faj uas ruaj khov, tus ncaj ncees dhia mus rau hauv thiab nyob tso siab plhuav.” Yau-ee 2:32 kuj hais tias: “Txhua tus uas thov hu [Yehauvas] lub npe yuav dim.” Phau Vajlugkub qhia meej tias cov uas pe hawm Vajtswv tiag yog cov uas tuav Vajtswv lub npe. Mikha 4:5 hais tias: “Ib tsoom neeg sawvdaws nyias tuav nyias tus timtswv lub npe ua neej, tiamsis peb yuav tuav [Yehauvas] uas yog peb tus Vajtswv lub npe ua neej mus ib txhis tsis kawg.”​—Tubtxib Tes Haujlwm 15:14, NN.

LUB NPE NTAWD QHIA LI CAS

Vajtswv tib leeg xwb thiaj tsim nyog tau lub npe no. Cov neeg tshawb fawb Vajlugkub feem coob hais tias Yehauvas lub npe txhais tias, “Nws Ua Kom Muaj Tshwm Sim.” Puag thaum ub Yehauvas qhia Mauxe txog nws lub npe li no: “Kuv ua tau txhua yam raws li kuv pom zoo ua.” (Khiav Dim 3:14, NW) Lub npe Yehauvas txhais tias nws yog tus rhawv tsim ib puas tsav yam. Tsis tas li ntawd xwb, nws muaj peevxwm hloov nws tus kheej thiab hloov ib puas tsav yam uas nws tau tsim, kom muaj tiav raws li nws lub ntsiab. Tej npe xws li tus Tswv thiab Vajtswv tsuas qhia txog nws lub meej mom thiab nws lub hwjchim xwb. Tiamsis lub npe Yehauvas muaj ntsiab rau, thiab qhia kom peb paub ntxaws ntxaws tias nws yog ib tug Vajtswv zoo li cas tiag.

Vajtswv lub npe qhia tias nws xav paub txog peb. Raws li peb tau kawm, Vajtswv lub npe muaj ntsiab rau, thiab qhia tias nws yog tus rhawv tsim ib puas tsav yam. Nws ib txwm yug siav rau txhua yam uas ciaj sia. Nws tsom kwm txhua yam uas nws tsim tseg, thiab saib tej ntawd muaj nqes heev. Nws kuj saib tibneeg muaj nqes kawg li thiab! Tsis tas li xwb, Vajtswv ua tus xub qhia nws lub npe rau peb, xwv peb thiaj paub nws. Nws tsis zoo li tej vajtswv cuav uas tsis muaj leejtwg paub txog. Nws xav kom peb paub tias peb yeej nrog tau nws sib raug zoo tiag.​—Ntawv Nkauj 73:28.

Thaum peb tuav Vajtswv lub npe hu qhia tias peb xav paub txog nws. Piv txwv tias koj xav nrog ib tug neeg ntaus phoojywg. Koj qhia koj lub npe rau nws, tiamsis nws pheej tsis kam tuav koj lub npe hu. Koj ho xav li cas? Tej zaum koj yuav xav tias nws tsis xav nrog koj ua phoojywg. Vajtswv los ib yam li ntawd thiab. Yehauvas qhia nws lub npe rau noob neej. Nws yeej xav kom peb tuav nws lub npe hu. Thaum peb siv Vajtswv lub npe yeej qhia tias peb xav nrog nws ntaus phoojywg. Vajtswv paub thiab pom cov uas “saib taus nws lub npe.”​—Malakhi 3:16.

Yog peb xav paub Vajtswv, peb yuav tsum xub paub nws lub npe. Tiamsis peb yuav tsum kawm seb Vajtswv yog tus zoo li cas thiab. Nyeem ntxiv txog qhov no.