Xyuas Koj Txojkev Ntseeg Kom Ruaj Khov

1, 2. (1) Raws li Efexus 6:16, vim li cas peb txojkev ntseeg yuav tsum ruaj khov? (2) Hauv zaj no, peb yuav tham txog 2 lo lus nug twg?

PEB txojkev ntseeg zoo yam li ib ‘daim hlau tiv thaiv.’ Yog li ntawd peb yuav tsum muaj kev ntseeg npaum li cas thiaj tiv thaiv tau peb? (Nyeem Efexus 6:16.) Zoo ib yam li daim hlau uas tiv thaiv tus tub rog, peb txojkev ntseeg yuav tsum tiv thaiv peb ntawm tej kev plees kev yi, kev ua nruj ua tsiv, lossis lwm yam uas Vajtswv tsis pom zoo.

² Nyob rau tiam kawg no, peb txojkev ntseeg yuav raug sim ntau zuj zus. (2 Timautes 3:1) Peb yuav ua tib zoo tshuaj ntshis peb txojkev ntseeg li cas? Peb yuav tau ua li cas peb txojkev ntseeg thiaj li nyob ruaj khov? Cia peb teb 2 lo lus nug no.

UA TIB ZOO TSHUAJ KOJ DAIM HLAU TIV THAIV

3. Cov tub rog tu lawv daim hlau tiv thaiv li cas, thiab yog vim li cas?

³ Yav thaum ub, tus tub rog daim hlau tiv thaiv muaj ib daim tawv tsiaj plooj. Cov tub rog yuav tsum pleev roj ntshis, daim tawv tsiaj thiaj kav ntev thiab tej hlau thiaj tsis xeb. Yog tus tub rog pom tias nws daim hlau tiv thaiv puas qhovtwg lawm, nws yuav tau muab kho thiaj siv tau mus ua rog.

4. (1) Vim li cas peb yuav tau ua zoo xyuas peb txojkev ntseeg seb puas ruaj khov? (2) Yuav ua li cas peb txojkev ntseeg thiaj ruaj khov?

⁴ Zoo ib yam li cov tub rog txheej thaud tu ntshis lawv daim hlau tiv thaiv, peb yuav tau ua zoo xyuas peb txojkev ntseeg kom thiaj kov yeej tej kev sim siab. Txhua tus uas ntseeg Yehauvas yuav tau tawm tsam dab. (Efexus 6:10-12) Koj tib leeg xwb thiaj ua tau kom koj txojkev ntseeg ruaj khov. Yog li ntawd, yuav ua li cas koj txojkev ntseeg thiaj ruaj ua ntej thaum koj raug kev sim siab? Koj yuav tsum thov Vajtswv pab koj. Tom qab ntawd, nyeem Vajtswv Txojlus thiab tshuaj koj txojkev ntseeg seb koj puas coj raws li Vajtswv lub siab nyiam. (Henplais 4:12) Phau Vajlugkub hais tias: “Cia siab rau tus TSWV [“Yehauvas,” NWT ] kom kawg koj lub siab lub ntsws. Tsis txhob cia siab rau koj tej kev txawj ntse.” (Pajlug 3:5, 6) Yog li ntawd, ua tib zoo xav txog tej yam uas koj nyuam qhuav ua tas seb koj ua li cas xwb. Xws li thaum koj tsis muaj nyiaj txiag, koj puas xav txog Yehauvas lo lus cog tseg hauv Henplais 13:5 tias: “Kuv yuav tsis tso koj tseg lossis kuv yuav tsis muab koj povtseg ib zaug li”? Koj puas ntseeg tias Yehauvas yuav pab raws li lo lus cog tseg no? Yog koj ntseeg, ces qhia tau tias koj yeej ua tib zoo saib xyuas koj txojkev ntseeg kom ruaj khov.

5. Thaum ua tib zoo tshuaj koj txojkev ntseeg tej zaum koj yuav pom li cas?

⁵ Thaum ua tib zoo tshuaj koj txojkev ntseeg koj yuav pom tej uas yuav ua rau koj txojkev ntseeg tsuag. Tej zaum tej ntawd koj twb tsis tau ras txog li thiab. Tej ntawd yog dabtsi? Tej zaum koj muab tej yam txhawj heev dhau lawm. Lossis tej lus dag ua rau koj txojkev ntseeg tsuag. Lossis tej teeb meem uas koj raug ua rau koj qaug zog lawm. Yog koj ntsib li no, koj yuav tiv thaiv koj txojkev ntseeg li cas?

TIV THAIV KOJ TXOJKEV NTSEEG

6. Zoo rau peb txhawj txog tej yam twg?

⁶ Muaj tej yam kuj zoo rau peb txhawj txog thiab. Xws li peb txhawj seb peb yuav ua haum Yehauvas thiab Yexus nkawd siab li cas. (1 Kauleethaus 7:32) Yog peb ua txhaum loj, peb txhawj seb peb yuav ua li cas thiaj rov sib raug zoo nrog Vajtswv. (Phau Ntawv Nkauj 38:18) Zoo rau peb txhawj txojkev sib raug zoo ntawm peb tus txij nkawm thiab txhawj txog peb tsev neeg. Tsis tas li ntawd, zoo rau peb txhawj txog cov kwvtij nkauj muam thiab.​—1 Kauleethaus 7:33; 2 Kauleethaus 11:28.

7. Raws li Pajlug 29:25, vim li cas peb yuav tsum tsis txhob ntshai neeg?

⁷ Yog thaum peb muab qees yam txhawj heev dhau lawd yuav ua rau peb txojkev ntseeg tsuag. Tej yam ntawd yog dabtsi? Tej zaum peb pheej txhawj tias yuav noj thiab hnav dabtsi. (Mathais 6:31, 32) Yog peb txhawj heev dhau lawd ces peb yuav rau siab ntso mus khwv kom tau tej ntawd. Tsis tas li ntawd, peb yuav pib ntshaw nyiaj txiag lawm thiab. Yog thaum peb cia muaj li no, peb txojkev ntseeg Yehauvas yuav tsuag thiab peb yuav plam txojkev sib nraug zoo nrog nws. (Malakaus 4:19; 1 Timautes 6:10) Ib qho ntxiv yog peb pheej txhawj tsam luag tsis nyiam peb. Thaum muab txhawj heev dhau lawm ces peb yuav ntshai neeg dua li ntshai Yehauvas tu siab. Yuav kom peb tsis txhob ntshai neeg, peb yuav tau thov kom Yehauvas tsav kev ntseeg ntxiv thiab pab kom peb ua lub siab loj siab tawv.​—Nyeem Pajlug 29:25; Lukas 17:5.

8. Peb yuav ua li cas xwb thaum peb hnov luag tej lus dag?

⁸ Phau Vajlugkub hais tias Xatas “yog txhua tus uas dag leej txiv.” Nws siv tej neeg uas nws tswj hais lus dag txog Yehauvas thiab peb cov kwvtij nkauj muam. (Yauhas 8:44) Xws li nws siv cov neeg uas fav xeeb rau Vajtswv dag thiab ntxeev lus txog Yehauvas lub koom haum rau hauv tej vej xaij, this vis (TV), xov thooj cua, lossis hauv tej xov xwm. Lawv tej lus dag no zoo li Xatas cov “xibxub hluavtaws uas nws tua tuaj.” (Efexus 6:16) Peb yuav ua li cas thaum peb hnov luag tej dag li ntawd? Peb tsis txhob mloog lawv hlo li. Peb tso siab rau Yehauvas thiab ntseeg tias peb cov kwvtij nkauj muam yeej tsis zoo li lawv hais ntawd. Peb tsis txhob sib cav nrog cov neeg no lossis xav paub seb lawv hais dabtsi. Peb yuav tsum tsis txhob nrog cov neeg fav xeeb ntawd tham hlo li.

9. Yuav ua li cas yog tias peb qaug zog?

⁹ Yog peb qaug zog ces yuav ua rau peb txojkev ntseeg tsuag. Yog vim li cas peb thiaj li qaug zog? Tej thaud peb tej kev nyuaj siab yuav ua rau peb qaug zog. Yuav kom peb tsis txhawj kiag los kuj tsis tau, tiamsis tsis txhob muab txhawj heev dhau lawm. Yog peb pheej xav txog tej kev nyuaj siab xwb ces peb yuav tsis nco ntsoov txog Yehauvas tej lus cog tseg rau yav tom hauv ntej. (Tshwmsim 21:3, 4) Yog peb qaug zog heev ces peb yuav tso Yehauvas tseg los kuj muaj thiab. Tiamsis tsis txhob cia kom peb qaug zog li no.

10. Ib tug muam tsab ntawv qhia peb li cas?

¹⁰ Muaj ib tug muam nyob tebchaws Amelikas niaj hnub tu nws tus txiv uas muaj mob ntsuav. Nws tuav rawv txojkev ntseeg li cas xwb? Nws sau ib tsab ntawv mus rau lub koom haum hauv paus loj tias: “Muaj qho zaug, kuv tus txiv tus mob ua rau wb nyuaj siab thiab qaug zog kawg. Tiamsis wb cia siab rau yav tom hauv ntej. Kuv ua Yehauvas tsaug rau ib puas tsav yam uas nws ua los txhawb wb txojkev ntseeg thiab cuab wb lub zog. Tej lus cob qhia thiab lus txhawb zog pab tau wb kawg li kom rau siab teev tiam Yehauvas thiab thev dhau tej uas Xatas ua los txo wb txojkev ntseeg.” Tus muam no cov lus qhia tias peb yeej peem dhau tej kev nyuaj siab. Peb yuav ua li cas peem? Nco ntsoov tias thaum muaj kev nyuaj siab Xatas yuav ua kom peb hajyam qaug zog. Yog li ntawd kuj yog ib lub sijhawm zoo rau peb tawm tsam Xatas thiab. Tsis tas li ntawd xwb, tso siab tias Yehauvas yuav txhawb koj lub zog. Thiab nco ntsoov ris Yehauvas txiaj ntsig rau tej zaub mov ntawm sab kev ntseeg.

11. Yog xav paub seb peb txojkev ntseeg puas ruaj khov, peb yuav tsum xav txog cov lus nug twg?

¹¹ Koj txojkev ntseeg zoo li cas xwb, puas ruaj khov thiab? Tau ob peb lub hlis dhau los no, puas tseem muaj tej yam uas koj pheej muab txhawj heev dhau lawm? Yog tsis muaj ces kuj zoo. Koj puas tseg taus txhob mloog cov lus dag lossis sib cav sib ceg nrog tej neeg fav xeeb? Koj puas npua taus koj tej kev nyuaj siab? Yog koj ua tau li no ces koj txojkev ntseeg tseem nyob ruaj khov. Txawm li ntawd los peb yuav tsum ceev faj rau qhov Xatas muaj lwm yam cuab yeej uas nws siv los tawm tsam peb. Cia peb kawm txog ib yam.

TSIS TXHOB NTSHAW UB NTSHAW NO

12. Yuav ua li cas rau peb yog peb pheej mus ntshaw ub ntshaw no?

¹² Yog peb pheej mus ntshaw ub ntshaw no ces yuav ua rau peb txojkev ntseeg tsuag thiab peb yuav tsis nquag ua Yehauvas tes haujlwm lawm. Tus tubtxib Paulus hais tias: “Tus tubrog . . . yeej ua raws li nws tus thawj tubrog lub siab nyiam xwb, nws yuav tsis mus ua liaj ua teb thiab ua lag ua luam ib zaug li.” (2 Timautes 2:4) Tsis tas li ntawd, luag yeej txwv tsis pub cov tub rog Loos ib tug mus ua lwm yam haujlwm. Yog ib tug tub rog twg tsis mloog ces yuav ua li cas rau nws xwb?

13. Vim li cas cov tub rog yuav tsum tsis txhob mus ua lwm yam haujlwm?

¹³ Muab ua piv txwv li no: Muaj ib hnub thaum sawv ntxov, ib pab tug rog mus xyaum tua ntaj tiamsis ib tug tub rog cia li ploj lawm. Tus tub rog ntawd mus muag zaub mov tom khw lawm. Thaum tsaus ntuj, cov tub rog mus tu lawv tej cuab yeej ua rog. Tiamsis tus tub rog uas mus muag zaub mov tom khw ho mus npaj nws tej zaub mov rau tagkis. Tagkis sawv ntxov lawv cov yeeb ncuab txawm tuaj tua lawv. Koj sim xav seb, tus tub rog twg thiaj yuav npaj txhij mus ua rog thiab ua haum tus thawj tub rog siab? Yog koj yog ib tug ntawm cov tug rog ntawd, koj xav kom leejtwg nrog koj xwb? Tus uas npaj txhij zog mus ua rog lossis tus uas npaj zaub mov mus muag tom khw?

14. Vim peb yog Khetos cov tub rog, dabtsi muaj nuj nqis tshaj?

¹⁴ Peb zoo li cov tub rog uas npaj txhij mus ua rog. Peb yuav tsis cia ib yam dabtsi los khuam cheem peb. Peb lub homphiaj yog ua kom haum peb 2 tug Thawj Coj uas yog Yehauvas thiab Khetos nkawd siab. Qhov no muaj nuj nqis tshaj ib puas tsav yam uas peb xav tau hauv Xatas lub qab ntuj. Peb yuav tsum ua kom peb muaj sijhawm thiab muaj dag zog los teev tiam Yehauvas. Peb txojkev ntseeg zoo ib yam li daim hlau tiv thaiv, yog li ntawd yuav tau tu ntshis peb daim hlau tiv thaiv thiab cev cuab yeej ua rog kom zoo.

15. (1) Tus tubtxib Paulus tau ceeb toom li cas? (2) Vim li cas Paulus thiaj ceeb toom li ntawd?

¹⁵ Tus tubtxib Paulus tau ceeb toom tias “cov neeg uas xav npluanuj” yuav “tso Vajtswv tseg.” (1 Timautes 6:9, 10) Yog li ntawd, peb yuav tsum ceev faj! Yog tsis ceev faj ces peb yuav mus vuag tej yam uas peb twb tsis cheem tsum. Qhov no yuav ua rau peb ntshaw tej yam uas tsis muaj qab hau thiab yuav tsim kom muaj teebmeem xwb. Nco ntsoov tias Xatas yuav siv tej uas peb lub siab ntshaw los ua cuab yeej tawm tsam peb txojkev ntseeg.

16. Malakaus 10:17-22 pab kom peb xav txog cov lus nug twg?

¹⁶ Puas txhaum yog tias peb muaj nyiaj ntau txaus mus yuav tej khoom ub khoom no uas peb twb siv tsis txog? Yeej tsis txhaum dabtsi, tiamsis peb yuav tau xav txog tej no: Txawm peb muaj nyiaj mus yuav tej khoom ntawd los peb puas muaj sijhawm los siv thiab los tu? Yog tias peb pheej niaj hnub kov rawv yam khoom ntawd xwb ne, yuav zoo li cas? Peb puas yuav coj li tus txivneej uas tsis kam muab nws tej qhov txhia chaw muag thiab los ua haujlwm rau Vajtswv? (Nyeem Malakaus 10:17-22.) Tsis muaj ib yam dabtsi yuav zoo tshaj qhov uas peb ua lub neej yoojyim thiab siv peb lub dag lub zog los ua Vajtswv tes haujlwm.

TUAV RAWV KOJ TXOJKEV NTSEEG

17. Peb yuav tsum nco ntsoov dabtsi?

¹⁷ Nco ntsoov tias peb tabtom ua ib ntsuj rog. Yog li ntawd peb yuav tsum npaj mus ntaus rog txhua hnub. (Tshwmsim 12:17) Tus tub rog yuav tsum tuav rawv nws daim hlau tiv thaiv kom ruaj. Zoo ib yam li ntawd, peb yuav tsum tuav rawv peb txojkev ntseeg kom ruaj khov. Tsis muaj leejtwg yuav tuav tau rau peb.

18. Vim li cas yav thaum ub tus tub rog yuav tsum tuav rawv nws daim hlau tiv thaiv kom ruaj?

¹⁸ Yav thaum ub, ib tug tub rog tau meej mom rau qhov nws siab tawv. Tiamsis nws yuav poob ntsej muag yog tias nws nqa tsis tau nws daim hlau tiv thaiv los nrog nws. Tus sau keeb kwm Loos hu ua Takitaus (Tacitus) sau tias: “Yog ib tug tub rog ua nws daim hlau tiv thaiv poob lawd mas yog ib qho uas poob ntsej muag kawg nkaus.” Vim li ntawd cov tub rog thiaj tuav rawv lawv daim hlau tiv thaiv kom ruaj.

19. Yuav ua li cas peb thiaj tuav rawv peb txojkev ntseeg?

¹⁹ Ib yam li tus tub rog uas tuav rawv nws daim hlau tiv thaiv, peb yuav tsum tuav rawv peb txojkev ntseeg kom ruaj khov. Yuav kom tuav rawv tau txojkev ntseeg peb yuav tsum rau siab mus kev sib txoos thiab mus nrog lwm tus tham txog Yehauvas lub npe thiab nws lub Nceeg Vaj. (Henplais 10:23-25) Tsis tas li ntawd xwb, peb yuav tsum nyeem Vajtswv Txojlus txhua txhua hnub thiab thov Yehauvas pab kom peb ua raws li nws tej lus. (2 Timautes 3:16, 17) Yog peb ua li no, ces yuav tsis muaj ib yam cuab yeej twg uas Xatas siv yuav kov yeej peb. Txawm yog Xatas txo tau peb txojsia los Yehauvas yuav tsa peb sawv rov los nyob mus ib txhis tsis kawg. (Yaxayas 54:17) Peb txojkev ntseeg yuav tiv thaiv tau peb. Peb yuav sawv ruaj khov ua Vajtswv tes haujlwm nrog peb cov kwvtij nkauj muam. Thiab peb yuav kov yeej tej kev sim siab uas peb niaj hnub raug. Qhov uas tshwj xeeb tshaj plaws, yog qhov uas peb tuaj Yexus tog thaum nws ntau yeej ntsuj rog nrog Xatas thiab cov uas tuaj nws tog.​—Tshwmsim 17:14; 20:10.