Koj Puas Paub?
Tus thawj tubtxib tes haujlwm yog dabtsi?
PUAG thaum ub, tus thawj tubtxib yog tus saib xyuas tag nrho nws tus lospav lub cuab tam.
Thaum Yakhauj tus tub Yauxej raug ciaj qhe nyob hauv tebchaws Iziv, nws tus lospav tsa nws ua tus thawj tubtxib hauv nws lub tsev. Nws tus lospav uas yog neeg Iziv “tso plhuav nws lub cuabtam rau Yauxej ua tus saib.” (Chivkeeb 39:2-6) Thaum Yauxej ua ib tug nom uas saib xyuas tag nrho tebchaws Iziv los, nws kuj tsa tau ib tug thawj tubtxib los saib xyuas nws lub tsev thiab.—Chivkeeb 44:4.
Nyob rau Yexus tiam, cov tswv teb uas nyob hauv nroog deb ntawm lawv tej liaj tej teb, tau tsa ib co thawj tubtxib los saib xyuas lawv tej liaj tej teb thiab lawv cov tub qhe.
Leejtwg thiaj ua tau tus thawj tubtxib? Nyob rau Yexus cov tubtxib tiam, tus txivneej Loos hu ua Kalumelam (Columella) sau tias tus tubtxib uas nws tus lospav tsa ua tus saib xyuas yuav tsum yog ib tug uas “paub haujlwm zoo.” Nws yuav tsum yog ib tug uas “saib xyuas cov tub qhe kom lawv ua lawv tes haujlwm thiab tsis ua phem rau lawv.” Kalumelam kuj hais ntxiv tias qhov tseem ceeb tshaj, tus thawj tubtxib yuav tsum tsis txhob xav tias nws paub ib puas tsav yam thiab nws yuav tsum yog ib tug neeg uas nyiam kawm ntxiv.
Nyob hauv Vajtswv Txojlus, tus thawj tubtxib thiab nws tes haujlwm kuj ua piv txwv txog tej haujlwm hauv lub koom txoos Khixatia thiab. Xws li tus tubtxib Petus txhawb cov Khixatia uas yog “ib co tub txib uas tau txais ntau yam txiaj ntsim” ntawm Vajtswv kom lawv siv tej txiaj ntsim uas lawv tau txais mus pab lwm tus.—1 Petus 4:10, NN.
Nyob rau hauv Lukas 16:1-8, Yexus kuj hais ib zaj lus piv txwv txog ib tug thawj tubtxib. Tsis tas li ntawd xwb, hauv ib zaj lus faj lem txog lub caij uas Yexus sawv ua Vajntxwv kav, Yexus qhia nws cov thwjtim tias nws yuav tsa “tus tubtxib uas ncaj thiab muaj tswvyim” lossis “tus tubtxib ncaj ncees” uas yog tus qhev ncaj thiab ntse. Tus qhev ncaj thiab ntse tes haujlwm yog pub zaub pub mov ntawm sab kev ntseeg rau Khetos cov thwjtim uas nyob rau lub sijhawm kawg. (Mathais 24:45-47; Lukas 12:42) Peb zoo siab heev tias peb muaj tej ntaub ntawv uas tus qhev ncaj thiab ntse tau npaj tseg rau sawvdaws thoob qab ntuj.