Siv Kuv Phau Ntawv Txog Phau Vajlugkub Mus Qhia Txoj Xov Zoo
1 Muaj coob leej tau hais tias phau Kuv Phau Ntawv Txog Phau Vajlugkub yog ib phau uas “yoojyim thiab zoo siv mus qhia tibneeg heev.” Phau ntawv no yuav pab tau coob leej coob tus, tsis hais tus laus tus hluas, kom paub txoj xov hauv phau Vajlugkub.
2 Vim tias muaj coob leej uas cov lawv hlub tau tas sim neej lawd, yog li ntawd, zoo rau koj tham txog txojkev cia siab uas cov tuag muaj. Koj siv tau Ntawv Nkauj 146:4, 5 thiab Zaj 92 hauv Phau Ntawv Txog Phau Vajlugkub los pab kom lawv paub tias cov tuag yeej sawv tau rov los muaj sia dua.
3 Peb kuj nrog tibneeg tham li no: “Nyob zoo os. Hnub no wb tuaj tshaj tawm txoj xov zoo rau cov kwvtij zej zog nyob rau koog ntawm no. Peb sawvdaws yeej muaj tej phoojywg lossis tej txheeb ze uas tau tas sim neej lawd. Koj xav tias lawv mus rau qhov twg lawm? [Cia nws teb tas tso.] Vajtswv Txojlus muaj kev cia siab rau peb. [Nyeem Ntawv Nkauj 146:4, 5.] Vajtswv siab zoo heev, nws pub kev cia siab rau cov ciaj thiab cov tuag tibsi. [Nthuav mus rau daim duab nyob rau Zaj 92.] Daim duab no qhia txog Yexus Khetos tsa ib tug mentxhais uas tuag lawd sawv rov los muaj sia uas ua rau leej niam leej txiv zoo siab xyiv fab kawg li. Tiamsis tsis yog Yexus tau tsa tus mentxhais no xwb. Nqe kawg nkaus hauv zaj no hais tias Yexus kuj tau tsa ib tug poj ntsuam tus metub thiab nws tus phoojywg Laxalau. Kuv xav nyeem cov lus nyob rau 2 kab kawg nkaus hauv nqe ntawd rau koj mloog. Phau ntawv no yog sau rau cov laus cov hluas tibsi, los pab kom peb txhua tus nco Vajtswv txiaj ntsig rau qhov uas nws hlub thiab txhawj txog peb.” Koj xav muab zaj no hloov kom phim cov uas nrog koj tham los tau.
4 Thaum koj ntsib cov uas tsis muaj sijhawm, koj kuj hais ob peb los xwb thiab siv daim duab uas nyob rau Zaj 115. Koj kuj hais tau li no: “Nyob zoo os. Phau ntawv no yog ib phau uas zoo nyeem heev. Phau ntawv no kuj pab tau cov niam txiv thiab cov menyuam kom paub Vajtswv tej lus cog tseg rau yav tom hauv ntej. [Nthuav mus rau Zaj 115 es nyeem kab kawg nkaus hauv nqe 1.] Phau ntawv no muaj tshaj li 125 daim duab nyob rau hauv. [Nthuav mentsis rau nws saib.] Koj puas xav tau ib phau rau koj cov menyuam lossis cov xeeb ntxwv nyeem?”
5 Muaj coob tus nyiam muab Phau Ntawv Txog Phau Vajlugkub tseb rau cov uas lawv ntsib rau txhua qhov chaw. Muaj ib tug muam tau mus tseb rau tej kws kho menyuam thiab qhia rau lawv tias phau ntawv zoo rau tej menyuam nyeem lub caij lawv zaum tos tus kws kho menyuam. Muaj ib tug muam uas tau coj phau ntawv mus tseb rau ib lub tsev zov menyuam kuj tau pib kawm Vajlugkub nrog cov menyuam ntawd thiab. Tsis tas li ntawd xwb, nws kuj tseb tau 70 phau rau cov menyuam, lawv niam lawv txiv, thiab lawv cov neeg zej zog. Tus pojniam uas saib xyuas lub tsev zov menyuam los kuj nqa tau 24 phau mus lawm thiab. Nws kuj tau coj ib co mus pub rau nws cov phoojywg thiab cov txheeb ze. Kuv Phau Ntawv Txog Phau Vajlugkub yog ib phau uas yoojyim tseb heev. Yog li ntawd, nrhiav sijhawm los tseb phau ntawv no rau txhua tus uas koj ntsib.
6 Peb yuav zoo siab xyiv fab heev vim tias lub hli no peb yuav siv phau Kuv Phau Ntawv Txog Phau Vajlugkub mus qhuas Yehauvas.—Nt.Nk. 146:10.