Tshaj Tawm Hauv Lub Qab Ntuj Uas Hloov Tas Zaj Tas Zog
1 Ib puas tsav yam hloov sai kawg li. Tib pliag ntshis xwb, tej huab cua, tej kev noj kev haus, thiab tej kev nom kev tswv hloov tas. Txojkev zoo siab hnub no kuj hloov tau ua txojkev nyuaj siab tagkis. Tibneeg los kuj hloov tib yam li ntawd thiab. (Ttx. 17:21; 1Khl. 7:31) Vim lub qab ntuj no pheej hloov tas zaj tas zog, peb yuav qhia li cas tibneeg thiaj cuab pob ntseg mloog txoj xov txog lub Nceeg Vaj?
2 Paub Tibneeg Tej Kev Txhawj Xeeb: Ib yam uas pab tau tibneeg cuab pob ntseg mloog tej uas peb qhia yog tham txog tej yam niaj hnub muaj tshwm sim puag ncig peb. Muaj ib zaug thaum Yexus qhia, nws piav txog ib qho xwm txheej uas tau los raug ib co tibneeg. Yexus siv qhov xwm txheej ntawd los pab kom cov tibneeg pom tias lawv yuav tsum nrog Vajtswv sib raug zoo. (Lk. 13:1-5) Tib yam li ntawd, thaum peb mus tshaj tawm txoj xov zoo, peb yuav tau tham txog tej xwm txheej uas tau los raug cov tibneeg uas nyob puag ncig peb, xwv lawv thiaj xav cuab pob ntseg mloog. Tiamsis peb yuav tau ceev faj zoo tsis txhob nrog tibneeg tham txog tej kev nom kev tswv.—Yh. 17:16.
3 Yuav ua li cas peb thiaj paub txog tibneeg tej kev txhawj xeeb? Peb yuav tau nug lawv es ua tib zoo mloog seb lawv teb li cas. (Mth. 12:34) Yog peb ua li no, peb yuav paub lawv tej kev txhawj xeeb thiab paub nrog lawv tham ntxiv mus. Yog tus tswv tsev teb npau taws vog, tej zaum muaj ib yam dabtsi ua rau nws ntxhov siab lawm. Tej zaum cov tibneeg zej zog kuj ntxhov siab tib yam thiab. Ua tib zoo mloog, koj thiaj paub qhia raug tibneeg siab.
4 Npaj Mus Qhia Vajlugkub: Zoo li hais tas los saum no, lub qab ntuj no hloov tas zaj tas zog. Yog li ntawd, thaum peb mus qhia Vajlugkub zoo rau peb xyaum siv phau Reasoning los qhia tibneeg. Nyob rau sab 10 txog 11, ntawm lub ntsiab “Crime/Safety” thiab “Current Events,” muaj cov qauv uas zoo rau peb siv los tham txog tej xwm txheej uas nyuam qhuav muaj tshwm sim. Hauv daim Tes Num Rau Lub Nceeg Vaj ua lus Askiv lub 9 Hlis xyoo 2000, ntawm sab 4, kuj muaj lwm yam qauv rau peb siv thiab. Thaum koj npaj mus qhia Vajlugkub, nco ntsoov xaiv ib nqes Vajlugkub phim lub ntsiab uas koj tau npaj.
5 Nco ntsoov tias cov tibneeg uas nyob hauv tej koog peb qhia yeej hloov tas zaj tas zog. Yog li ntawd, peb yuav tau yoog lawv thiab hloov tej lus uas peb hais. Yog peb xyaum li no, peb yuav qhia tau raug tibneeg siab. Thaum kawg coob leej ntau tus yuav los paub txog Vajtswv Yehauvas, tus uas tsis txawj txawv txav thiab tsis hloov nws tej kevcai.—Yknp. 1:17.